Ubu nta mutoza Amavubi akeneye - De Gaulle

Yanditswe na Uwishyaka Jean Louis
Kuya 26 Ukwakira 2016 saa 09:46
Yasuwe :
0 0

Umuyobozi w’Ishyirahamwe ry’umupira w’amaguru mu Rwanda, Ferwafa, Nzamwita Vincent de Gaulle, yatangaje ko kuba nta marushanwa Amavubi ateganya kwitabira mbere ya Kamena 2017, nta mpamvu yo kuzana umutoza mukuru kuko byaba ari ugutakaza amafaranga y’ubusa.

Nyuma yo gusezererwa mu majonjora yo guhatanira itike y’igikombe cy’Isi cya 2018, ntihaboneke n’iyo kwitabira igikombe cya Afurika cya 2017 kizabera muri Gabon, Amavubi azongera kugaragara ku ruhando mpuzamahanga muri Kamena umwaka utaha ubwo hazaba hatangiye amarushanwa yo gushaka itike y’igikombe cya Afurika cy’abakina imbere mu bihugu, CHAN, cya 2018.

Umuyobozi wa Ferwafa aganira na The New Times, yatangaje ko umutoza w’Amavubi azashyirwaho nibura muri Gicurasi 2017 kuko mbere yaho ntacyo yaba aje gukora.

Ati “Kuzana umutoza mukuru mushya bitwara amafaranga, kandi twasezerewe mu gushaka itike y’igikombe cy’Isi cya 2018 n’icya Afurika cya 2017, nta mutoza mukuru dukeneye muri iki gihe.”

“Ayo mafaranga dushobora kuyazigama ahubwo tugakoresha ibishoboka byose muri Gicurasi 2017 tukaba twamaze kubona umutoza ukwiye wo gutegura CHAN 2018. Ibi nibyo byaba byiza kandi bigatwara n’amafaranga akwiye.”

Yakomeje agira ati “Ndizera ko amezi abiri mbere ya CHAN 2018 ahagije ku mutoza mushya kuba amaze gutoranya abakinnyi, gutegura imikino ya gishuti n’umwiherero. Niyo mpamvu kuri ubu nta mutoza dukeneye.”

Mu minsi ishize Nzamwita yari yatangaje ko Ferwafa iri gukorana na DFB, Ishyirahamwe ry’umupira w’amaguru mu Budage kugira ngo ribafashe kubona umutoza wazaza gusimbura Jonathan Mckinstry wirukanwe muri Kanama uyu mwaka nyuma y’umusaruro mubi w’ikipe y’igihugu.

Nzamwita yatangaje ko nubwo nta mikino ya gishuti yamaze gutegurwa ku Mavubi, ariko biramutse bibayeho ko hari ikinwa mbere ya Gicurasi 2017, ngo hakitabazwa abatoza bo mu gihugu imbere nk’uko byakozwe ubwo Jimmy Mulisa yahabwaga inshingano zo kujyana iyi kipe muri Ghana mu mikino y’amajonjora y’igikombe cya Afurika cya 2017, akananganyirizayo igitego 1-1.

McKinstry yirukanywe muri Nyakanga ikipe y’u Rwanda iri ku mwanya wa 121 ku rutonde ngarukakwezi rwa FIFA, ariko kuri ubu ihagaze ku mwanya wa 107 ku Isi n’uwa 32 muri Afurika nkuko uru rutonde rwa Nzeri rubigaragaza.

Nzamwita avuga ko kuba nta marushanwa u Rwanda ruteganya gukina vuba nta mpamvu yo kuzana umutoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza