Joao Havelange wigeze kuyobora FIFA yapfuye

Yanditswe na Ishimwe Israel
Kuya 16 Kanama 2016 saa 04:00
Yasuwe : XX
0

Joao Havelange wayoboye Ishyirahamwe ry’umupira w’amaguru ku Isi, FIFA imyaka 24 yapfuye azize indwara y’ibihaha nyuma y’ukwezi kumwe arwariye mu bitaro bya Samaritan mu mujyi wa Rio de Janeiro.

Kuri uyu wa 16 Kanama nibwo inkuru y’incamugongo yamenyekanye ko umukambwe w’imyaka ijana, Joao Havelange witangiye ndetse akayobora umupira w’amaguru ku Isi kuva mu 1974 kugeza 1998 yashizemo umwuka.

Joao Havelange wavukiye muri Brazil tariki ya 8 Gicurasi 1916, yahagarariye iki gihugu mu marushanwa yo koga mu mikino Olempike yo muri 1936, ndetse ahita atorerwa kujya muri Komite Olempike ku rwego rw’Isi, muri uwo mwaka, umwanya yaje kuvaho muri 2011 kubera impamvu z’uburwayi.

Joao Havelange yasimbuwe ku buyobozi bwa FIFA n’Umusuwisi Sepp Blatter mu 1998.

Muri Nyakanga 2012, raporo yasohowe n’Umushinjacyaha w’Umusuwisi yagaragaje ko ubwo Havelange yari ari ku buyobozi, akanama ka FIFA yayoboranaga n’umwana we Ricardo Teixeira bariye ruswa ya miliyoni 41 z’amadorali y’Amerika mu itangwa ry’isoko ryo kumenyekanisha ibikorwa mu gikombe cy’Isi.

Muri Mata 2013, yahise asezera burundu nka Perezida w’icyubahiro wa FIFA, umwanya yatorewe mu 1998, nyuma y’ibi birego yashinjwaga.

Nk’umuyobozi wa FIFA, Joao Havelange abenshi bamwibukira ku cyemezo cyo kongera umubare w’amakipe yitabiraga igikombe cy’isi aho wavuye kuri 16 akagera kuri 32.

Joao Havelange ni Perezida wa kabiri wayoboye igihe kirekire muri FIFA, nyuma y’Umufaransa Jules Rimet wayoboye imyaka 33, kuva 1921 kugeza 1954.

Joao Havelange wayoboye FIFA imyaka 24 yitabye Imana azize uburwayi bw'ibihaha
Joao Havelange aha Perezida wa Mexico, Miguel de la Madrid igikombe mbere yo kugishyikiriza Kapiteni wa Argentine, Diego Maradona mu 1986

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza