00:00:00 IGIHE NETWORK KN KINYARWANDA EN ENGLISH FR FRANCAIS

Manchester City yaciye agahigo ko kugura umukinnyi uhenze mu Bwongereza

Yanditswe na Eric Tony Ukurikiyimfura
Kuya 6 Kanama 2021 saa 07:47
Yasuwe :
0 0

Manchester City yasinyishije Jack Grealish wakinaga mu kibuga hagati asatira izamu muri Aston Villa, kuri miliyoni 100£, aba umukinnyi wa mbere uhenze mu mateka y’umupira w’amaguru mu Bwongereza.

Grealish w’imyaka 25, yasinye imyaka itandatu muri iyi kipe yatwaye Premier League iheruka ndetse azajya yambara nimero 10 yasizwe na Sergio Aguero.

Miliyoni 100£ yaguzwe, yabaye amafaranga menshi atanzwe ku mukinnyi umwe n’ikipe yo mu Bwongereza, aho yatambutse kuri miliyoni 89£ yaguzwe Paul Pogba ubwo yavaga muri Juventus yerekeza muri Manchester United mu 2016.

Nyuma yo gusinyira Manchester City, Grealish yagize ati “City ni ikipe ya mbere nziza mu gihugu kandi ifite umutoza ufatwa nk’uwa mbere ku Isi. Ni inzozi zibaye impamo kuba ndi muri iyi kipe.”

Uretse kuba umukinnyi wa mbere uhenze mu Bwongereza, Jack Grealish ni uwa cyenda uhenze mu mateka y’umupira w’amaguru ku Isi.

Uyu mukinnyi ashobora gukina umukino we wa mbere mu ikipe itozwa na Pep Guardiola ubwo Manchester City izaba ikina na Leicester City zihataniye Community Shield ku wa Gatandatu i Wembley.

Grealish wakuze afana Aston Villa, yayigezemo afite imyaka itandatu ndetse yayitsindiye ibitego 32 mu mikino 213 yakinnye mu marushanwa yose.

Abakinnyi batanu bahenze mu mateka ya ruhago ku Isi:

  1. Neymar [FC Barcelone - Paris St-Germain] miliyoni 200£ mu 2017
  2. Kylian Mbappé [Monaco - Paris St-Germain] miliyoni 166£ mu 2017
  3. Philippe Coutinho [Liverpool – FC Barcelone] miliyoni 142£ mu 2018
  4. Ousmane Dembélé [Borussia Dortmund - Barcelona] igiteranyo cya miliyoni 135£ mu 2017
  5. João Félix [Benfica - Atlético Madrid] miliyoni 113£ mu 2019
Jack Grealish yerekanywe nk'umukinnyi mushya wa Manchester City
Grealish waguzwe miliyoni 100£, yahawe nimero 10
Jack Grealish yavuye muri Aston Villa yakuriyemo, aho yatangiye gukinira ikipe yayo nkuru mu 2014

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .