KNC yashinje umunyezamu we kumutsindisha, yiyemeza kumufatira ibihano

Yanditswe na Eric Tony Ukurikiyimfura
Kuya 4 Ugushyingo 2019 saa 09:09
Yasuwe :
0 0

Umuyobozi akaba na nyir’ikipe ya Gasogi United, Kakoza Nkuriza Charles (KNC), ntiyashimishijwe n’imyitwarire y’umunyezamu wa kabiri w’iyi kipe, Isingizwe Patrick, washinjwe kugira uruhare mu bitego bibiri Gasogi United yinjijwe na Espoir FC mu mukino yatsinzwemo 3-2 kuri iki Cyumweru.

Gasogi United yari yasuye Espoir FC mu mukino w’umunsi wa karindwi wa Shampiyona wabereye i Rusizi, urangira ikipe yari mu rugo itsinze ibitego 3-2.

Igice cya mbere cyarangiye Espoir FC yihariye umupira, iyoboye n’igitego kimwe cyabonetse ku munota wa 41 w’umukino gitsinzwe na Niyonsaba Eric.

Gasogi United yatangiye igice cya kabiri ikora impinduka, Ndekwe Félix asimburwa na Muganza Isaac, byaje kuyihira nyuma y’iminota ine gusa, yishyurirwa na Manace Mutatu Mbedi.

Nyuma y’iminota itatu na none, Umunye-Congo Manace yongeye gucenga ba myugariro ba Espoir FC, afasha Gasogi United kuyobora umukino ubwo yayitsindaga igitego cya kabiri.

Espoir ntiyagowe no kwishyura igitego cya kabiri, aho Kymbade Fred yishyuriye ikipe ye ku makosa y’umunyezamu Isingizwe Patrick wafashe umupira ari wenyine nyuma akawurekura Kyambade Fred ahita atsinda bimworoheye.

Nyuma y’iminota ine gusa Isingizwe Patrick yakoze irindi kosa rikomeye umupira widunze imbere ye, aho kuwufata awushyira mu izamu, Espoir FC iba ibonye igitego cy’intsinzi cyatsinzwe na Nshimiyimana Élysée.

Nyuma y’umukino, Perezida wa Gasogi United, Kakoza Nkuriza Charles (KNC), yavuze ko bagomba gufatira ibihano umunyezamu Isingizwe Patrick, yashinje ko ari we watumye ikipe itakaza.

Ati” Biriya ni ibitego by’umunyezamu, mwese mwabirebaga. Nta wundi narenganya uretse umunyezamu ariko ntabwo nkeka ko tugomba kumureka kuko ntabwo umuntu ashobora gukora amakosa nk’ariya kabiri kikurikiranya, tugomba kureba niba nta zindi mpamvu zirimo zibyihishe inyuma.”

“Bimeze nk’undi mukino twatakaje, noneho hano biranasekeje. Agomba kubyishyura, tumuretse byaba ari ukorora abantu, tugomba kumuhana. Njye nka Perezida, tugomba kumuhana byanze bikunze. Ntabwo wambwira ngo ni ubuswa kuko nubwo washyiramo n’umuntu utarigeze ajya no mu izamu, ntabwo yakora nka biriya.”

Isingizwe Patrick wigeze gukina muri Espoir FC, yabonye umwanya wo kubanza mu kibuga nyuma y’uko Cuzuzo Gaël avunikiye mu mukino Gasogi United yanganyijemo na AS Muhanga ubusa ku busa ku munsi wa gatatu wa Shampiyona.

Nyuma yo gutsindwa uyu mukino, Gasogi United iri ku mwanya wa 10 n’amanota arindwi, iyanganya na Espoir FC ya 11.

Gasogi United yatsinzwe na Espoir FC ibitego 3-2 mu mukino wabereye i Rusizi
Isingizwe Patrick yashinjwe gukora amakosa abiri yavuyemo ibitego bibiri bya Espoir FC
KNC yiyemeje guhana uyu munyezamu yashinje gutsindisha ikipe ye

Amafoto: Gasogi United


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza