00:00:00 IGIHE NETWORK KN KINYARWANDA EN ENGLISH FR FRANCAIS

Liverpool na Juventus zamwenyuye nyuma, Lille itwara PSG igikombe- Uko Shampiyona z’i Burayi zasojwe

Yanditswe na Eric Tony Ukurikiyimfura
Kuya 24 Gicurasi 2021 saa 09:35
Yasuwe :
0 0

Impera z’icyumweru twasoje zasize shampiyona eshanu zikomeye mu mupira w’amaguru i Burayi zishyizweho akadomo, aho amakipe ya Liverpool na Juventus yabonye itike yo gukina UEFA Champions League ku munsi wa nyuma, naho Lille yegukana igikombe cya Ligue 1 mu Bufaransa.

Uretse muri Espagne, aho ibyaho byasobanutse ku wa Gatandatu ubwo Atlético Madrid yatwaraga Shampiyona yaherukaga mu 2014 no mu Budage, aho Bayern Munich yatwaye igikombe cya cyenda yikurikiranya, mu bindi bihugu hari byinshi byo kwitegura mu mpera z’icyumweru twasoje.

Premier League: Liverpool yisanze muri Big 4 ku munsi wa nyuma

Nyuma yo kugira umwaka mubi w’imikino waranzwe n’imvune nyinshi cyane ku bakinnyi bakina inyuma n’umunyezamu Alisson Becker, Liverpool yasoreje ku mwanya wa gatatu muri Premier League nyuma yo gutsinda Crystal Palace ibitego 2-0, byombi byinjijwe na Sadio Mané.

Liverpool yinjiye mu makipe ane (Big 4) akina Champions League mu Bwongereza, isanzemo Manchester City yatwaye igikombe, Manchester United yabaye iya kabiri na Chelsea yabaye iya kane nubwo yatsinzwe na Aston Villa ibitego 2-1.

Leicester City na West Ham ni yo makipe azakina Europa League mu gihe Arsenal yasoreje ku mwanya wa munani naho Tottenham iba iya karindwi (izakina amajonjora ya European Conference League).

Amakipe atatu yamanutse ni Fulham, West Bromwich Albion na Sheffield United.

Sadio Mané yatsinze ibitego bibiri byafashije Liverpool gutsinda Crystal Palace ku Cyumweru
Liverpool yasoreje mu makipe ane ya mbere muri Premier League ku munsi wa nyuma
Manchester City yashyikirijwe igikombe cya gatanu cya Premier League yegukanye

Serie A: Juventus na yo yamwenyuye ku munota wa nyuma

Mu gihe na yo byari byitezwe ko ishobora kwisanga muri Europa League mu mwaka utaha w’imikino, kunanirwa gutsinda kwa Napoli yanganyije na Hellas Verona igitego 1-1, byahaye amahirwe amakipe ya Milan AC na Juventus.

Milan AC yabaye iya kabiri inyuma ya Inter Milan yatwaye igikombe, ni nyuma y’uko yatsinze Atalanta ya gatatu ibitego 2-0 mu gihe Juventus yabaye iya kane nyuma yo kunyagira Bologna ibitego 4-1 ku Cyumweru.

Federico Chiesa, Alvaro Morata watsinze ibitego bibiri na Adrien Rabiot ni bo batsindiye Juventus mu gihe igitego rukumbi cya Bologna cyinjijwe na Riccaldo Orsolini mu minota ya nyuma.

Amakipe atatu yamanutse mu Butaliyani ni Benevento, Crotone na Parma.

Juventus yisanze mu makipe azakina UEFA Champions League ku munsi wa nyuma

Lille yigaranzuye ubwami bwa PSG yari imyaka irindwi itwara Shampiyona ya Ligue 1

Lille ni yo yegukanye igikombe cya Shampiyona y’Icyiciro cya Mbere mu Bufaransa (Ligue 1), nyuma yo gutsinda Angers ibitego 2-1 byinjijwe na Jonathan David na Burak Yilmaz.

Angelo Fulgini yatsinze impozamarira ku ruhande rwa Angers mu minota ya nyuma y’umukino.

Lille yegukanye igikombe cya kane cya Ligue 1 irusha inota rimwe PSG yabaye iya kabiri nyuma yo gutsinda ibitego 2-0.

AS Monaco yanganyije na Lens ubusa ku busa, yabonye itike yo gukina UEFA Champions League nyuma y’uko Lyon yatsinzwe na Nice ibitego 3-2, yo ikazakina Europa League.

Marseille na Rennes zizakina mu irushanwa rishya rya European Conference League.

Amakipe atatu yamanutse ni Nantes, Nîmes na Dijon.

Muri Ligue 1 y’uyu mwaka, rutahizamu wa PSG, Kylian Mpabbé, yongeye guhembwa nk’umukinnyi witwaye neza.

Bulak Yilmaz ari mu bafashije cyane Lille muri uyu mwaka w'imikino
Lille yegukanye igikombe cya Ligue 1 ku nshuro ya kane

Bundesliga: Robert Lewandowski yakuyeho agahigo kari kamaze imyaka igera kuri 50

Rutahizamu wa Bayern Munich, Robert Lewandowski, yatsinze igitego kimwe muri 5-2 ikipe ye yatsinze Augsburg ku wa Gatandatu.

Icyo gitego cyabonetse ku munota wa 90, cyamufashije gusoza umwaka w’imikino afite ibitego 41, akuraho agahigo ka Gerd Müller watsinze ibitego 40 mu myaka 49 ishize.

Uyu mukinnyi w’umunya-Pologne yasoje umwaka w’imikino atsinze ibitego 53 mu mikino 46 yakiniyemo Bayern Munich n’igihugu cye mbere yo kujya muri EURO 2020.

Bayern Munich ni yo yegukanye Shampiyona y’uyu mwaka mu Budage, ku nshuro ya cyenda yikurikiranya, ikurikirwa na RB Leipzig, Borussia Dortmund na Wolfsburg nk’andi makipe azakina UEFA Champions League.

Amakipe atatu yamanutse mu Budage ni Werder Bremen, Chalke 0’4 na FC Köln izaca mu mikino ya play-offs.

Umutoza Hansi Flick wahawe akazi mu Ugushyingo 2019, yasezeye kuri iyi kipe kimwe n’abandi bakinnyi barimo David Alaba na Javi Martinez bagiye gusoza amasezerano.

Robert Lewandowski yasoje umwaka w'imikino wa Bundesliga atsinze ibitego 41
Agahigo Lewandowski yakuyeho, kari karashyizweho na Gerd Müller mu myaka 49 ishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .