00:00:00 IGIHE NETWORK KN KINYARWANDA EN ENGLISH FR FRANCAIS

Karim Benzema wari waraciwe, yashyizwe mu bakinnyi 26 bazakinira u Bufaransa muri Euro 2020

Yanditswe na Eric Tony Ukurikiyimfura
Kuya 19 Gicurasi 2021 saa 08:34
Yasuwe :
0 0

Rutahizamu wa Real Madid, Karim Benzema, yahamagawe mu bakinnyi 26 bazakinira u Bufaransa mu Gikombe cy’u Burayi (UEFA EURO 2020) nyuma y’imyaka itandatu atitabazwa.

Benzema ntiyongeye gukinira u Bufaransa kuva mu 2015 kubera amakosa yashinjwe yo gushaka gushyira hanze amashusho y’umukinnyi mugenzi we Mathieu Valbuena ari gukora imibonano mpuzabitsina.

Uyu mugabo w’imyaka 33 ntiyakiniye u Bufaransa muri Euro 2016 no mu Gikombe cy’Isi cya 2018 kubera ibyo yashinjwaga.

Mu ntangiriro z’uyu mwaka, abashinjacyaha b’Abafaransa batangaje ko Karim Benzema ashobora kugezwa imbere y’ubutabera.

Ashinjwa kwishyura abantu ngo basabe amafaranga Mathieu Valbuena w’imyaka 36 kubera amashusho yafashwe ari gukora imibonano mpuzabitsina mu 2015, ariko uyu rutahizamu akavuga ko uburyo Polisi yafashemo iki kibazo atari ko giteye.

Nyuma yo kwemeza ko Benzema ari mu bakinnyi bazakina Euro 2020 izaba mu mpeshyi hagati ya tariki ya 11 Kamena n’iya 11 Nyakanga, Umutoza Didier Deschamps utoza u Bufaransa, yagize ati “Icy’ingenzi ni uyu munsi n’ejo hazaza.”

Deschamps yavuze ko yagiranye ibiganiro birebire n’uyu mukinnyi ndetse yagize umwanya uhagije wo kubitekerezaho mbere yo gufata icyemezo cyo kumuhamagara.

Karim Benzema yatsinze ibitego 27 mu mikino 81 amaze gukinira u Bufaransa, birimo bibiri yatsinze mbere y’uko atongera guhamagarwa ubwo batsindaga Armenia ibitego 4-0 mu mukino wa gicuti.

Muri uyu mwaka w’imikino, ni umwe mu bakinnyi bafatiye runini Rel Madrid, aho amaze gutsinda ibitego 29 birimo 11 byo mu mikino 10. Yatanze kandi imipira umunani yavuyemo ibindi bitego kuri bagenzi be mu marushanwa yose.

Mu busatirizi bw’u Bufaransa, Benzema azakinana n’abarimo Kylian Mbappé wa PSG na Antoine Griezmann wa FC Barcelone.

U Bufaransa bwaherukaga kugera ku mukino wa nyuma w’iri rushanwa mu myaka itanu ishize, ariko bugatsindwa na Portugal igitego 1-0, kuri iyi nshuro buzatangira irushanwa buhura n’u Budage tariki ya 15 Kamena.

Abakinnyi 26 bahamagawe mu ikipe y’Igihugu y’u Bufaransa:

Abanyezamu: Hugo Lloris (Tottenham), Mike Maignan (Losc) na Steve Mandanda (Marseille).

Ba myugariro: Lucas Digne (Everton), Leo Dubois (Lyon), Lucas Hernandez (Bayern Munich), Presnel Kimpembe (PSG), Jules Kounde (Sevilla), Clement Lenglet (Barcelona), Benjamin Pavard (Bayern Munich), Raphael Varane (Real Madrid) na Kurt Zouma (Chelsea).

Abakina hagati: N’Golo Kante (Chelsea), Thomas Lemar (Atletico Madrid), Paul Pogba (Manchester United), Adrien Rabiot (Juventus), Moussa Sissoko (Tottenham)na Corentin Tolisso (Bayern Munich).

Ba rutahizamu: Wissam Ben Yedder (Monaco), Karim Benzema (Real Madrid), Kingsley Coman (Bayern Munich), Ousmane Dembele (Barcelona), Olivier Giroud (Chelsea), Antoine Griezmann (Barcelona), Kylian Mbappe (PSG) na Marcus Thuram (Borussia Monchengladbach).

Karim Benzema uhagaze neza muri Real Madrid, yongeye guhamagarwa mu ikipe y'Igihugu y'u Bufaransa
Umutoza Didier Deschamps yavuze ko guhamagara Benzema ari icyemezo yafashe abanje kubitekerezaho
Benzema yaherukaga gukinira u Bufaransa mu 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .