Kuryama byaranze: Tuyisenge Jacques yakomoje ku ijoro yavunikiyemo muri CHAN 2020

Yanditswe na Eric Tony Ukurikiyimfura
Kuya 5 Gashyantare 2021 saa 01:34
Yasuwe :
0 0

Kapiteni w’Ikipe y’Igihugu ‘Amavubi’, Tuyisenge Jacques, yavuze ko mu ijoro yavunikiyemo ubwo u Rwanda rwakinaga na Guinea muri CHAN 2020, yabuze ibitotsi kubera ububabare yagize.

Tuyisenge yavuye mu kibuga ku munota wa 15 w’umukino nyuma yo gukinirwa nabi n’Umunya-Guinea, Mory Kanté, wahawe ikarita itukura nyuma yo kwifashisha ikoranabuhanga ry’amashusho ryifashishwa mu misifurire [VAR]. Yahise asimbuzwa Sugira Ernest.

Umuganga w’Ikipe y’Igihugu, Dr Rutamu Patrick, aherutse kwemeza ko uyu mukinnyi w’Amavubi azamara hanze hagati y’ibyumweru bine na bitandatu kubera iyi mvune yo mu ivi, aho umukaya w’aho ivi rihurira wacitse ku rwego rwa kabiri.

Mu kiganiro yagiranye n’urubuga rwa internet rwa APR FC, Tuyisenge Jacques yavuze ko atorohewe n’ijoro ryo ku wa 31 Mutarama kubera ububabare yagize.

Ati “Ngisohoka mu kibuga ntabwo nabashaga gukandagira ku buryo n’iryo joro nyuma y’umukino kuryama byaranze kubera ububabare bwinshi nari mfite, ariko ubu bwaragabanutse ndumva ndi koroherwa.”

Tuyisenge Jacques yagize uruhare rukomeye mu mukino u Rwanda rwatsinzemo Togo ibitego 3-2, aho yatsinze kimwe muri ibyo bitego, rubona itike yo gukomeza muri ¼.

Nyuma y’uko u Rwanda rusezerewe muri CHAN 2020, ruzakurikizaho imikino ibiri isoza iyo mu itsinda F ryo gushaka itike y’Igikombe cya Afurika cya 2021 ruzahuramo na Cameroun na Cap-Vert muri Werurwe.

Tuyisenge Jacques yavuze ko yagize ububabare bwatumye adasinzira nyuma yo kuvunikira mu mukino w'u Rwanda na Guinea
Tuyisenge Jacques yakinnye iminota 15 gusa mbere yo kuvunika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .