Kuki amakipe y’ibihugu ari kurwanya Qatar izakira Igikombe cy’Isi mu 2022?

Yanditswe na Eric Tony Ukurikiyimfura
Kuya 3 Mata 2021 saa 03:20
Yasuwe :
0 0

Mu mikino mpuzamahanga yabaye muri Werurwe, cyane mu Burayi, ibihugu birimo u Budage na Norvège byagaragaje ko bidashyigikiye ko Qatar izakira Igikombe cy’Isi cya 2022 kuko itubahiriza uburenganzira bw’ikiremwamuntu.

Mu 2010 ni bwo Ishyirahame ry’Umupira w’Amaguru ku Isi, FIFA, ryemeje ko Qatar izakira Igikombe cy’Isi cya 2022, aho yatsinze Leta Zunze Ubumwe za Amerika, Koreya y’Epfo, u Buyapani na Australia.

Muri icyo gihe, hibazwaga uburyo igihugu kidafite ibigwi kandi kitazwi muri siporo kigiye kwakira irushanwa rya mbere rikomeye kandi rikurikirwa na benshi mu mupira w’amaguru.

Kuba Qatar itamenyereye ibijyanye na ruhago byatumye yubaka stade umunani zizakinirwa Igikombe cy’Isi mu 2022, mu gihe imikino ya nyuma yari imenyerewe gukinwa mu mpeshyi, yimuriwe mu mpera z’umwaka (hagati ya Ugushyingo na Ukuboza) mu rwego rwo kwirinda ubushyuhe bwaho bukabije buba buhari hagati ya Kamena, Nyakanga na Kanama.

Kubera iki imyigaragambyo ije ubu?

Raporo yagaragajwe na The Guardian ku wa 23 Gashyantare yerekana ko kuva Qatar yemerewe kwakira Igikombe cy’Isi mu 2010, abimukira basaga 6500 bamaze gupfira muri icyo gihugu bitewe n’ubushyuhe bwaho, imirimo bakora n’imibereho babamo.

Iyo yaporo yakiriwe bitandukanye mu bihugu byinshi. Muri Norvège, amakipe arimo Tromso yasabye Ishyirahamwe ryaho rya ruhago kutitabira Igikombe cy’Isi mu 2022.

Mu kwezi gushize kwa Werurwe, ikipe y’Igihugu ya Norvège yabaye iya mbere yagaragaje ko idashyigikiye ibiri kubera muri Qatar, ku mipira yihariye abakinnyi bari bambaye mbere yo gukina na Gibraltar, hari handitseho amagambo ashishikariza kubaha “Uburenganzira bwa muntu mu kibuga no hanze yacyo”.

U Budage na bwo bwateye ikirenge muri cya Norvège mbere y’uko bukina na Iceland, buri mukinnyi yambaye umupira ufite imwe mu nyuguti zigize ijambo “Human rights”.

Abakinnyi babiri ba Bayern Munich, Joshua Kimmich na Leon Goretzka, batanze amafaranga menshi yo gufasa abantu mu bihe bya COVID-19, bari mu bavuze kuri iki Gikombe cy’Isi.

Kimmich aherutse kubwira ikinyamakuru L’Equipe ko bakabaye baranze kuzitabira iki Gikombe cy’Isi mu myaka 10 ishize.

Ati “Ntabwo hemejwe aho kizabera uyu mwaka, ariko ni mu myaka ishize. Twakabaye twaratekereje kutakitabira icyo gihe. Ubu icyo twakora ni ugukoresha umwanya dufite mu kugaragaza ibiri kuba. Si ibyacu gusa nk’abakinnyi, ahubwo tugomba gufatanyiriza hamwe.”

Goretzka yongeyeho ati “Twashakaga kugaragaza ko tutabyirengagije. Ijwi ryacu rigera kure, tugomba kurikoresha tugatanga urugero ku ndangagaciro dushaka guharanira.”

Ishyirahamwe ry’Umupira w’Amaguru mu Budage ntiryiteguye kureka ibyo kwitabira Igikombe cy’Isi cya 2022, mu gihe irya Norvège ritarabifataho umwanzuro.

Norvège yasabye ibindi bihugu gutera ikirenge mu cyayo n’u Budage, ndetse byakozwe n’u Buholandi bwagaragaje ko umupira w’amaguru ushyigikiye impinduka, mbere y’umukino bwahuyemo na Latvia.

Ikipe y’Igihugu ya Denmark na yo yambaye imyambaro iriho amagambo nk’ayo mbere yo guhura na Moldova ku Cyumweru.

Abakinnyi b'u Budage banenze Qatar ko itubahiriza uburenganzira bwa muntu
Ikipe y'Igihugu y'u Buholandi yagaragaje ko umupira w'amaguru ushyigikiye impinduka
Ishyirahamwe rya ruhago muri Norvège ntirirafata umwanzuro niba ikipe yabo itakwitabira Igikombe cy'Isi muri Qatar

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .