Kwamamaza

Kiyovu Sports yahinduye intego nyuma yo kubona abayobozi bashya

Yanditswe kuya 4-10-2016 saa 09:42' na Manzi Rema Jules


Nyuma yo gutora Komite nshya iyobowe na Gasamagera Louis Claude, Kiyovu Sports, yihaye intego yo guhatanira igikombe cya shampiyona imaze imyaka myinshi idakozaho imitwe y’intoki.

Ubuyobozi bw’iyi kipe bakunze kwita“Urucaca” bwatangaje ko amaso bayahanze ku gutwara igikombe ikava mu myanya yakundaga kurangizaho shampiyona.

Kiyovu Sports yari imaze iminsi iyobowe mu buryo bw’inzibacyuho, yabonye abayobozi bashya kuri iki Cyumweru, tariki 2 Ukwakira nyuma y’Inteko rusange yahuje abanyamuryango b’ikipe.

Gasamagera Louis Claude wari usanzwe ari Perezida w’inzibacyuho w’ikipe yagiriwe icyizere cyo gukomeza kuyiyobora, Gashumba Damas atorerwa kuba Umunyamabanga asimbuye Manirarora Elie, Ashraf Kadubiri aba Umuyobozi wa tekinike naho Omar Munyengabe agirwa Umuvugizi w’ikipe.

Mu kiganiro Omar Munyengabe yagiranye na IGIHE yavuze ko ikipe yari iri mu bihe bigoye mu minsi ishize, benshi barayikuyeho amaboko, bamwe bari batangiye gutangaza ko ariryo herezo ryayo ariko bidashoboka ahubwo igiye kuzana imbaraga batari bayitezeho ishaka igikombe.

Ati “Abantu bagomba kubona Kiyovu Sports itandukanye n’iyo bari biteze, ubundi iyi ni ikipe y’amateka ikomeye kandi igomba guhanganira ibikombe. Turamutse nta gikombe dushaka nta n’impamvu yo kuza muri shampiyona , twabireka.”

Nta mutoza mushya Kiyovu Sports izazana

Munyengabe yatangaje ko nyuma yo kureba akazi keza umutoza Kanamugire Aloys yakoze k’ubwitange ajya gushakisha hirya no hino abakinnyi bakiri bato bo gukinira Kiyovu Sports akanabatoza ubu ikipe itanga icyizere. Ubuyobozi bwaricaye basanga nta mpamvu yo kuzana undi ahubwo bazakomezanya n’uyu uzi Kiyovu Sports kuva mu mizi.

Ati “Umutoza uhari niwe uzakomezanya n’ikipe kuko niwe washatse bariya bana nta muntu ubazi arabatoza mwabonye uko bitwaye mu irushanwa rya AS Kigali batahana umwanya wa kane mu makipe umunani nyamara abantu bari bazi ko ari twe tuzaba aba nyuma. Kuba barabashije gutsinda amakipe akomeye nka Rayon Sports, Police FC na AS Vita Club ikadusezerera bigoranye bigaragaza akazi keza yakoze.”

Ku bakinnyi, ngo iyi kipe iracyacyeneye rutahizamu mwiza uzaza gufasha abakinnyi bakiri bato ifite ariko kuko bigoye kumubona mu Rwanda bakaba bakimushaka hanze y’Igihugu ariko ashobora kuboneka mu minsi ya vuba.

Ingengo y’imari n’aho izaturuka ntiharamenyekana

Munyengabe yabwiye IGIHE ko uretse miliyoni 60 iyi kipe ihabwa n’Akarere ka Nyarugenge, ngo ntibaraterana ngo bashake aho amafaranga yose azakenerwa uyu mwaka azava ariko mu banyamuryango bose bemewe buri wese azagira umusanzu atanga, bashake n’abafatanyabikorwa biyongera kuri Sulfo isanzwe ibaha amazi kuri buri mukino ndetse bazanashakire asigaye ku yo bazinjiza ku bibuga.

Uyu muvugizi yasabye abafana ba Kiyovu Sports bari bamaze gutererana ikipe kugaruka bagashyira imbaraga zose hamwe kugira ngo bayubake ku buryo ishobora kwegukana igikombe cya Shampiyona.

Abatoza Kiyovu Sports ifite bayobowe na Kanamugire Aloys (wambaye umukara n'umweru) nibo bazayitoza muri shampiyona
Kuba Kiyovu Sports yaratsinze Rayon Sports mu irushanwa rya AS Kigali byayongereye icyizere
Kiyovu Sports iri gushaka rutahizamu w'umunyamahanga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved