Kayumba Soter yavuze ku cyamukuye muri Kenya n’icyo azanye muri Rayon Sports (Video)

Yanditswe na Eric Tony Ukurikiyimfura
Kuya 14 Mutarama 2020 saa 10:41
Yasuwe :
0 0

Myugariro mushya wa Rayon Sports, Kayumba Soter, yavuze ko yiteguye gukora cyane agahanganira umwanya muri iyi kipe yasanzemo abakinnyi yemeza ko bakomeye.

Kayumba wakinira AFC Leopards yo muri Kenya, yasinyishijwe na Rayon Sports mu mpera z’umwaka ushize ku masezerano y’umwaka umwe n’igice.

Uyu mukinnyi ntabwo aratangira gukinira Rayon Sports mu mikino ya Shampiyona, ariko amaze iminsi akora imyitozo ndetse yagaragaye mu mikino ibiri ya gicuti iyi kipe yahuyemo na Mukura Victory Sports na Karisimbi FC yo muri Repubulika Iharanira Demokarasi ya Congo.

Byitezwe ko ashobora gukina umukino we wa mbere w’amarushanwa muri Rayon Sports ku wa Gatandatu ubwo izaba yakiriye Espoir FC mu mukino w’umunsi wa 18 wa Shampiyona uzabera kuri Stade ya Kigali i Nyamirambo.

Mu kiganiro yagiranye na IGIHE nyuma y’imyitozo yo kuri uyu wa Mbere, Kayumba yavuze ko yiteguye guhanganira umwanya ubanzamo ndetse yiteguye gutanga buri kimwe muri iyi kipe.

Ati "Abakinnyi nasanze twari tumenyeranye, twari tuziranye. Ni ahantu nageze ndisanga muri rusange. Ni abakinnyi beza bari ku rwego rushimishije. Bizansaba gushyiramo imbaraga kugira ngo mbone umwanya wo kubanza mu kibuga, no gukora cyane nubwo aho nabaga nakinaga.’’

"Abafana ba Rayon Sports nabasaba kunshyigikira, ibyo nzaba mfite byose nzabibaha. Bishobora kwanga ntawe ubizi ariko uko ndi kubitekereza ntabwo bizanga, imbaraga mfite nzazibaha uko ziri.’’

Kayumba yavuze ko nubwo Rayon Sports yatakaje amanota ku mukino yanganyijemo na AS Kigali, bizeye kwitwara neza imbere ya Espoir FC, we yemeza ko ari ikipe ikomeye.

Ati "Ku ruhande rwanjye, njyewe nditeguye. Ntabwo twasuzugura ikipe ya Espoir FC kuko ni ikipe iri mu cyiciro cya mbere yabikoreye. Ni ukureba uko tuyikuraho amanota atatu. Rayon Sports ni ikipe iba itagomba gutakaza umukino n’umwe.’’

Uyu myugariro mushya wa Rayon Sports yemeje ko mu byatumye atandukana na AFC Leopards yo muri Kenya, harimo kuba iyi kipe yari imaze amezi ane idahemba bigatuma n’abandi bakinnyi b’Abanyamahanga bayibagamo bagenda.

Ati "Kuba mu mahanga ni ibintu biba bigoye. Abakinnyi twakinanaga bose b’Abanyamahanga barahavuye, Vincent [Habamahoro] yarahavuye, Trésor w’Umurundi yarahavuye ndetse na Diarra, hasigayeyo umunyezamu w’Umugande kandi na we sinzi niba azagumayo kuko hari ikibazo cy’amafaranga, ikipe ntabwo ihemba, bamaze amezi atanu. Biba bigoye kuhaba kandi dufite imiryango.’’

Si ubwa mbere uyu mukinnyi unahamagarwa mu ikipe y’Igihugu ‘Amavubi’ agiye gukina muri Shampiyona y’u Rwanda kuko yayivuyemo muri mpera za 2018 nyuma yo kumara imyaka umunani akinira AS Kigali.

Kayumba Soter mu myitozo ya Rayon Sports yitegura Espoir FC
Kayumba Soter ashobora gukina umukino wa mbere muri Rayon Sports ku wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza