Liverpool yagarutse, Cristiano Ronaldo mu mazi abira, umunyemari wa Chelsea na Usmanov basabiwe ibihano…agezweho mu mikino hanze

Yanditswe na Bukuru JC
Kuya 29 Mutarama 2021 saa 01:11
Yasuwe :
0 0

Nyuma yo kumara imikino itanu nta ntsinzi, Liverpool yagarutse mu bihe byayo, yihaniza Tottenham iyitsinda ibitego 3-1 mu mukino w’umunsi wa 20 wa Premier League wabaye ku wa Kane.

Mu mikino itanu Liverpool yari imaze idatsinda, ine muri iyo nta gitego yinjijemo.

Roberto Firmino, Trent Alexander-Anorld na Sadio Mané bayitsindiye ibitego byayifashije kugira amanota 37 ku mwanya wa kane muri Premier League, isigara irushwa amanota ane na Manchester City ya mbere, ariko yo ifite ikirarane izahuramo na Everton.

Tottenham yatsindiwe na Pierre-Emile Hojbjerg, yagize ibyago byo kuvunikisha rutahizamu Harry Kane ushobora kumara hanze ibyumweru bitari bike nyuma yo kuvunika utubombambari twombi.

Gusa, na Liverpool yongeye kuvunikisha myugariro Joel Matip, bikomeza imibare y’umutoza Jürgen Klopp umaze igihe adafite Virgil van Dijk mu gihe na Fabinho atakinnye uyu mukino wo ku wa Gatanu kubera imvune idakaganye.

Mu gice cya kabiri cy’uyu mukino, Liverpool yifashishije kapiteni Jordan Henderson na Nathaniel Phillips mu mutima w’ubwugarizi.

Liverpool yongeye kubona intsinzi nyuma yo kumara imikino itanu idatsinda
Sadio Mané yafashije cyane Liverpool mu mukino yatsinzemo Tottenham ku wa Kane

======================================================

Cristiano Ronaldo yakozweho iperereza hamwe n’umukunzi we

Rutahizamu wa Juventus, Cristiano Ronaldo, akurikiranyweho na polisi y’u Butaliyani kurenga ku mabwiriza yo kwirinda COVID-19 ubwo yitabiraga isabukuru y’amavuko y’umugore we, Georgina Rodriguez, ku wa Gatatu.

Ashinjwa ko ibyo yabikoze ubwo yerekeza mu duce twa Piedmont na Valle d’Aosta, kandi bitemewe muri ibi bihe u Butaliyani buri kugira impfu nyinshi n’ubwandu bwa COVID-19 buri hejuru.

Cristiano Ronado na Georgina Rodriguez wujuje imyaka 27 ku wa Gatatu, bakurikiranyweho kurenga ku mabwiriza ya guverinoma y’u Butaliyani, aho bagiye kwizihiza isabukuru y’amavuko y’uyu mugore kuri hoteli ya Courmayeur.

Ibinyamakuru byo mu Butaliyani bivuga ko abo bombi bagiye ku wa Kabiri, bakararayo, mbere yo gusubira i Turin, aho Ronaldo atuye, ku wa Gatatu.

Rodriguez usanzwe ari umunyamideli, yasangije ifoto ari kuri Instagram akurikirwaho n’abantu miliyoni 23, ari kumwe n’umukunzi be bishimana n’umuryango wabo mu rugo.

Nibiramuka bigaragaye ko barenze ku mabwiriza, buri umwe azacibwa amande.

Ibi bije nyuma y’amezi make Ronaldo yanduye COVID-19 ndetse icyo gihe yanenzwe na Minisitiri wa Siporo mu Butaliyani, Vincenzo Spadafora, ko yagiye muri Portugal gukina imikino mpuzamahanga bitari ngombwa nubwo we yavuze ko nta kibi yakoze.

Cristiano Ronaldo n'umukunzi we bakurikiranyweho kurenga ku mabwiriza yo kwirinda COVID-19

=======================================================

Umunyemari wa Chelsea na Usmanov wahoze muri Arsenal basabiwe ibihano

Guverinoma y’Ubwami bw’u Bwongereza yashyizweho igitutu n’abadepite batari abo mu ishyaka riyoboye, basabye ko ifatira ibihano abanyemari babiri b’Abarusiya bafite aho bahuriye n’amakipe y’umupira w’amaguru mu Bwongereza.

Ibi byatewe n’uko u Burusiya buherutse gufunga Alexei Navalny utavuga rumwe na bwo, byatumye nyiri Chelsea, Roman Abramovich na Alisher Usmanov ufite kompanyi itera inkunga Everton, basabirwa ibihano.

Guverinoma y’u Bwongereza yaherukaga kuvuga ko iri “kwiga uburyo hari icyo yabikoraho.”

Navalny yafunzwe kuva ku wa 17 Mutarama 2021 nyuma yo gusubira i Moscow ku nshuro ya mbere kuva ubwo yahabwaga uburozi mu mwaka ushize. Ubwami bw’u Bwongereza bwagiriye inama u Burusiya ko bukwiye kumurekura.

Uyu mugabo yavugaga ko intasi z’u Burusiya zashatse kumwica, ariko ubutegetsi bw’icyo gihugu bubitera utwatsi.

Abo ku ruhande rwa Navalny bashyize hanze urutonde rw’abantu umunani bagakwiye gufatirwa ibihano mu rwego rwo gushyira igitutu kuri Perezida Putin kuko bari mu bakorana na we bya hafi.

Roman Abramovich waguze Chelsea mu 2003 na Usmanov ufite kompanyi itera inkunga Everton ndetse agakorana hafi n’abanyamigabane bayo, bombi bari kuri urwo rutonde, aho bagaragajwe nk’abungukira cyane mu bikorwa bya Leta y’u Burusiya mu Burengerazuba.

Umudepite Margaret Hodge yagize ati “uburyo bwiza twakwerekanamo ko dushyigikiye Alexei Navalny ntabwo ari amagambo, ahubwo ni ibikorwa.”

“Navalny ubwe yavuze ko ashaka ko imiryango mpuzamahanga ishyiraho ibihano ku bakorana b’ubutegetsi bw’u Burusiya baba hanze yabwo.”

“Yavuzemo Abramovich na Usmanov, bombi bafite imitungo ndetse bafite aho bahuriye n’umupira w’amaguru w’u Bwongereza.”

“Ariko kuri Facebook, Navalny yavuze ko ibyo bihano bitashyizweho, kuko ibihugu byo mu Burengerazuba byanze guhana abantu bafite amafaranga.”

Abajijwe kugira icyo abivugaho, umuvugizi wa Abramovich, yavuze ko ibyatangajwe na Navalny bidafite ishingiro mu gihe abahagariye Usmanov banze kugira icyo babivugaho.

Nyiri Chelsea, Roman Abramovich, yasabiwe ibihano kubera ko akorana na Leta y'u Burusiya biturutse ku kibazo cya Alexei Navalny
Alisher Usmanov ufite kompanyi itera inkunga Everton, na we ashobora gufatirwa ibihano

======================================================

Euro 2020 ishobora kubera mu bihugu bine

Impuzamashyirahamwe y’Umupira w’Amaguru i Burayi, UEFA, iri kwiga uburyo Igikombe cya 2020 cyabera mu bihugu bine, aho kuba 12 kubera icyorezo cya COVID-19 kubera ko ingendo z’indege zigoranye hamwe na hamwe.

Mu bihugu bivugwa kuri ubu ko ari byo byakwakira iri rushanwa rihuza amakipe y’ibihugu i Burayi harimo u Bwongereza, Portugal, u Budage n’u Burusiya,

Ku wa Gatatu, Perezida wa UEFA, Aleksander Čeferin, yavuze ko bagihagaze ku kuba ibihugu 12 ari byo bizakinirwamo iri rushanwa ryari kuba mu 2020 ndetse amatariki yo kwemeza niba byiteguye yigijwe inyuma kugeza muri Mata.

Byarashobokaga ko u Bwongereza bwahabwa kwakira iri rushanwa bwonyine kuko ari cyo gihugu kiri imbere y’ibindi mu gukingira COVID-19, ariko UEFA ishaka ko ryabera mu bihugu byinshi mu rwego rwo kugabanya umutwaro ku gihugu kimwe.

Euro 2020 izitabirwa n’amakipe 24, izaba guhera tariki ya 11 Kamena kugeza ku ya 11 Nyakanga 2021.

Perezida wa UEFA, Aleksander Čeferin, yavuze ko bagifite icyizere ko Euro 2020 izabera mu bihugu 12

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .