Kigali: Abashinjacyaha n’Abavoka bakijijwe na mbuga

Yanditswe na Kanamugire Emmanuel
Kuya 4 Nzeri 2016 saa 07:28
Yasuwe :
0 0

Ababurana ari babiri umwe aba yigiza nkana; ikipe y’Ubushinjacyaha yeretse iy’Urugaga rw’Abavoka mu Rwanda ko ari bo bigiza nkana, ibatsinda ibitego 3-2 mu mukino wa gicuti mu mupira w’amaguru wabaye kuri uyu wa Gatanu tariki ya 2 Nzeri 2016.

Basanzwe bahuzwa n’Amategeko, bagahanganira mu cyumba cy’Urukiko imbere y’Umucamanza, bamwe bashinja, abandi bafasha uregwa kwiregura, ariko noneho bahuriye mu kibuga imbere y’umusifuzi, aho bose bashakaga kureba uwigiza nkana mu guconga ruhago.

Aho bari basanzwe bahurira cyangwa bahanganira, hatsindaga ufite ibimenyetso bifatika kurusha undi, ariko noneho kuri uyu wa Gatanu nta bimenyetso byari bikenewe, ahubwo ni ubuhanga, imbaraga n’imbaduko mu guconga ruhago.

Ntibyoroheye umusifuzi kuko noneho uwakoraga ikosa muri urwo rubanza (nako uwo mukino), si akanyundo yahondaga ku meza, ahubwo ni ifirimbi yahuhagamo, ndetse uwari kwitwara mu buryo binyuranye n’amategeko y’umukino, ntiyari gucibwa ihazabu yo gusuzugura urukiko cyangwa ngo afungirwe guteza akaduruvayo mu cyumba cy’iburanisha.

Amahire ni uko nta wagize imyitwarire mibi nk’iyo ngo yerekwe ikarita y’umutuku imusohora mu kibuga, ari na cyo cyumba baburaniragamo.

Gasasira Jean Claude wo mu Bushinjacyaha ni umwe mu bakinnyi bigaragaje cyane kurusha abandi muri uwo mukino, dore ko yatsindiye ikipe ye ibitego bibiri.

Uwo wari umukino wa gicuti, ntibikuraho ko ababurana ari babiri umwe aba yigiza nkana, ari na byo bajya bavuga no mu mupira w’amaguru bibaho.

Nyuma yo gutsindwa ibitego 3-2, Abavoka bavuye mu kibuga batanyuzwe n’imikirize y’urubanza (imigendekere y’umukino), maze bahita bajurira ako kanya, basaba undi mukino wo kwishyura, ari na wo uzabamara impaka.

Icyakora ntiharatangazwa itariki izaberaho uwo mukino.

Umushinjacyaha Habimana Bonaventure
Umushinjacyaha Gasasira Jean Claude
Ikipe y'Abavoka
Ikipe y'Abashinjacyaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244