Kiyovu Sports yasubitse amasezerano y’abakozi bayo

Yanditswe na Eric Tony Ukurikiyimfura
Kuya 15 Mutarama 2021 saa 05:04
Yasuwe :
0 0

Ubuyobozi bwa Kiyovu Sports bwafashe icyemezo cyo gusubika amasezerano y’abakozi bayo kuva kuri uyu wa 15 Mutarama 2021 nyuma y’uko Shampiyona y’Icyiciro cya Mbere ihagaritswe mu mpera z’umwaka ushize kubera COVID-19.

Ku wa 12 Ukuboza 2020 ni bwo Minisiteri ya Siporo yafashe icyemezo cyo guhagarika Shampiyona yari igeze ku munsi wayo wa gatatu kubera ko hari amakipe amwe yagaragayemo ubwandu bwa COVID-19.

Mu itangazo yashyize ku mbugankoranyambaga zayo kuri uyu wa Gatanu, Kiyovu Sports yatangaje ko yabaye ihagaritse amasezerano y’abakozi bayo ndetse izakomeza gushaka uburyo ibafashamo.

Iti “Dushingiye ku cyemezo cya FERWAFA cyo gusubika amarushanwa ya Shampiyona kuva kuwa 12 Ukuboza 2020, ubuyobozi bwa Kiyovu Sports bwafashe umwanzuro wo gusubika amasezerano y’abakozi kugeza igihe irindi tangazo risubukura amarushanwa rizazira.”

“Ikipe izakomeza gushakisha uburyo bwo gufasha abakozi mu gihe bishoboka muri ibi bihe bigoye Isi yose. Turizera ko vuba ibikorwa bya siporo byongera kugaruka buri wese agasubira mu nshingano ze.”

Ku wa 24 Ukuboza 2020, Komite Nyobozi ya FERWAFA yagiranye inama n’abayobozi b’amakipe y’Icyiciro cya Mbere, bungurana ibitekerezo ku cyakorwa kugira ngo Shampiyona yongere gukomorerwa.

Kugeza ubu ntibiramenyekana igihe imikino ishobora gusubukurwa nubwo hari amakuru y’uko byaba mu matariki ya nyuma gato y’irushanwa rya CHAN rigiye kubera muri Cameroun.

FERWAFA iherutse gutangaza ko yamaze gushyiraho amabwiriza azakurikizwa, ariko azabanza kwemezwa na Minisiteri ya Siporo n’izindi nzego zirimo iz’ubuzima mbere y’uko Shampiyona yemererwa gukomeza.

Kiyovu Sports yasubitse amasezerano y’abakozi bayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .