Karekezi Olivier urota Amavubi, yahawe igihembo cy’umutoza mwiza muri Suède

Yanditswe na Manzi Rema Jules
Kuya 13 Gashyantare 2017 saa 03:40
Yasuwe :
1 0

Karekezi Olivier wahoze ari mu nkingi za mwamba z’ikipe y’igihugu Amavubi kuri ubu akaba yaramaze gufata inzira y’ubutoza, yaraye ahawe igihembo cy’umutoza mwiza w’abakiri bato mu ikipe ye ya Råå IF muri Suède gusa ngo intego ye ni ukugaruka mu Mavubi nk’umutoza nubwo atazi igihe.

Karekezi wakiniye amakipe atandukanye ku mugabane w’u Burayi muri Suède na Norvège, Tunisia muri Afurika na APR FC mu Rwanda, kuri ubu ni umutoza w’abana b’imyaka 16 mu ikipe ya Råå IF ari na yo yasorejemo ruhago nk’umukinnyi mu mpera za 2015.

Mu ijoro ryakeye mu birori byo guhemba abantu bitwaye neza mu mwaka ushize mu ikipe ye, uyu mutoza yahawe igihembo kitwa Leif freijs Minnespris Tilldelas nk’uwahize abandi batoza b’abakiri bato.

Aganira na IGIHE, Karekezi yavuze ko igihembo yahawe ari ikimwereka ko hamwe no gukora cyane byose bishoboka gusa ngo ni urugendo rukomeye kandi na we yiteguye.

Ati “Ni ikipe iguhitamo. Iki gihembo igitanga buri mwaka. Kuri iyi nshuro ninjye batoye. Umupira nawugize umwuga ni ugukomeza gukora cyane ushaka kumenya. Umupira ni ukwiga igihe cyose bitewe na buri mwaka ibigenda bigerwaho kugira ngo ejo cyangwa ejobundi uzagire icyo umarira abandi ndetse nawe ubwawe bitewe n’aho uzagenda ugirirwa icyizere.”

Karekezi wakiniye Amavubi imyaka 13 yitabiriye bwa mbere igikombe cya Afurika cya 2004, yanavuze ko mu byo akora byose atajya yibagirwa ko afite ibyo yasize atarangije mu ruhare agomba kugira mu iterambere rya ruhago mu Rwanda akaba ari yo mpamvu aho ari arimo guhaha ubumenyi ariko ngo akaba atekereza kuzagaruka nk’umutoza.

Abajijwe niba atekereza ko yazanatoza Amavubi mu gihe kizaza, yagize ati “Yego cyane. Kandi icy’ingenzi ni ukubanza ugafata ubunararibonye mu mitoreze. Gusa ndabishaka kandi nzi neza ko Nyagasani azabimfashamo.”

Karekezi wanabaye kapiteni w’Amavubi yavuze ko muri iki gihe umutoza u Rwanda rukeneye yakabaye ari umuntu ufite imirongo migari igaragaza uko umupira uzatera imbere bihereye mu bakiri bato kandi akaba ari umuntu ufite uburyo bwo gufasha abana bafite impano kujya gukina hanze kuko ari byo bizatuma n’abandi bagira ishyaka ryo gukora cyane mu myaka mike u Rwanda rukaba rwagira ababigize umwuga benshi.

Karekezi yakiniye APR FC hagati ya 2002-2004, muri 2005 ajya muri Helsingborgs IF muri Suède yamazemo imyaka itatu ayikinira imikino 60 ayitsindira ibitego 18. Muri 2008 yerekeje muri Hamarkameratene muri Norvège, mu 2010 yagiye muri Östers IF yo muri Suède, 2012 yagarutse muri APR FC akinamo umwaka umwe ahita ajya muri CA Bizertin yo muri Tunisia mu 2013.

Mu 2015 nibwo yagiye muri Råå IF yo mu cyiciro cya gatatu muri Suède nk’umukinnyi ariko ahita aninjira mu gutoza abakiri bato ari na byo yakomeje na nyuma yo guhagarika gukina kugeza ubu.

Olivier Karekezi ashyikirizwa igihembo yagenewe
Igihembo Karekezi yahawe ngo ni intambwe ateye imwerekeza ku gutoza Amavubi yifuza
Inama Olivier Karekezi yatorewemo nk'umutoza mukuru w'abakiri bato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza