00:00:00 IGIHE NETWORK KN KINYARWANDA EN ENGLISH FR FRANCAIS

La Jeunesse FC yagarukanye intego nshya

Yanditswe na IGIHE
Kuya 29 Kanama 2021 saa 02:18
Yasuwe :
0 0

Nyuma y’umwaka umwe idakina amarushanwa ya FERWAFA, La Jeunesse FC yongeye kugarukana intego yahoranye zo gufasha abakinnyi bakiri bato no guhatana.

Nyuma y’aho FERWAFA itangarije amatariki Shampiyona y’Icyiciro cya Kabiri, amakipe akomeje imyiteguro y’umwaka w’imikino 2020/21.

Imwe mu makipe azakina iyi shampiyona izaba hagati ya tariki ya 18 Nzeri n’iya 11 Ukwakira 2021, ni La Jeunesse FC yazamukiyemo abakinnyi bazwi nka Mugiraneza Jean Baptiste n’abandi.

Iyi kipe yari imaze umwaka idakina amarushanwa y’Ishyirahamwe ry’Umupira w’Amaguru mu Rwanda, FERWAFA, kubera ibibazo by’amikoro byayigoye.

Umutoza mukuru wayo, Rudasingwa Florian uzwi nka Freury, aganira na IGIHE, yahamije ko iyi kipe igarukanye intego nshya zirimo kongera gufasha abana b’Abanyarwanda bikajyana no guhatana nk‘uko byahoze.

Ati “Nubwo twari tumaze umwaka tudakina, ariko ntabwo ikipe yagiye, irahari. Intego tugarukanye ni ukongera gufasha abana b’Abanyarwanda nk‘uko byahoze.“

“Gusa nanone ntabwo tuje kureberera abandi, ahubwo tuje guhangana tukongera kwibutsa abantu ko La Jeunesse FC ihari.“

Iyi kipe yashinzwe mu 1998 ariko igera mu Cyiciro cya mbere mu mwaka w’imikno wa 2004/05.

Mu myaka ine yamaze mu Cyiciro cya mbere, yagiye itsinda amakipe y’ibigugu mu Rwanda nka APR FC, Rayon Sports, Kiyovu Sports n’izindi.

Mu 2009, yamanutse mu Cyiciro cya Kabiri ariko ntiyatindayo kuko mu 2010 yahise yongera kuzamuka.

Mu 2013, yikuye muri shampiyona kubera ibibazo by’amikoro kuko Sosiyete ya Tinco yayiteraga inkunga, yari ikuyemo akayo karenge maze abari abayobozi batangaza ko umwaka wakurikiyeho (2014) batazakina mu Cyiciro cya Mbere.

Mu batoza batoje La Jeunesse FC harimo Rwasamanzi Yves wayikiniye akayitoza kugeza ayizamuye mu Cyiciro cya Mbere, Okoko Godfroid, Muhamed Godard na Ruremesha Emmanuel.

Bamwe mu bakinnyi bazwi mu Rwanda bakiniye iyi kipe, ni Mugiraneza Jean Baptise uzwi nka Miggy, Rubangura Omar uri mu bayizamuye, Uwimana Jean d‘Amour, Rwaka Claude n’abandi.

La Jeunesse itarakinnye umwaka uheruka w'imikino mu Cyiciro cya Kabiri, yagarukanye intego zo gufasha abakinnyi bakiri bato no guhatana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .