Kwamamaza

Ruremesha yahaye isezerano abakunzi ba Etincelles

Yanditswe kuya 6-10-2016 saa 08:39' na Manzi Rema Jules


Umutoza mushya wa Etincelles, Ruremesha Emmanuel yasabye abakunzi bayo guhaguruka bakayishyigikira muri shampiyona igiye gutangira niba badashaka ko yongera kugira ibihe bibi nk’ibyo yanyuzemo mu mwaka ushize.

Ruremesha wahoze muri Gicumbi FC mbere yo guhabwa inshingano zo gutoza Etincelles asimbuye Seninga Innocent wari umaze kwerekeza muri Police FC, yatangaje ko abafana b’ikipe ye bagomba kwigira ku ba Espoir yigeze gutoza, bakemuraga ibibazo bitandukanye, imishahara yabura bakayishakamo, umukinnyi yagira ikibazo bagafata iya mbere kugishakira umuti.

Umwaka ushize Etincelles yari mu makipe adahagaze neza ndetse igice cya mbere cya shampiyona cyarangiye iri ku mwanya wa nyuma mbere yo kugobokwa na Seninga Innocent ayifasha kwitwara neza mu mikino yo kwishyura, irangiza ku mwanya wa 12 n’amanota 32.

Mu gihe hasigaye icyumweru kimwe shampiyona ya 2016-2107 igatangira, Ruremesha asanga ikipe ye ihagaze neza ku buryo itazasubira mu bihe bigoye nk’iby’ubushize irwana no kutamanuka.

Ati “Uyu mwaka turashaka kubaka ikipe ikomeye kandi urebye abakinnyi twazanye baratanga icyizere. Muri 28 dufite harimo 12 bahoze muri Etincelles, batandatu bakiri bato bagiye kugaragara muri shampiyona bwa mbere n’abandi bashya ariko bakinnye mu makipe atandukanye.”

Uyu mutoza wamaze imyaka ibiri muri Gicumbi FC akayikurwamo n’ikibazo cy’amikoro make, yatangaje ko mu gihe amaze atoza n’amakipe yanyuzemo yaba Mukura VS, Espoir FC, Gicumbi FC na Etincelles arimo ubu, ngo abafana adashobora kwibagirwa ni abanya-Rusizi uburyo bakunda ikipe yabo nubwo ari bake akaba ari nacyo asaba abanya-Rubavu.

Ati “Natoje amakipe atandukanye ariko yose Etincelles iyarusha abafana. Gusa abo navuga bihariye ni abanya-Rusizi, bo ni bake ariko bakunda ikipe yabo ku buryo bashobora kwikoranya bakagura umukinnyi cyangwa amafaranga yabura bakishakamo imishahara, nta handi nabibonye. Na Etincelles bagomba kubigiraho, nibyo mu gihe gito maze bamba hafi ariko ubwinshi bwabo bagomba no kubukoresha bafasha ikipe.”

Etincelles FC yakinnye na APR FC mu mpera z’icyumweru gishize mu mukino wa gishuti itsindwa ibitego 2-0 ariko ibi Ruremesha ngo nta kibazo byamuteye kuko yashakaga kureba uko abakinnyi bahagaze kandi bipimye n’ikipe ikomeye.

Kuri uyu wa Gatandatu, Etincelles izakina undi mukino na Police FC, mbere yo kwakira Gicumbi FC kuri Stade Umuganda, ku mukino wa mbere muri shampiyona y’umwaka utaha iteganyijwe gutangira kuwa 14 Ukwakira 2016.

Ruremesha Emmanuel yasabye abafana ba Etincelles kwigira kuba Espoir FC uko bafasha ikipe yabo
Etincelles yari mu bihe bibi umwaka ushize ngo igiye kugarukana isura nshya
Etincelles isigaranye abakinnyi 12 mu bayikiniraga mu mwaka ushize

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved