KNC yasabye Perezida Kagame ubufasha ngo umubare wa stade zigezweho wiyongere

Yanditswe na Eric Tony Ukurikiyimfura
Kuya 16 Gashyantare 2021 saa 02:59
Yasuwe :
0 0

Nyiri Gasogi United, Kakoza Nkuriza Charles (KNC), yasabye Umukuru w’Igihugu kubafasha kongera umubare wa stade zigezweho mu gihugu kuko izihari zidahagije.

Kongera umubare w’ibikorwaremezo mu mikino itandukanye biri muri biraje ishinga Leta y’u Rwanda hagamijwe kugira ngo siporo igirire akamaro abayikora, Abanyarwanda mu byiciro byose n’igihugu muri rusange.

Mu kiganiro na TV1, Umuyobozi wa Gasogi United, KNC, yavuze ko mu byo asaba Umukuru w’Igihugu harimo kongera umubare wa stade zigezweho kuko izihari ubu zidahagije kandi hakaba hari izitagikoreshwa.

Ati “Kuba atwemereye ko agarutse mu mupira w’amaguru bigiye kuba byiza kurushaho. Icyo nasaba Umukuru w’Igihugu mbere na mbere ni ukudufasha mu buryo bukomeye mu bijyanye n’ibikorwaremezo.”

Yakomeje agira ati “Nibatwongerereho nubwo hari ahari, muri Kigali hari ikibazo gikomeye cyane, hagire izivugururwa zigere ku rwego, urugero nka stade de l’Amitié [Mumena], ntabwo twavuga ngo iracyari stade, tugiye kureba iriya ya Kicukiro, mu by’ukuri ntabwo ishobora kwakira umukino uwo ari wo wose, dukeneye n’izindi.”

Muri uyu mwaka w’imikino wa 2020/21, amakipe arindwi arimo AS Kigali, APR FC, Rayon Sports, Gasogi United, Police FC, Gorilla FC na Kiyovu Sports yasabye kwakirira kuri Stade ya Kigali mu gihe Stade ya Mumena n’iya Kicukiro zitagikoreshwa naho Stade Amahoro ikaba iri mu nzira zo kuvugururwa, ikajya yakira abantu ibihumbi 45.

KNC yavuze ko kandi asaba Perezida Kagame gufasha abashora amafaranga mu iterambere rya siporo hagamijwe kuzamura impano z’abato, ku bijyanye no kubagabanyiriza imisoro ku bikoresho birimo imipira n’imyambaro bagura hanze kuko kuri ubu ihanitse nyamara nta yindi nyungu babibonamo.

Ati “Ikindi nanone, nadufashe kuko mu by’ukuri kugura imipira abana bazakina ushaka nko gushinga académie, wagana Minisiteri usaba ngo bakuvanireho imisoro ku bintu uzanye utagiye gucuruza, ugiye gufasha abantu, bakaguhakanira, nibadufashe habeho gushyigikirwa na Leta ku bashaka guteza imbere umupira w’abana boroherezwe.”

“ Uyu munsi wa none iyo uzanye imipira y’abana, imyenda, ibikoresho n’ibindi bigaragara ko ufite académie ntusonerwa umusoro n’umwe kandi utagiye kubicuruza kandi n’inyungu uzabonamo ako kanya. Ndatekerezo ko n’icyo gikwiye kubaho, habeho uburyo ibikoresho bigaragara ko bigiye kujya mu guteza imbere impano z’abana bibe byasonerwa imisoro kugira ngo abashoramo amafaranga babikore, abana bategurwe ari benshi, tubone abakinnyi benshi.”

Yasabye kandi Umukuru w’Igihugu kureba Shampiyona y’Igihugu y’umupira w’amaguru

Icya gatatu uyu muyobozi wa Gasogi United yasabye Perezida Paul Kagame ni ukongera gusubira ku kibuga, akareba imikino y’umupira w’amaguru y’imbere mu gihugu irimo iya Shampiyona, aho yemeje ko bizarushaho gutuma ababa muri uyu mukino bakora cyane.

Ati “Ikindi wenda nakwisabira Umukuru w’Igihugu, nta muntu utarababaye bitewe n’uburyo twitwaraga, ariko igihe kirageze ngo twongere tumubone no kuri Stade, ku mikino imwe y’imbere mu gihugu, aze arebe aho umupira ugeze, ibyo bizatuma natwe barimo tuvuga tuti turashyigikiwe kandi tugomba gushyiramo imbaraga kuko tujya tumubona yagiye kureba Basketball, kuki ataza kureba umukino wa Gasogi United na Rayon Sports.”

Umukuru w’Igihugu aheruka ku kibuga cy’umupira w’amaguru mu Rwanda mu 2016 ubwo hasozwaga irushanwa rya CHAN y’uwo mwaka, ryegukanywe na Repubulika Iharanira Demokarasi ya Congo itsinze Mali ibitego 3-0.

Gusa, nyuma yaho, yagiye akurikirana indi mikino irimo Basketball mu marushanwa atandukanye arimo amajonjora yo gushaka itike ya Baskteball Africa League (BAL 2020) yabereye i Kigali mu Ukuboza 2019 ndetse n’ayo gushaka itike ya Afrobasket 2021 izabera mu Rwanda, yabereye i Kigali mu Ugushyingo 2020 kongeraho isozwa rya Shampiyona ya Basketball mu Rwanda ryabaye mu Ukwakira 2020.

Nyiri Gasogi United, KNC, yasabye Perezida Kagame kongera umubare wa stade zigezweho, kugabanya umusoro ku bikoresho bigamije iterambere rya siporo no kureba Shampiyona y’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .