Kiyovu Sports tuzayishinga imikaka ku gakanu, izishyura ibyatubayeho i Huye- KNC

Yanditswe na Eric Tony Ukurikiyimfura
Kuya 29 Ukwakira 2019 saa 06:56
Yasuwe :
0 0

Umuyobozi akaba na nyir’ikipe ya Gasogi United, Kakoza Nkuriza Charles (KNC), yavuze ko ikipe ye izatura Kiyovu Sports umujinya yakuye i Huye mu mukino w’umunsi wa gatandatu wa Shampiyona uzahuza amakipe yombi ku wa Kane kuri Stade ya Kigali i Nyamirambo saa 18:00.

Gasogi United iheruka gutsindirwa na Mukura Victory Sports i Huye ibitego 2-1 kuri ubu iri ku mwanya wa munani n’amanota atandatu.

Mu kiganiro n’Abanyamakuru cyabaye kuri uyu wa Mbere, Umuyobozi wayo, Kakoza Nkuriza Charles (KNC), yavuze ko bashimira Imana ko nyuma y’iminsi itanu ya Shampiyona bamaze gukina mu cyiciro cya mbere batari mu myanya ya nyuma, yemeza ko ubu ari bwo Shampiyona bagiye kuyitangira.

Ati” Twari twihaye imikino itanu, tuvuga ko tuzagira ikindi dutangaza nyuma y’iyo mikino. Twari twihaye intego ivuga ko tugomba kugaragaza ko turi ikipe ikomeye, tutagomba kurangiza iyo mikino turi mu makipe ya nyuma, turashimira Imana ko ari uko bimeze kuko uyu munsi bavuze ngo Shampiyona irarangiye ntabwo Gasogi United yaba iri muri ayo makipe.”

“Ntabwo byagenze neza cyane kuko twashakagamo amanota 10, ariko twabonyemo atandatu. Ishusho ya Gasogi United mu mikino ishize ntaho itandukaniye n’iy’andi makipe asanzwe akina iki cyiciro cya mbere. Mwabibaza Police FC.”

KNC yavuze ko hari byinshi babonye mu cyiciro cya mbere batari biteze ndetse yemeza ko ku ruhande rwa Gasogi United, Shampiyona izatangirira kuri Kiyovu Sports bakayishinga imikaka ku gakanu.

Ati” Twabonye byinshi tutari twiteze, hari abadutegaga iminsi, ariko tukayisimbuka. Buri munsi kuri twe wari mushya. Ubu nibwo twe Shampiyona igiye gutangira kuri uyu wa Kane, Irahera kuri Kiyovu, ni yo iri bwumve ubukana bwose. Sinzi niba turi buyishinge imikaka, ariko tuzayifata ku gakanu. Izishyura ibyatubayeho i Huye.”

Umuyobozi wa Gasogi United yavuze ko Kiyovu Sports yigeze kumva ko yari ikipe ikomeye, ariko kuri ubu atakiyizi mu makipe ahagaze neza.

Ati” Hari ahantu nasomye ko Kiyovu Sports yari ikomeye cyera ariko ndumva atari uko bikimeze. Nabonye nta n’abafana ikigira kuko abo nigeze kubona barira yamanutse bari bake. Ndashaka ko Rayon Sports izatsinda Etincelles. APR FC igatsinda Police FC kugira ngo bazaze kureba ibyo tuzakorera Kiyovu bishimye. Ni inshuti zacu.”

Ku ruhande rw’Umutoza mukuru wa Gasogi United, Guy Bukasa, yavuze ko abakinnyi be biteguye neza umukino wa Kiyovu Sports, yemeza ko ashobora kuzaba yagarukanye Umunya-Liberia Herron Berrian wari ufite akabazo k’imvune ku mukino uheruka.

Ati” Abatwita ikipe ntoya nibakomeze badufate gutyo kuko ndabizi bazabona ibitandukanye. Umukino utaha tuwiteguye neza, abakinnyi banjye barakora cyane kuko mbasaba gukorera hamwe nk’ikipe nubwo waba usatira ugomba kuza gufasha abandi. Gutsindwa na Mukura byaradufashije kuko abakinnyi bari batangiye kwirara. Bigenze neza ku wa Kane tuzaba twagaruye Herron akazakina uyu mukino.”

Umunyezamu wa mbere wa Gasogi United, Cuzuzo Aimé Gaël utarakinnye imikino ibiri iheruka kubera imvune yagiriye i Muhanga, yavuze ko yumva ameze ndetse yiteguye gufatanya na bagenzi be bahize kwitwara neza ku mukino wa Kiyovu Sports.

Gasogi United yatangaje ko kwinjira kuri uyu mukino uzabera ku matara y’i Nyamirambo, bizaba ari 1000 Frw mu myanya isanzwe, 3000 Frw ahatwikiriye, 5000 Frw iruhande rwa VIP n’ibihumbi 10 Frw mu myanya y’icyubahiro.

Kiyovu Sports iheruka gutsinda Gicumbi FC, iri ku mwanya wa gatandatu n’amanota 10, inganya na Etincelles FC na Rayon Sports, ariko zombi zikayirusha igitego kimwe kuko yo izigamye ibitego bibiri.

Gasogi United yakoresheje ikiganiro n'abanayamakuru gitegura umukino wo ku wa Kane izakiramo Kiyovu Sports
KNC yavuze ko Gasogi United izashinga imikaka ku gakanu ka Kiyovu, ikayikaranga
KNC hamwe n'Umunyezamu wa mbere w'ikipe ye, Cuzuzo Aimé Gaël utarakinnye imikino ibiri iheruka kubera imvune
Umutoza Guy Bukasa yiteguye kwitwara neza ku mukino wa gatandatu wa Shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza