Johnny McKinstry yahagaritswe ukwezi kumwe

Yanditswe na Eric Tony Ukurikiyimfura
Kuya 3 Werurwe 2021 saa 11:46
Yasuwe :
0 0

Ishyirahamwe ry’Umupira w’Amaguru muri Uganda (FUFA) ryasabye umutoza w’ikipe y’Igihugu ‘Uganda Cranes’, Johnathan McKinstry, kuba agiye ku ruhande mu gihe cy’ukwezi kumwe nubwo ifite imikino ibiri muri iyi Werurwe.

Itangazo ryashyizwe hanze na FUFA ku wa Kabiri mu ijoro, rivuga ko Komite Nyobozi yayo yafashe icyo cyemezo mu rwego gushaka ibisubizo ku mikino ibiri y’ingenzi Uganda Cranes isabwa kubonamo itike y’Igikombe cya Afurika cya 2021 kizabera muri Cameroun mu mwaka utaha.

Rigira riti “Komite Nyobozi ya FUFA yasabye Umutoza Mukuru w’Ikipe Nkuru, Uganda Cranes, Bwana Johnathan McKinstry kuba aretse inshingano zo gutoza hagati ya tariki ya 2 n’iya 31 Werurwe 2021.”

Ikipe y’Igihugu ya Uganda izakina n’iya Burkina Faso mu rugo ku wa 24 Werurwe mbere yo kwakirwa na Malawi mu mpera z’ukwezi.

Kwitwara nabi mu mikino ibiri Uganda yahuyemo na Sudani y’Epfo mu Ugushyingo, byatumye amahirwe yo kwitabira Igikombe cya Afurika ku nshuro ya gatatu agabanuka nubwo bigishoboka.

Gutsindwa igitego 1-0 na Sudani y’Epfo mu mukino wabereye muri Kenya byatumye Uganda ikomeza kugira amanota arindwi, irushwa inota rimwe na Burkina Faso mu gihe Mali ifite amanota ane.

Umusaruro muke McKinstry yagize muri Shampiyona Nyafurika ihuza abakina imbere mu bihugu byabo (CHAN 2020) iheruka kubera muri Cameroun, Uganda igasezererwa itarenze amatsinda, nawo uri mu byatumye atererwa icyizere.

Mu gihe yahagaritswe, abamwungirije barimo Abdallah Mubiru, Livingstone Mbabazi na Fred Kajoba utoza abanyezamu ni bo bazafata inshingano ku mikino ibiri iri imbere.

Johnathan McKinstry wigeze gutoza u Rwanda, yagizwe umutoza wa Uganda Cranes muri Nzeri 2019, asimbuye Umufaransa Sébastien Desabre. Kuva icyo igihe, yatoje imikino 14, atsinda icyenda, anganya ibiri mu gihe yatsinzwe itatu.

Umutoza wa Uganda, Johnathan McKinstry, yahagaritswe ukwezi kumwe /Ifoto: KFM
Uganda irasabwa gutsinda umukino umwe muri ibiri isigaye kugira ngo yizere kujya muri CAN 2021 /Ifoto: The Focus
McKinstry yaterewe icyizere nyuma yo kwitwara nabi ku mukino wa Sudani y'Epfo no muri CHAN 2020 /Ifoto: CAF

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .