Ku myaka 52, Umuyapani Miura yongereye amasezerano mu ikipe akinira

Yanditswe na Eric Tony Ukurikiyimfura
Kuya 12 Mutarama 2020 saa 09:55
Yasuwe :
0 0

Rutahizamu w’Umuyapani, Kazuyoshi Miura uzuzuza imyaka 53 mu kwezi gutaha, yamaze gusinyana amasezerano mashya n’ikipe ye ya Yokohama FC yo mu cyiciro cya kabiri.

Uyu mugabo ugeze mu mwaka we wa 35 mu rugendo rwe rwo gukina ruhago, yatangiye gukina umupira w’amaguru muri Santos yo muri Brésil mu 1986, hari nyuma yo kwerekeza muri iki gihugu afite imyaka 15 gusa mu 1982.

Aganira na Kyodo, uyu mugabo ukuze kurusha abandi bakinnyi bose ku Isi, yatangaje ko yifuza gukomeza gukina ruhago uko agenda yiyongera mu myaka.

Kazuyoshi Miura yageze muri Yokohama FC mu 2005, akaba yaranyuze kandi mu makipe nka Genoa na Dinamo Zagreb afite amazina akomeye ku mugabane w’Uburayi.

Yakiniye kandi ikipe y’igihugu y’Ubuyapani imikino 89, atsinda ibitego 139 mu cyiciro cya mbere cyaho, ibi bimushyira ku mwanya wa gatandatu w’abatsinze byinshi mu mateka y’icyiciro cya mbere mu Buyapani.

Uyu mugabo w’imyaka 52, ni we wenyine ugikina mu batangiranye na Shampiyona y’icyiciro cya mbere mu Buyapani mu 1993 ndetse kuri uyu wa Gatandatu yatangaje ko yamaze kongera amasezerano.

Ati "Mu mwaka w’imikino wa 2020, nashoboye kongera amasezerano muri Yokohama FC. Ngerageza gukora buri kimwe kugira ngo nkomeze gukinana imbaraga kandi sinibagirwa ibyishimo umupira ugira. Nzakora ibishoboka byose mfashe ikipe yanjye kwitwara neza.’’

Miura yatangiye gukinira ikipe y’Igihugu y’u Buyapani mu 1990, ayifasha gukina Igikombe cy’Isi ku nshuro ya mbere mu 1998 ubwo yatsindaga ibitego 14 mu gushaka itike nubwo atashyizwe mu bakinnyi bitabiriye iri rushanwa ryabereye mu Bufaransa.

Yasezeye mu ikipe y’igihugu mu 2000 nyuma yo gutsindira u Buyapani ibitego 55 mu mikino 89.

Amakipe 14 Kazuyoshi Miura yakiniye mu myaka 35 amaze akina ruhago

  • 1986 Santos
  • 1986 Palmeiras
  • 1986 Matsubara
  • 1987 CRB
  • 1987–1988 XV de Jau
  • 1988–1989 Coritiba
  • 1990 Santos
  • 1990–1998 Yomiuri/Verdy Kawasaki
  • 1994–1995 Genoa (Yaratijwe)
  • 1999 Dinamo Zagreb
  • 1999–2000 Kyoto Purple Sanga
  • 2001–2005 Vissel Kobe
  • 2005– Yokohama FC
  • 2005 Sydney FC (Yaratijwe)
Kazuyoshi Miura uzuzuza imyaka 53 mu kwezi gutaha, ni we mukinnyi ukuze mu babigize umwuga ku Isi
Yokohama FC yo mu cyiciro cya kabiri mu Buyapani yamaze kongerera amasezerano uyu mugabo w'imyaka 52
Miura agiye gukina umwaka wa 35 w'imikino
Kazuyoshi Miura ni umwe mu bakinnyi bakunzwe n'abafana batari bake ba Yokohama FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza