Kwamamaza

Kanyankore yamaze kwirukanwa muri APR FC

Yanditswe kuya 7-09-2016 saa 17:30' na IGIHE


Umutoza wa APR FC, Kanyankore Gilbert Yaoundé wari umaze iminsi ahawe inshingano zo gutoza ikipe y’Ingabo z’Igihugu yamaze kwirukanwa nyuma y’umusaruro utarishimiwe n’ubuyobozi.

Amakuru agera kuri IGIHE ni uko uyu mutoza w’imyaka 62 yirukanwe nyuma yo kutitwara neza mu mikino ya Gisirikare iheruka kubera mu Rwanda mu kwezi gushize,igikombe kikaza kwegukanwa na Ulinzi Stars yo muri Kenya.

Ubuyobozi bwa APR FC buvuga ko uyu mutoza wari uri mu igerageza atitwaye neza ku buryo yaguma muri iyi kipe.

Iyirukanwa rya Kanyankore ryatangiye kunugwanugwa mu minsi ishize ubwo ubuyobozi bwa APR FC bwafataga icyemezo cyo kumuhagarika ku gukoresha imyitozo, inshingano zahise zihabwa uwari umwungirije Yves Rwasamanzi.

Kanyankore ku murongo wa telefoni yatangarije IGIHE ko ntacyo yatangaza kuri iyi nkuru ivuga ku iyirukanwa rye.

Ati “ Nta makuru nabatangariza kuri iyi nkuru. Muzabimenya hanyuma, igihe cyo kubisobanura ntikiragera.”

Tariki 26 Nyakanga 2016 nibwo APR FC yatangaje ku mugaragaro itsinda ry’abatoza bayobowe na Kanyankore Gilbert Yaoundé, Yves Rwasamanzi nk’umwungiriza we ndetse na Ibrahim Mugisha nk’umutoza w’abazamu.

Kanyankore yahawe izi nshingano nyuma y’uko Umunya-Tunisia, Nizar Khanfir wahoze ari umutoza mukuru asezeye, asigiye iyi kipe igikombe cya shampiyona.

Icyo gihe Umunyamabanga Mukuru wa APR FC, Kalisa Adolphe, yabwiye itangazamakuru ko bahisemo Kanyankore kubera uburambe afite mu gutoza ndetse no gukina umukino uryoheye ijisho bitandukanye n’abatoza iyi kipe y’ingabo z’igihugu yari isanganywe ‘batsindaga ariko batagaragaje umukino mwiza’.

Mu mikino itatu y’irushanwa rihuza ingabo z’ibihugu bigize Akarere ka Afurika y’u Burasirazuba ryabereye i Kigali kuva kuya 7 kugeza kuya 18 Kanama 2016, Kanyankore yatoje yatsinzwe na Ulinzi Stars yo muri Kenya igitego kimwe ku busa, atsinda Simba yo muri Uganda ibitego 2-0, ndetse n’ikipe yari ihagarariye Tanzania ayitsinda igitego 1-0.

Nyuma yo kurangiza iri rushanwa yahise ahabwa inshingano zo gutoza ikipe y’Igihugu, Amavubi afatanyije na Eric Nshimiyimana ariko nyuma y’iminsi ine gusa, ubuyobozi bwa Minisiteri ya Siporo n’umuco bwahise bubirukana.

Kuva icyo gihe, Kanyankore ntiyongeye kugaragara ku myitozo y’iyi kipe, nyuma y’irushanwa bivugwa ko yahagaritswe n’ubuyobozi bwa APR FC, ariko yaba we ndetse n’Ubuyobozi bw’ikipe ntibahishure ikibyihishe inyuma.

APR FC kuri ubu yamaze gushyirwa mu biganza by’umutoza, Yves Rwasamanzi wari wungirije Kanyankore nk’umutoza w’agateganyo akaba ari nawe uzatoza iyi kipe mu irushanwa ryateguwe na AS Kigali rizatangira kuri uyu wa Kane, tariki ya 8 Nzeli 2016.

Umukino wa mbere izawukina na kuwa Gatanu tariki ya 09 Nzeli 2016 na AS Dauphin Noir yo muri Congo kuri Stade ya Kigali Nyamirambo saa 15:30.

Inkuru bifitanye isano uhereye kuva igihe Kanyankore yatangarijwe nk’umutoza mukuru kugeza yirukanwe mu rugendo yatangiye kuya 26 Nyakanga kugeza akarusoza kuri uyu wa 7 Nzeli 2016:

Impinduka muri APR FC: Kanyankore na Rwasamanzi bagizwe abatoza

Kanyankore agiye gupima niba APR FC ifite ubuswa nk’ubwa Rayon Sports na Kiyovu Sports

Kanyankore na Nshimiyimana basezerewe mu Mavubi nyuma y’iminsi ine bahawe inshingano


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved