00:00:00 IGIHE NETWORK KN KINYARWANDA EN ENGLISH FR FRANCAIS

Kagere Meddie mu muryango winjira muri APR FC

Yanditswe na Eric Tony Ukurikiyimfura
Kuya 29 Kanama 2021 saa 07:41
Yasuwe :
0 0

Rutahizamu w’Ikipe y’Igihugu, Meddie Kagere, ukinira Simba SC yo muri Tanzania, ashobora gutizwa APR FC muri uyu mwaka w’imikino wa 2021/22 nyuma y’ibiganiro byahuje amakipe yombi.

Kagere amaze imyaka itatu muri Simba SC, aho yatwaranye na yo ibikombe bitatu bya shampiyona, aba rutahizamu watsinze ibitego byinshi mu myaka ibiri ye ya mbere.

Kagere Meddie yageze muri Simba SC mu mpeshyi ya 2018, aguzwe muri Gor Mahia yo muri Kenya ku masezerano y’umwaka umwe.

Mu mwaka wa mbere yakiniyemo Simba SC, yayitsindiye ibitego 34 birimo 23 bya shampiyona mu mikino 52 yakinnye mu mwaka w’imikino 2018/19, aho yanatowe nk’umukinnyi w’umwaka muri iyi kipe nyuma yo kuyitsindira ibitego byinshi.

Mu mwaka wa kabiri yongereyemo amasezerano y’imyaka ibiri, yongeye kuba umukinnyi watsinze ibitego byinshi, aho yinjije 21 mu gihe mu wa 2020/21, yatsinze ibitego 13.

Nyuma yo gusoza amasezerano ku mpera z’umwaka w’imikino muri Nyakanga, Kagere utarabonye igihe gihagije cyo gukina, hari ubwoba ko ashobora kwerekeza ahandi, ariko Simba SC imwongerera andi masezerano.

Amakuru IGIHE yamenye ni uko muri iyi minsi hari ibiganiro byabaye hagati ya APR FC na Simba SC kugira ngo uyu mukinnyi atizwe, azakine Shampiyona y’u Rwanda gusa ntibirarangira.

Umwe mu bo hafi ya Simba SC waganiriye na IGIHE, yavuze ko umutoza Didier Gomes utoza Simba SC, yasabye ko Kagere Meddie yatizwa ndetse azakinira APR FC muri uyu mwaka w’imikino.

Kujya muri APR FC kwa Kagere Meddie, bizatuma yongera gukinana na Tuyisenge Jacques bakinanye muri Gor Mahia FC yo muri Kenya mbere y’uko undi ajya muri Tanzania.

Iyi Kipe y’Ingabo yatanze urutonde rw’abakinnyi 28 muri CAF, izifashisha muri CAF Champions League, ariko ishobora gutanga andi mazina 12 (ikagira 40), abongewemo nyuma bagakina ijonjora rya kabiri mu gihe yaba isezereye Mogadishu City Club yo muri Somalia.

Undi bivugwa ko azatizwa na Simba SC ni Umunya-Zimbabwe Perfect Chikwende, we uzerekeza muri FC Platinum.

Kagere Meddie w’imyaka 35, yashakanye n’Umunyarwandakazi. Uyu rutahizamu yavukiye muri Uganda ku wa 10 Ukwakira 1986.

Yakiniye Ikipe ya Mbale Heroes FC hagati ya 2004-2006. Yahavuye ahita yerekeza mu Rwanda mu Ikipe ya Atraco FC mu 2006. Nyuma y’umwaka umwe yagiye muri Kiyovu Sports yavuyemo yerekeza muri Mukura Victory Sports mu mwaka w’imikino 2008-2009 kugeza mu 2010 ubwo yajyaga muri Police FC, aho yakinnye imikino 40 agatsinda ibitego 38.

Mu 2012 yerekeje muri ES Zaris yo muri Tunisia atamazemo igihe, ahita yerekeza muri Police FC.

Nyuma yaho yakinnye muri Rayon Sports, aho mu mikino 12 ya shampiyona yo kwishyura, yatsindiye iyi kipe yambara ubururu n’umweru ibitego umunani.

Mu 2014 yerekeje muri Albania mu Ikipe ya KF Tirana, batandukanye tariki ya 1 Mutarama 2015, basheshe amasezerano.

Mu mwaka wa 2015, ni bwo Kagere Meddie yatangiye gukinira Gor Mahia afite amasezerano y’umwaka umwe, aho yayitsindiye ibitego 31 mu mikino yose yakinnye, ariko bananirwa kumvikana ku masezerano mashya, batandukana muri Mutarama 2016.

Gor Mahia yamugaruye nyuma y’amezi atandatu, aho yayivuyemo mu 2018 ajya muri Simba SC.

Kagere ni umukinnyi w’Ikipe y’Igihugu Amavubi kuva mu 2011, ubwo u Rwanda rwatsindaga Bénin igitego 1-0 akaba ari we ugitsinda.

Mu 2015 na we yahagaritswe mu nkubiri y’abanyamahanga mu Amavubi, yongera guhamagarwamo mu mwaka ushize ubwo u Rwanda rwatsindwaga na Côte d’Ivoire ibitego 2-1, akaba ari na we utsinda iki gitego.

Kuri ubu, ari mu bakinnyi umutoza Mashami Vincent yajyanye muri Maroc kugira ngo bazakine na Mali ku wa Kabiri tariki ya 1 Nzeri i Agadir ndetse na Kenya ku wa 5 Nzeri i Kigali.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .