Kwizera Olivier yashyizeho inyogosho idasanzwe yiha n’intego nshya nyuma yo kuva muri APR FC

Yanditswe na Ishimwe Israel
Kuya 29 Nzeri 2016 saa 08:01
Yasuwe : XX
136 71

Umuzamu wahoze ari nimero ya mbere muri APR FC, Kwizera Olivier ubu akaba yaramaze kwerekeza muri Bugesera FC , yatangaje ko aya makipe yombi ari ku rwego rutandukanye ndetse intego atangirana shampiyona zihabanye kuko imwe iba ishaka ibikombe indi ishaka kurangiza ku mwanya mwiza.

Kwizera Olivier wahise ahindura inyogosho yari asanzwe amenyereweho akiri muri APR FC, kuri uyu wa Gatatu yafashije ikipe ye nshya ya Bugesera FC kunganya na AS Kigali mu mukino wa gicuti utegura shampiyona y’umwaka utaha iteganyijwe gutangira tariki 14 Ukwakira.

Uyu mukinnyi wafashije ikipe y’Ingabo z’igihugu kwegukana ibikombe bibiri bya shampiyona biheruka, ntabibona nko gusubira inyuma kuba yaravuye mu ikipe ya mbere mu gihugu akajya mu yindi itanahanganira ibikombe ahubwo iba ishaka imyanya myiza.

Kwizera Olivier yatangarije IGIHE ko agiye gukora cyane kandi yizeye ko mu gihe gito azafasha ikipe ye nshya kugera ku rwego rwo gushaka ibikombe.

Yagize ati “Ni ikipe nshya, turimo gukora cyane kugira ngo tumenyane ndetse duhuze umukino. APR FC na Bugesera FC ni amakipe atandukanye, imwe iba ishaka ibikombe indi ishaka umwanya mwiza, tugomba gukora cyane natwe tugere kuri urwo rwego.”

Kwizera wageze ikirenge mu cya bagenzi be batandukanye bavuye muri APR FC uyu mwaka aho bagiye bakabanza guhindura imisatsi n’inyogosho, yavuze ko yabikoze kugira ngo agaragare bitandukanye n’uko yari ameze ku buryo n’abamubona babona impinduka.

Kuri gahunda yari afite yo kujya gukina hanze, Kwizera wari wamaze kumvikana n’ikipe ya Maritzburg United FC yo muri Afurika y’Epfo akaza kubura ibyangombwa, avuga ko yakomeje gushaka uko yabibona bitewe n’uko inzozi zo kujya hanze zitarangiranye no kujya muri Bugesera FC.

Kwizera Olivier ashimangira ko intego za APR FC na Bugesera FC zitandukanye cyane
Kwizera yiteguye gufasha Bugesera FC gutangira guhatanira ibikombe
Umukino wahuje AS Kigali na Bugesera FC wari uryoheye ijisho
Eric Nshimiyimana utoza AS Kigali(iburyo) na Mashami Vincent wa Bugesera FC bananiwe kwisobanura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE