Uyu mukino wabaye ku Cyumweru ku kibuga cya Anfield, aho Liverpool ikinira ndetse yari imaze igihe itahatsindirwa na Manchester City.

Iyi kipe yari mu rugo, yagize amahirwe mu gice cya mbere, Ilkay Gündoğan ahusha penaliti yo ku munota wa 37, ariko uyu Mudage yafunguye amazamu nyuma y’iminota ine amakipe yombi avuye kuruhuka.

Nubwo Mohamed Salah yishyuriye Liverpool kuri penaliti yakoreweho ku munota wa 63, amakosa y’umunyezamu Alisson Becker yahesheje Manchester City kubona ibindi bitego birimo icya Gündoğan ku munota wa 73, Raheem Sterling ku munota wa 76 na Phil Foden ku munota wa 83.

Iyi ntsinzi yatumye Manchester City igira amanota 50 mu mikino 22 imaze gukina, ifite ikirarane kimwe mu gihe irusha amanota atanu Manchester United ya kabiri, yo yanganyije na Everton ibitego 3-3 ku wa Gatandatu.

Mu yindi mikino yabaye, Tottenham yongeye kugaruka mu bihe byo gutsinda, ibona amanota atatu imbere ya West Brom ku bitego 2-0, Aston Villa itsinda Arsenal igitego 1-0 mu gihe Chelsea yatsinze Sheffield United ibitego 2-1.

Ilkay Gündoğan yatsinze ibitego bibiri nyuma yo guhusha penaliti

Liverpool yandagarijwe ku kibuga cyayo, ihatsindirwa ibitego 4-1

Umunyezamu Alisson Becker yakoze amakosa abiri akomeye yavuyemo ibitego

Manchester City ikomeje gusiga andi makipe muri Premier League

=======================================================

FC Barcelone yabonye intsinzi ku munota wa nyuma

FC Barcelone yaraye ibonye intsinzi igoranye y’ibitego 3-2 imbere ya Real Betis, igitego cy’intsinzi kiboneka ku munota wa 87 gitsinzwe na Trincão.

Lionel Messi winjiye asimbura mu gice cya kabiri, ni we wishyuriye Barcelone igitego yari yatsinzwe mu gice cya mbere mu gihe iyi kipe yafashe umwanya wa kabiri n’amanota 43 inganya na Real Madrid yatsinze SD Huesca ibitego 2-1 ku wa Gatandatu.

Atlético Madrid ifite amanota 50, ariko irushwa imikino ibiri n’amakipe ayikurikiye, irajya mu kibuga kuri uyu wa Mbere ihura na Celta Vigo saa yine z’ijoro.

FC Barcelone yatsinze Real Betis mu minota ya nyuma

=======================================================

Zlatan Ibrahimović yatsinze igitego cya 500 mu makipe

Mu mukino w’umunsi wa 21 wa Shampiyona y’Icyiciro cya Mbere mu Butaliyani (Serie A), Milan AC yanyagiye Crotone ibitego 4-0, isubira ku mwanya wa mbere n’amanota 49.

Rutahizamu wayo, Zlatan Ibrahimović w’imyaka 39, yatsinzemo ibitego bibiri byamufashije kuzuza ibitego 501 mu makipe yakiniye mu gihe ibindi bibiri byatsinzwe na Ante Rebić.

Inter Milan ni iya kabiri n’amanota 47 nyuma yo gutsinda Fiorentina ibitego 2-0 mu gihe Juventus yagize amanota 42 itsinze AS Roma ya kane ibitego 2-0 birimo igitego cya Cristiano Ronaldo n’ikindi cyitsinzwe na Roger Ibanez.

Zlatan Ibrahimović w’imyaka 39 yagejeje ibitego 501 mu makipe yakiniye

=======================================================

PSG yihimuye kuri Marseille igabanya ikinyuranyo irushwa na Lille

Mu mukino wari utegerejwe na benshi mu Bufaransa, Paris Saint-Germain yatsinze Marseille ibitego 2-0, igira amanota 51 ku mwanya wa gatatu, irushwa amanota atatu na Lille ya mbere, yo yatsinze Nante ibitego 2-0.

Kylian Mbappé na Mauro Icardi batsindiye PSG mu gice cya mbere mu gihe Marseille yashoje umukino ari abakinnyi 10 nyuma y’uko Dimitri Payet yahawe ikarita itukura ku munota wa 90.

Marseille imaze iminsi ititwara neza, yatojwe n’umutoza w’ikipe y’abato, Nasser Larguet, kuko André Villas-Boas yahagaritswe.

Kylian Mbappé yafashije PSG gutsinda Marseille ibitego 2-0 ku Cyumweru