IGIHE.com > Imikino > Football
Man City, Bayern zakatishije itike ya 1/8; PSG na Real ku muryango

Man City, Bayern zakatishije itike ya 1/8; PSG na Real ku muryango


Yanditswe kuya 6-11-2013 - Saa 17:42' na Tity Thierry Kayishema

Nyuma y’aho Manchester City yihereranye CSKA Moscow ikayitsinda ibitego 5-1, Bayern München igatsinda Viktoria Plzeň igitego 1-0, aya makipe yombi yahise abona itike ya 1/8 cy’irangiza. Paris St Germain na Real Madrid bisigaje kunganya bakajya muri 1/8 cy’irangiza.

Itsinda A: Manchester United isigaje gutsinda umukino umwe

Nyuma yo kwitsinda igitego mu Bwongereza, Real Sociedad yanganyije ku kibuga cyayo na Manchester United 0-0. Ku munota wa 70, ku ikosa ryari rikorewe Ashley Young, Manchester United yabonye penaliti, Robin Van Persie ateye umupira ukubita umutambiko w’izamu.

Mbere y’uko umukino urangira, Marouane Fellaini yahawe ikarita ya kabiri y’umuhondo.
Undi mukino wo muri iri tsinda Shakhtar Donetsk yaguye miswi na Bayer Leverkusen, 0-0.

Manchester United iyoboye itsinda n’amanota 8 ikurikiwe na Leverkusen n’amanota 7 naho Shakhtar ifite amanota 5.
Nyuma y’umukino wa Sociedad, umutoza wa Man U, David Moyes yavuze ko ari byiza kuba bayoboye itsinda. Yongeraho ko babonye amahirwe menshi atabyajwe umusaruro.

Moyes yagize ati: "Turi aba mbere ari nabyo twifuzaga, ariko twagombaga gutsinda kugira ngo urugendo rutworohere. Ubutaha tuzajya kwa Leverkusen, twakire Shakhtar; mfite icyizere ko muri iyi mikino ibiri tuzabona itike."

Itsinda B: Real Madrid irabura inota rimwe ikajya muri 1/8

Ibitego bya Christiano Ronaldo na Gareth Bale i Turino byaburijwemo na penaliti yatewe neza na Arturo Vidal ndetse n’igitego cya Fernando Llorente. Ronaldo yatsinze igitego cya 8 mu mikino 4 ya champions league 2013-2014.

Niwo mukino wa mbere mu marushanwa yo ku mugabane w’u Burayi aya makipe anganya mu mateka yayo.

København yatunguye Galatasaray iyitsindira muri Danmark igitego 1-0. Rutahizamu wa Galatasaray, Didier Drogba yavuze ko babuze amahirwe mu gihe muri iri tsinda hari amakipe menshi ashobora kubona itike.

Drogba yagize ati: "Dusigaranye imikino ikomeye [Real na Juventus], tugiye kwitegura neza, dufite icyizere ko twakomeza."

Real Madrid ni iya mbere n’amanota 10, ikurikwe na Galatasaray AŞ ifite amanota 4, inganya na FC København mu gihe Juventus ifite amanota 3. Igihe Real Madrid yaba inganyije umukino umwe, yahita ibona atike ya 1/8.

Itsinda C: Paris Saint Germain izategereza kubona inota

Paris Saint Germain yatunguwe ubwo yanganyaga na RSC Anderlecht igitego 1-1 nyamara yari yarayinyagiye mu mukino ubanza ibitego 5-0. Kunganya kwa PSG nabyo birahagije ngo ibone itike.

Zlatan Ibrahimović, kapiteni wa PSG yavuze ko batakinnye nk’uko bikwiye, bakinaga n’ikipe yiteguye nyuma yo kunyagirwa ibitego 5-0.

Ibra yagize ati: "Kurangiza udatsinzwe ni ingenzi; ni ubutumwa ku Burayi. Dutsinze umukino utaha twaba dufite itike. Thiago Silva azaba yagarutse, iyo ahagaze inyuma, twese tuba dufite icyizere."
Olympiakos Piraeus yatsinze Benfica igitego 1-0.

Itsinda D: Bayern München na Manchester City muri 1/8

Nyuma yo gutsinda imikino 4 yose, Bayern ifite iki gikombe yabonye itike ya 1/8 nyuma yo gutsinda Viktoria Plzeň igitego 1-0 cya Mario Mandžukić.

Ibitego bitatu bya Negredo na bibiri bya Sergio Kun Agüero kuri 2 bya CSKA Moscow byahaye itike ya 1/8 abasore ba Pellegrini.

Umutoza wa Manchester City, Manuel Pellegrini yavuze ko bafite ikipe nini kandi ikomeye ku buryo nta bwoba dufitiye uwo ariwe wese.

Pellegrini yagize ati: “Ubu dutegereje ikipe tuzatombora muri Gashyantare. Nabizeza ko mu gihe twaba dukinnye umukino wacu neza, nta kipe tutatsinda. Imyaka ibiri ishize ikipe ntiyakomezaga, ubu tugiye gushaka umwanya wa mbere mu itsinda.”

Bayern iyoboye itsinda D n’amanota 12, ikurikiwe na Manchester City ifite 9, CSKA Moskva ifite 3 mu gihe Viktoria Plzeň itarabona n’inota.

Nyuma yo gukina imikino ibiri isigaye mu matsinda, amakipe 16 azatomborana ku itariki ya 13 Ukuboza 2013 kugira ngo amenye uko azahura mu mikino yo kuvanamo hakinwe umukino ubanza no kwishyura.

Ibrahimovic yatsinze igitego cyo kunganya nyuma y'iminota 2, PSG irabura inota rimwe ikajya muri 18
Aguero yatsindiye Man City ibitego bibiri, igera muri 1/8 nyuma y'imyaka 2 isigara
Penaliti ya Van Persie yakubise umutambiko w'izamu
Ronaldo yatsinze igitego cya 2 cya Real; cyahise kiba icya 8 atsinze muri Champions League uyu mwaka

titythierry@igihe.com

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO