LDK na APE Rugunga zageze ku mukino wa nyuma w’irushanwa ryateguwe na RRA

Yanditswe na Eric Tony Ukurikiyimfura
Kuya 31 Ukwakira 2019 saa 09:14
Yasuwe :
0 0

Amakipe ya Lycée de Kigali na APE Rugunga ni yo yatsindiye kugera ku mukino wa nyuma w’Irushanwa ry’Umupira w’amaguru ryateguwe n’Ikigo cy’Imisoro n’Amahoro (RRA) ku bufatanye na Minisiteri y’Uburezi (MINEDUC).

Iri rushanwa riri mu rwego rw’ibikorwa RRA itegura mu kwezi kwo gushimira Abasora, aho rigamije kuzamura imyumvire mu rubyiruko ku bijyanye no gusora, umusoro n’akamaro kawo ndetse no kujya rwibuka kwaka inyemezabuguzi za EBM.

Iyi mikino kandi igaragaza impano z’urubyiruko mu mukino w’amaguru kugira ngo zibyazwe umusaruro, aho imwe mu ntego RRA yihaye ari ugufasha Urubyiruko kubaho mu gihugu giteye imbere kubera imisoro kandi impano zarwo mu mupira w’amaguru ruzibyaze umusaruro.

Kuri uyu wa Gatatu ni bwo habaye imikino ya ½ cy’iri rushanwa ryatangiye ku wa Kabiri, rikitabirwa n’amakipe y’ibigo by’amashuri icyenda biri muri League Centre I igizwe n’uturere twa Nyarugenge, Kicukiro, Gasabo, Gicumbi na Bugesera.

Mu mukino wabereye ku kibuga cya Camp Kigali, APE Rugunga yatsindiye kugera ku mukino wa nyuma, itsinze APAER igitego 1-0 cyatsinzwe na Hirwa Jean de Dieu mu gice cya kabiri nyuma y’uko amakipe yombi yari yagiye kuruhuka anganya ubusa ku busa.

Uyu mukino wakinwe iminota 35 muri buri gice bitewe n’imvura nyinshi yaguye mu Mujyi wa Kigali.

Kapiteni wa APE Rugunga, Uwimana Emmanuel yabwiye IGIHE ko bashimishijwe no kugera ku mukino wa nyuma, avuga ko bagiye kwitegura neza ku buryo bazegukana iri rushanwa ryeguwe na RRA.

Ati” Turishimye cyane. Twaje dushaka intsinzi, kuva ku mukino wa mbere kugeza ku wa nyuma Imana ibidufashijemo ni iby’agaciro kuba abayobozi batubaye hafi tukagera ku mukino wa nyuma. Tugiye kwitegura neza umukino wa nyuma kugira ngo tuzatware iri rushanwa.”

Uwimana yavuze ko nk’urubyiruko, bumva akamaro ko kwaka inyemezabuguzi ya EBM kuko umusoro utangwa n’ababyeyi babo.

Ati” Barabidusobanuriye ko ari imisoro ituruka ku babyeyi bacu kandi natwe twishimiye ko hari uruhare tugiye kubigiramo kugira ngo ubu butumwa bugere kuri benshi.”

Undi mukino wa ½ wabaye, wasize Lycée de Kigali izahura na APE Rugunga ku mukino wa nyuma, ni nyuma y’uko itsinze Camp Kigali School ibitego 4-1.

Umukino w’umwanya wa gatatu uzakinwa kuri uyu wa Gatanu saa 08:30 ku kibuga cya IPRC- Kicukiro mu gihe umwanya wa nyuma uzakinirwa saa 10:00. Amakipe yose yitabiriye iri rushanwa uko ari icyenda azagenerwa ibihembo na RRA.

Iri rushanwa ryateguwe na RRA rirasozwa kuri uyu wa Gatanu
Lycée de Kigali izahura na APE Rugunga ku mukino wa nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza