00:00:00 IGIHE NETWORK KN KINYARWANDA EN ENGLISH FR FRANCAIS

Lt Gen Muganga yavuze ku bibazo bya Rayon Sports n’amakosa ya Seifu wari ugiye kwirukanwa

Yanditswe na Habimana Sadi
Kuya 28 Kamena 2021 saa 05:15
Yasuwe :
0 0

Chairman wa APR FC, Lt. Gen Mubarakh Muganga yasobanuye impamvu iyi kipe itirukanye Niyonzima Olivier Seifu wakoze amakosa yo gusohoka mu mwiherero atabifitiye uruhushya, avuga ko bababajwe n’ibihe mukeba wabo, Rayon irimo ndetse anashimangira ko iyi kipe ishobora gutandukana n’abandi bakinnyi umunani bifuzwa n’ikipe zo hanze y’u Rwanda.

Muri uyu mwaka ushize w’imikino 2020-2021, mu kipe ya APR FC havuzwemo amakuru menshi atandukanye arimo bamwe mu bakinnyi b’iyi kipe bagiye bafatirwa ibihano kubera imyitwarire mibi n’ibindi.

Hanavuzwe amakuru y’abakinnyi bayo bifuzwa n’amakipe yo hanze y’u Rwanda n’abandi bari mu mpera z’amasezerano yabo ndetse n’ikibazo cy’umukinnyi Buteera Andrew wagowe n’ibibazo by’imvune kuva uyu mwaka utangiye kugeza urangiye.

Chairman w’iyi kipe, Lt. Gen Mubarakh Muganga yasobanuye buri kibazo mu byakomeje kuvugwa muri iyi kipe.

Niyonzima Olivier Seifu yashoboraga kwirukanwa ariko arokorwa n’uko umuryango we wibarutse impfura

Avuga kuri bimwe bitamenyekanye ku makosa Niyonzima Olivier Seifu yakoze, yahishuye ko uyu mukinnyi yashoboraga kwirukanwa ariko nk’Ubuyobozi bagaca inkoni izamba kuko umuryango w’uyu mukinnyi wari umaze kwibaruka impfura yawo.

Ati “Kuri Seifu kimwe n’abandi bakinnyi, muzi ko APR FC kuri ’discpline’ ntacyo tuyinganya na cyo. Muzi ko kuri Sugira nubwo yaduhenze ariko hamwe n’ibyo byose muzi uko byagenze. Nyuma ye, Kevin byagenze bityo, nyuma ye Bukuru byagenze bityo.“

“Ni muri urwo rwego rero kuri Seifu, byonyine kuba baratubwiye ngo yavuye aho ikipe ibarizwa Shyorongi akaza mu Mujyi twe ntabwo twashoboraga kubyihanganira nk’ubuyobozi. Twamufatiye ibyemezo birimo gusiba imikino runaka n’ibindi.“

Aha yakomeje ashimangira ko iyo hataba kugirira impuhwe umuryango we cyangwa ngo ntihabeho ko umutoza Adil yamusabiye imbabazi, Seifu byari byarangiye agiye kwirukanwa.

Ati“Ndetse no ku mushahara we hari icyo amasezerano avuga. Kuko birimo ko ukoze ibi n’ibi hari ikivaho, kuko turashaka abafite ’discipline’. Ariko ntitwamuciriyeho iteka. Ikindi nanone turarera, turi ababyeyi, turabyumva. Navuga ko nk’icyamukijije kimwe gusa ni uko yagaragaje ko yari amaze icyumweru abyaye nk’umusore muto ufite urwo ruhinja n’umudamu amuhamagara. Natwe twagerageje gushyira mu buryo, bitandukanye n’iby’abandi bagiye bakosa.”

“Ibyo byose twabirebyeho. N’umutoza amusabira imbabazi. Muri make twamubabariye kubera umutoza n’ibyo bindi navuze. Ariko iyo bitaba ibyo ubu Seifu yakabaye ari kwishakira indi kipe nk’abandi. Bwa mbere abakinnyi bose tubaha amahirwe yo kumenya ibyo basabwa kuko ni ikipe y’Ingabo ntabwo bamera nk’abandi. Ubirenzeho rero wese arahanwa.“

Ikipe y’Ingabo ifite abakinnyi umunani babengutswe n’amakipe yo hanze y’u Rwanda

Chairman wa APR FC yakomeje avuga ko ikipe abereye umuyobozi ifite abakinnyi umunani bifujwe n’amakipe yo hanze y’u Rwanda kuva Amavubi yakubuka muri CHAN yabereye muri Cameroun, ariko nk’Ubuyobozi batarafata icyemezo cyo kubarekura kuko hari ibyo bifuza ko bigomba kubanza gutangwa kuri bo.

Ati “Hari abakinnyi umunani basa nk’aho bageze ku mpera z’amasezerano yabo. Hazabaho igihe cyo kuganira na bo, abashaka kuguma muri APR FC bagumemo niba badafite izindi kipe zo hanze zabarambagije kuko twe ntawe twabuza ayo mahirwe.
Dufite abakinnyi batatu bamaze kugurishwa. Dufite abakinnyi bagera ku munani bose bifuzwa ariko namwe murabyumva ubu ni bwo tugiye mu marushanwa. Ubu dufite imbogamizi kuko abakinnyi umunani bose baragenda kandi badasanzwe. Barimo ba Lague, Manzi n’abandi. Abakinnyi umunani bose barifuzwa.”

“Kuva aho baviriye muri Cameroun muri CHAN dufite ubusabe bw’abifuza abakinnyi umunani. Nibaduha icyo twifuza tuzabarekura. Nibaduha nk’ibyo APR FC itanga tuzabagumana uretse gushaka guha abana amahirwe ariko nta bukungu barusha APR FC. Twe turifuza ko umukinnyi azamura urwego kuko iyo asohotse hari ibyo yunguka.”

Uyu muyobozi yanongeye kuvuga ko rutahizamu Sugira Ernest atakiri umukinnyi w’iyi kipe y’Ingabo ko ikipe yose yamwifuza, yaganira na yo ku giti cye nta kibazo.

Buteera Andrew ntabwo yarozwe kandi aracyari umukinnyi wa APR FC

Undi mukinnyi wavuzweho byinshi muri APR FC, ni Buteera Andrew ukina hagati mu kibuga. Uyu mukinnyi ntabwo yorohewe n’uyu mwaka w’imikino kuko yagowe n’uburwayi bwatumye atabasha gukinira iyi kipe muri shampiyona.

Buteera yavuzweho kuba ashobora kuba yararozwe ariko ubuyobozi bw’iyi kipe bwahakanye aya makuru ndetse bwongera gushimangira ko akiri umukinnyi w’iyi kipe y’ingabo.

Lt Gen. Mubarakah Muganga yavuze ko abakinnyi barwaye batajya basezererwa muri APR FC, kabone n’iyo amasezerano yabo yaba yarangiye ahubwo bahitamo kubarwaza kugeza bagarutse mu buzima bahoranye bagakomeza akazi.

Ati “Buteera ni umukinnyi wa APR FC kandi tumaranye imyaka myinshi kuva bava mu gikombe cy’Isi cy’abari munsi y’imyaka 17 mu 2011. Muri bya bindi nababwiye bijya bituma dutandukana n’abakinnyi icy’uburwayi ntikirimo. Umurwayi turemera tukamurwaza ugeza aho akiriye, yaba agishoboye gukinira muri APR FC akayikinira yaba adashoboye akajya ahandi. Ni na ko Sugira twamurwaje umwaka wose yanavunikiye mu Ikipe y’Igihugu. Ntabwo dupfana ko umuntu ari muzima gusa.”

“Buteera rero arwaye nkuko na Blaise twamurwaje imyaka hafi ibiri, murabona ko ubu ari bwo atangiye kugaruka. Mu bo twasezereye Blaise yari kuba arimo ariko twasezereye abo tubona badafite ibyo bujuje ariko abarwayi bacu tukabagumana.”

Ubuyobozi bwa APR FC bwababajwe n’uruhuri rw’ibibazo bya Rayon Sports FC.

Abajijwe ku bihe bibi mukeba wabo, Rayon Sports FC arimo, Chairman w’iyi kipe y’Ingabo yavuze ko nta mukunzi w’umupira w’amaguru mu Rwanda wakwifuza kubona iyi kipe ikunzwe na benshi iguma mu bihe bibi nk’uko byagenze uyu mwaka. Ndetse yanavuze ko nk’Ubuyobozi bw’Ingabo hari ibyo bagiye bafasha Rayon Sports mu bihe byashize.

Ati “Nta mu-sportif wakwifuza gutakaza uwo bakabaye bahanganye. Uretse na Rayon Sports na Gicumbi FC na Heroes FC zari zaje mu cyiciro cya mbere zikamanuka kuri APR FC ni imbogamizi. Kuri twe ntabwo twakabaye dutakaza abo twatangiranye na bo gukina. Ariko kuri Rayon Sports byo birumvikana kereka ari bimwe byacyuye igihe byo kwishimira ko inzu y’umututanyi yahiye, ni ubuswa kuko umuturanyi ni umuturanyi.”

“Na Rayon Sports rero ni nk’uko tuyifata, itari muri shampiyona hari icyahungabana. N’ibyo bikombe 19 dufite Rayon na yo ifite ibyayo niba ari bitandatu, niba ari birindwi mu gihe izindi zifite nka bitatu. Murumva ko benda kutugwa mu ntege. Kandi muganiriye na bo kuko twe turi aba-sportif si rimwe, si kabiri ubuyobozi bwa RDF bwagiye bufatanya na Rayon Sports mu bituma yiyubaka. Ntabwo turigera tuba mu bashaka ko Rayon Sports isenyuka, ntabwo twatuma isenyuka kandi duhari.“

Amakuru avuga ko Visi Chairman wa APR FC, Brig. Gen. Firmin Bayingana ari we ugiye kugaragara cyane mu bikorwa by’iyi kipe y’Ingabo bitewe n’uko Chairman, Lt. Gen Mubarakah Muganga,umwanya we uzaba muto.

APR FC izahagarira u Rwanda mu mikino mpuzamahanga ya Afurika CAF Champions League ya 2021/22.

Visi Chairman wa APR FC, Brig. Gen. Firmin Bayingana mu mwaka utaha azagaragara cyane mu bikorwa bya APR FC
Nubwo Seifu ari umukinnyi mwiza ariko ngo yari kwirukanwa kubera imyitwarire yo gusohoka mu mwiherero adafite uruhushya
Sugira yakoze amakosa ahita atizwa Rayon Sports FC
Buteera Andrew aracyari umukinnyi wa APR FC kandi ntabwo yarozwe nk'uko byavuzwe
Ni umukinnyi uvugwaho imyitwarire myiza muri kipe y'Ingabo
Ubuyobozi bwa APR FC bwababajwe n'ibibazo Rayon Sports FC yahuye nabyo
Sugira Ernest ntabwo akiri umukinnyi wa APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .