Linafoot-Igitego cya Sugira Ernest cyashyize Vita Club ku mwanya wa mbere

Yanditswe na Jah d’eau Dukuze
Kuya 3 Ukwakira 2016 saa 06:53
Yasuwe :
0 0

Igitego rukumbi cy’Umunyarwanda Sugira Ernest ni cyo cyabonetse mu mukino ikipe ya Vita Club yatsinzemo AS Dragons ku munsi wa kabiri wa shampiyona y’icyiciro cya mbere muri Congo Kinshasa.

Uyu mukino wabaye kuri iki Cyumweru kuri Stade des Martyrs, ikipe ya Vita Club yawujyanyemo icyizere nyuma yaho kuwa gatatu w’iki cyumweru, n’ubundi yari yashoboye gutsinda FC MK ibitego 3-0 ku mukino ufungura shampiyona.

Iyi kipe y’umutoza Florent Ibenge yinjiye mu mukino neza, ubwo ku munota wa cyenda gusa Sugira Ernest yatsindaga igitego, bikaza no kurangira ari cyo cyonyine gitsinzwe muri uwo mukino AS Dragons na yo yabonyemo amahirwe menshi yo kwishyura.

Iki cyari igitego cya kabiri Sugira Ernest atsindiye Vita Club muri shampiyona, nyuma yo gutsinda igitego cya kabiri mu mukino batsinzemo MK 3-0, igitego yatsinze agiye mu kibuga asimbuye Birori Daddy.

Sugira Ernest watanzweho arenga miliyoni 100 ubwo Vita Club yari imukuye muri AS Kigali, yitezweho byinshi muri iyi kipe batazira “Dauphins Noirs” ndetse abafana bayo benshi ntabwo bari bishimiye uburyo yitwaye mu mikino ya AS Kigali.

Abafana ba Vita batangiye gusogongera ku buryohe bw'ibyo bashoye muri Sugira

Intsinzi ebyiri mu minsi ibiri ya shampiyona, zashyize Vita Club ku mwanya wa mbere ku rutonde rw’agateganyo rwa shampiyona y’icyiciro cya mbere muri Congo ni mu gace k’Uburengerazuba (Zone Ouest), Agace Vita Club ya Sugira iherereyemo yo na DCMP, Shark Club XI F.C, R.C.K, M.K, Dragons-Bilima, Rojolu, Veti Club, Ndombe na Renaissance du Congo.

Umwaka wa shampiyona muri Congo ukinirwa mu ma zone atatu aho zone ebyiri ziba zifite amakipe 10 mu itsinda mu gihe zone ya gatatu iba ifitemo amakipe umunani. Nyuma y’imikino ibanza n’iyo kwishyura, amakipe atatu ya mbere yo mu duce dufite amakipe 10, ndetse n’amakipe abiri ya mbere yo mu gace gafite amakipe umunani, ahita akomereza mu cyiciro cya nyuma cy’amakipe umunani.

Aya makipe umunani aba yarokotse muri 28, na yo aza guhura hagati yayo hakinwa imikino ibanza n’iyo kwishyura maze ikipe irushije izindi amanota ikegukana igikombe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244