Liverpool yegukanye UEFA Super Cup itsinze Chelsea mu mukino wasifuwe n’abagore

Yanditswe na Eric Tony Ukurikiyimfura
Kuya 15 Kanama 2019 saa 08:02
Yasuwe :
0 0

Liverpool yegukanye ku nshuro ya kane igikombe kiruta ibindi i Burayi ‘Super Cup’ nyuma yo gutsinda Chelsea kuri penaliti 5-4 ubwo amakipe yombi yanganyaga ibitego 2-2 mu mukino wabereye mu Mujyi wa Istanbul kuri uyu wa Gatatu.

Uyu mukino wahuje Liverpool yatwaye UEFA Champions League na Chelsea yegukanye Europa League ku mugabane w’u Burayi mu mwaka ushize w’imikino.

Amakipe yombi yagaragaje umukino urimo gusatirana cyane mu gice cya mbere, aho abarimo Mohamed Salah, Pedro Rodriguez, Fabinho na Olivier Giroud bagerageje uburyo bwashoboraga kuvamo ibitego hakiri kare.

Igice cya mbere cyarangiye Chelsea ifite igitego kimwe cyatsinzwe na Olivier Giroud ku munota wa 35, ku mupira yahawe na Christian Pulisic.

Chelsea yabonye uburyo bw’igitego cya kabiri nyuma y’iminota ine yakurikiyeho, ariko abasifuzi bayobowe na Stephanie Frappart wabaye umugore wa mbere usifuye imikino ikomeye i Burayi, bavuga ko habayeho kurarira.

Igice cya kabiri cyatangiranye impinduka ku ruhande rwa Liverpool, Alex Oxlade-Chamberlain asimburwa na Roberto Firmino ndetse izi mpinduka zihita zitanga umusaruro kuko uyu munya-Brésil yagize uruhare mu gitego cyo kwishyura cyatsinzwe na Sadio Mané ku munota wa 47.

Liverpool yahushije uburyo bwabazwe ku munota wa 74, ku mupira wa Mohamed Salah wakuwemo n’umunyezamu Kepa Arrizabalaga.

Habura iminota umunani ngo iminota isanzwe y’umukino irangire, Mason Mount yibwiraga ko atsindiye Chelsea igitego kiyihesha intsinzi, ariko umusifuzi avuga ko habayeho kurarira.

Mu minota 30 yongeweho, Liverpool yatsindiwe igitego cya kabiri na Sadio Mané ku munota wa 95, ku mupira wahinduwe na Roberto Firmino.

Ikosa umunyezamu wa Liverpool, Adrián yakoreye kuri Tammy Abraham ku munota wa 101, ni ryo ryavuyemo igitego cya Chelsea cyo kwishyura, cyatsinzwe na Jorginho kuri penaliti.

Iminota 120 yarangiye amakipe yombi anganya ibitego 2-2, hitabazwa penaliti maze Liverpool yegukana igikombe itsinze 5-4 nyuma y’uko Tammy Abraham ateye iya nyuma ya Chelsea igakurwamo na Adrián.

Olivier Giroud afungura amazamu ku ruhande rwa Chelsea
Sadio Mané yatsinze ibitego byombi byabonetse ku ruhande rwa Liverpool
Jorginho yishyurira Chelsea kuri penaliti
Umunyezamu wa kabiri wa Liverpool, Adrián akuramo penaliti yatewe na Tammy Abraham
Umukino wasifuwe n'abagore bayobowe n'Umufaransakazi Stephanie Frappart (hagati)
Liverpool yegukanye UEFA Super Cup ku nshuro ya kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza