Ku myaka 16, yasifuye umukino w’amakipe abiri akomeye muri Zambia

Yanditswe na Bukuru JC
Kuya 27 Werurwe 2021 saa 02:24
Yasuwe :
0 0

Umwana ukiri muto, Raphael Mbotela w’imyaka 16, akomeje kugarukwaho na benshi nyuma y’uko yasifuye umukino wa gicuti wahuje Zesco United na Forest Rangers zo muri Zambia ku wa Gatatu.

Raphael Mbotela yatangiye gusifura kuva afite imyaka 13.

Gusa, yagarutsweho cyane ku wa Gatatu w’iki cyumweru ubwo yasifuraga umukino wa gicuti wahuje amakipe abiri akomeye muri Zambia ya Zesco United na Forest Rangers.

Mbotela yabwiye BBC ko yifuzaga kuzaba umukinnyi, ariko imvune yagize mu kabombambari mu myaka itatu ishize, ishyira iherezo kuri izo nzozi.

Ati “Natangiye kwiyumvamo ko naba umusifuzi mu myaka itatu ishize nyuma y’uko nasabwaga gusifura imikino y’amakipe y’abato. Umunsi umwe, naregerewe nsabwa gusifura umukino wahuje amakipe y’abaturage bakuru bisa n’aho buri wese yabonye ko ndi umuhanga.”

“Mu by’ukuri ni ibintu nkunze, cyane ko ntabashije gukomeza kuba umukinnyi nyuma yo kugira imvune y’akabombambari.”

Yakomeje avuga ko yishimiye kuba ahamagarwa n’amakipe yo mu cyiciro cya mbere kugira ngo ayasifurire imikino ya gicuti.

Ati “Biranshimisha ariko iyo nkoze ikosa mu mukino ngerageza kwikosora. Byose bibaho mu mukino, buri muntu aribeshya.”

Raphael Mbotela yemeje ko umukino yasifuye ku wa Gatatu ari wo wa mbere ukomeye yayoboye ndetse yizeye ko Ishyirahamwe ry’Umupira w’Amaguru muri Zambia rishobora gutangira kumutekerezaho.

Ati “Ntabwo byigeze bimpangayikisha. Iyo ngiye mu kibuga sinjya ntekereza ku myaka yanjye cyangwa ku bakinnyi bakomeye. Ni njye uba uyoboye umukino! Ndashaka kuba nka Janny Sikazwe [Umunya-Zambia uri mu basifuzi bakomeye muri Afurika] ubwo nzaba nsoje amashuri.”

Uyu mwana ubana na nyina, avuga ko ashaka gusubukura amasomo ye ubundi akaziyegurira gusifura nyuma.

Yagize ati “Ababyeyi banjye ntibakibana, ubu sinshobora kujya ku ishuri kuko nta makayi mfite, nta mpuzankano ndetse n’ibindi nkenerwa.”

Ushinzwe itangazamakuru mu ikipe ya Zesco United, Desmond Katongo, yabwiye BBC ko iyi kipe yarifitiye icyizere Mbotela ikamusaba gusifura uwo mukino wabaye ku wa Gatatu.

Ati “Abatoza b’amakipe yombi nta kibazo bari bafite ku bushobozi bwe bwo gusifura umukino kuko amaze kwigaragaza nk’umuhanga mu kuyobora imikino nk’iyi.”

Yakomeje agira ati “Biratangaje kubona umuhungu ukiri muto ufite intego yo kuba umusifuzi mu gihe abo mu kigero cye bifuza kuba Lionel Messi, Ronaldo cyangwa Enock Mwepu.”

“Abasifuzi na bo bashobora kubera icyitegererezo abantu benshi nka Mbotela. Byaba byiza cyane uyu muhungu ahawe amahugurwa n’Ishyirahamwe rya ruhago muri Zambia. Iyi ni inkuru ishimishije kuri Zambia.”

Uyu mukino wa gicuti wayobowe na Raphael Mbotela, warangiye Zesco United itsinze ibitego 2-0 bya David Molinga na Jesse Were.

Mu gihe shampiyona ya Zambia yahagaze gato kubera imikino mpuzamahanga, Zesco United ni iya mbere n’amanota 40 mu mikino 20 imaze gukinwa mu gihe Forest Rangers iri ku mwanya wa kane n’amanota 32.

Zesco United yatsinze Forest Rangers ibitego 2-0 mu mukino wa gicuti wabaye ku wa Gatatu
Raphael Mbotela w’imyaka 16, yasifuye uwo mukino wa gicuti
Raphael Mbotela amaze imyaka itatu atangiye gusifura
Mbotela yatangaje ko ashaka kubanza kwiga, ariko yifuza kuzaba umusifuzi ukomeye nka Janny Sikazwe
Janny Sikazwe asifura amarushanwa akomeye arimo ayo ku rwego rw'Isi ategurwa na FIFA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .