00:00:00 IGIHE NETWORK KN KINYARWANDA EN ENGLISH FR FRANCAIS

Itangazamakuru ryakumiriwe ku mikino isoza Shampiyona

Yanditswe na Bukuru JC
Kuya 25 Kamena 2021 saa 08:56
Yasuwe :
0 0

Ishyirahamwe ry’Umupira w’Amaguru mu Rwanda (FERWAFA), ryatangaje ko nta banyamakuru bemerewe kwitabira imikino isoza Shampiyona mu rwego rwo kubahiriza amabwiriza yo kwirinda ikwirakwira ry’icyorezo cya COVID-19.

Ishyirahamwe ry’Umupira w’Amaguru mu Rwanda (FERWAFA), ryatangaje ko nta banyamakuru bemerewe kwitabira imikino isoza Shampiyona nk’imwe mu ngamba zigamije gukumira icyorezo cya Covid-19 gikomeje gukaza umurego mu gihugu.

Shampiyona y’Icyiciro cya Mbere mu Rwanda irashyirwaho akadomo kuri uyu wa Gatanu mu cyiciro cy’amakipe umunani ya mbere ahataniye igikombe mu gihe ku ruhande rw’amakipe arwana no kutamanuka, imikino izasozwa ku wa Mbere tariki ya 28 Kamena 2021.

Ubutumwa bwa e-mail, Ubunyamabanga Bukuru bwa FERWAFA bwandikiye amakipe yose yo mu Cyiciro cya Mbere ku wa Kane, buvuga ko nta banyamakuru bemerewe kwitabira imikino isigaye ya Shampiyona.

FERWAFA yagize iti “Turabibutsa ko dukurikije amabwiriza ya Minisiteri ya Siporo yerekeye COVID-19, nta banyamakuru bemewe ku mikino.”

Mu mabwiriza mashya agenga imikino aheruka gushyirwa ahagaragara na Minisiteri Siporo nyuma y’Inama y’Abaminisitiri yo ku wa 21 Kamena 2021, yavuze ko “Nta muntu wemerewe kwinjira ahabera imyitozo cyangwa umukino keretse abakinnyi, abatoza n’ababahagarariye.”

Ubusanzwe, kuri buri mukino wa Shampiyona habaga hemewe abanyamakuru batarenze 30 kandi urutonde rwabo rugatangwa mu Ishyirahamwe ry’Umupira w’Amaguru mu Rwanda (FERWAFA), umunsi umwe mbere y’umukino.

Kuri uyu wa Gatanu, hateganyijwe imikino ibiri ya Shampiyona yitezwe na benshi kuko ariyo igena ikipe yegukana igikombe.

APR FC ya mbere irakira Rutsiro FC i Huye guhera saa Cyenda n’igice mu gihe kandi kuri iyo saha, AS Kigali iri ku mwanya wa kabiri, yakira Police FC i Muhanga.

Aya makipe abiri ya mbere, anganya amanota 16, agatandukanywa n’uko APR FC izigamye ibitego byinshi (14), irusha bine AS Kigali.

Amakuru IGIHE yamenye ni uko Ikigo cy’Igihugu cy’Itangazamakuru (RBA) gifite uburenganzira bwo kwerekana Shampiyona, cyerekana umukino uhuza APR FC na Rutsiro FC.

Uko amakipe ahataniye igikombe ahura kuri uyu wa Gatanu:

  • Marines FC vs Bugesera (Stade Umuganda - 15:30)
  • Rayon Sports FC vs Espoir FC (Bugesera - 15:30)
  • AS Kigali vs Police FC (Muhanga - 15:30)
  • APR FC vs Rutsiro FC (Huye - 15:30)

Uko amakipe arwana no kutamanuka ahura kuri uyu wa Gatanu:

  • Kiyovu SC vs Etincelles FC (Stade Mumena - 12:00)
  • Sunrise FC vs Musanze FC (Nyagatare - 12:00)
  • AS Muhanga vs Gasogi United (Muhanga -12:00)
  • Gorilla FC vs Mukura VS&L (Bugesera - 12:00)
Ikipe itwara igikombe hagati ya APR FC na AS Kigali, iramenyekana kuri uyu wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .