Inyungu u Rwanda rwiteze mu kugira icyicaro cya FIFA i Kigali

Yanditswe na Eric Tony Ukurikiyimfura
Kuya 19 Gashyantare 2021 saa 07:56
Yasuwe :
0 0

Minisitiri wa Siporo, Munyangaju Aurore Mimosa, yavuze ko kugira icyicaro cya FIFA i Kigali bizafasha u Rwanda mu iterambere rya siporo by’umwihariko umupira w’amaguru kuko gahunda zose z’iri shyirahamwe mpuzamahanga zirwegereye.

Kuri uyu wa Gatanu ni bwo i Kigali hafunguwe icyicaro cya FIFA mu Karere ka Afurika y’Iburasirazuba mu muhango witabiriwe na Minisitiri w’Ububanyi n’Amahanga, Dr Vincent Biruta, Perezida wa FIFA, Gianni Infantino na Minisitiri wa Siporo, Munyangaju Aurore Mimosa.

Minisitiri Munyangaju yavuze ko muri gahunda z’ingenzi u Rwanda ruzungukira mu kugira iki cyicaro harimo iyo guteza imbere umupira w’amaguru mu mashuri no kubaka ibikorwa remezo.

Ati “Icyo umupira w’amaguru w’u Rwanda uzungukiramo cyane cyane ni ibikorwa bya FIFA kuko bizaba bitwegereye, ikindi tuzungukiramo ni uko gahunda y’umupira w’amaguru mu mashuri, guhera mu bana bato, kuzamura impano z’abana bato bizatworohera cyane ko muri gahunda FIFA ifite harimo iyo guteza imbere umupira w’abato ariko bahereye mu mashuri.”

Yakomeje avuga ko uretse izi gahunda hari n’imishinga u Rwanda rushobora kuzakoranamo na FIFA hagamijwe gukomeza guteza imbere uyu mukino.

Ati “Ibyo byose ni gahunda tuzungukiramo nk’igihugu ariko na none bitabujije y’uko mu biganiro, mu bufatanye na FIFA, mu mubano dufitanye nayo bizatworohera no gushaka indi mishinga nubwo baba batayifite ariko dushobora kubagezaho bakayigaho, babona ishobora guteza imbere umupira w’amaguru tukaba twabyungukiramo cyangwa tukabikora.”

Ku ruhande rw’Ishyirahamwe Nyarwanda ry’Umupira w’Amaguru (FERWAFA), Perezida waryo, Sekamana Jean Damascène, yavuze ko kuba FIFA igize icyicaro i Kigali bizabasha mu mikorere ya buri munsi no gukemura ibibazo byafataga igihe kubera koherezwa ku cyicaro gikuru i Zurich mu Busuwisi.

Ati “Hari ibibazo byinshi dufite bijyanye n’iterambere, hari na gahunda nyinshi dufitanye na FIFA ubwayo, nk’iriya bavuze y’umupira mu bana, turi mu bihugu bitatu izakorerwamo, urumva rero iyo ibiro bikwegereye ibintu biroroha kuko kuvugana na bo hano byari bitandukanye n’uko byari bimeze mbere.”

“Mbere ibintu byashoboraga gufata icyumweru, bibiri cyangwa bitatu, bitandukanye no gukorana n’abantu muri kumwe. Tuzabibyaza umusaruro ku buryo gahunda dufitanye na bo zizajya zihuta, tuzabafasha gukora na bo badufashe ku buryo byihuta.”

Ku ruhande rw’amashyirahamwe yo muri Afurika y’Iburasirazuba na yo azaba asangiye na FERWAFA iki cyicaro, Eng Moses Magogo uyobora FUFA muri Uganda, yagize ati “Ndi umwe mu basabye ko twagira icyicaro muri aka karere, kuba cyaje i Kigali ni byiza kuko ni hafi ugereranyije no kujya ahandi nko muri Botswana, Afurika y’Epfo n’ahandi.”

“Hari imishinga bitatworoheraga kuyishyira mu bikorwa kuko byatumaga tujya i Zurich, ariko ubu bigiye kurushaho kwihuta.”

Yavuze ko kimwe mu bibazo ibihugu byo mu Karere ka CECAFA bihuriyeho ari ukugira ubunararibonye buke mu bya tekiniki, akaba ari byo bazibandaho muri iyi gahunda ya FIFA Forward mu gihe hari n’ibihugu bifite ibibazo byihariye by’ibikorwa remezo.

Eng Magogo yashimangiye kandi ko iki ari cyo gihe cyo kubyaza umusaruro aya mahirwe babonye, bakazamura umupira wo muri CECAFA, amakipe yaho ntazongere gutsindwa byoroshye n’ayo muri Afurika y’Uburengerazuba cyangwa iy’Amajyaruguru (Abarabu).

Iki cyicaro giherereye mu igorofa rya gatandatu ry’inyubako ya I&M Bank iri mu Karere ka Nyarugenge, kizaba gihuriweho n’u Rwanda, u Burundi, Djibouti, Ethiopia, Eritrea, Kenya, Uganda, Somalia, Sudani, Sudani y’Epfo na Tanzania.

Binyuze muri gahunda ya FIFA Forward, Ishyirahamwe ry’Umupira w’Amaguru ku Isi, rifasha amashyirahamwe arigize muri gahunda z’iterambere ndetse rikayegereza amashami afasha kwihutisha imishinga itandukanye. Uru rwego rwiyemeje ko bitarenze mu 2022, ruzaba rumaze gushora hafi miliyoni 3$ mu bikorwa by’uyu mushinga.

Stade eshatu zizubakwa mu Turere twa Rutsiro, Gicumbi na Rusizi ndetse n’umushinga wa hoteli ya FERWAFA uzatwara hafi miliyari 4 Frw ni bimwe mu bikorwa biri muri iyi gahunda.

FERWAFA irateganya kubaka ibibuga biri hagati ya bine n’umunani by’ubwatsi bw’ubukorano (tapis synthètique) cyangwa bifite ubwatsi bugezweho mu mushinga uzatwara hafi miliyari 2 Frw.

Mu 2019, FIFA yahisemo u Rwanda nka kimwe mu bihugu bitatu bya Afurika bizatangiriramo gahunda nshya y’iri Shyirahamwe ry’Umupira w’Amaguru ku Isi, yo kugeza imikino mu mashuri abanza.

Intumwa za FIFA zirimo Myriam Burkhard ushinzwe Itumanaho n’Ibikorwa rusange, Philip Zimmermann ushinzwe Iterambere ry’Abakiri bato na Marie-Florence Mahwera ushinzwe iri terambere mu karere, ziheruka mu Rwanda mu nama yari igamije kunoza uburyo iyi gahunda yo guteza imbere umupira w’amaguru mu mashuri izakorwamo nubwo yakomwe mu nkokora n’icyorezo cya COVID-19.

Inzego z’u Rwanda zizagira uruhare muri iyi gahunda harimo Minisiteri ifite imikino mu nshingano zayo, Minisiteri y’Uburezi n’Ishyirahamwe ry’Umupira w’Amaguru mu Rwanda (FERWAFA), aho zizafatanya na FIFA n’Ishami ry’Umuryango w’Abibumbye ryita ku Biribwa (UN WFP).

Ingengo y’imari ya FIFA muri iyi gahunda ingana na miliyoni 100 z’amadolari, aho izagera ku bana bo muri Afurika, Aziya na Amerika y’Epfo kugeza mu 2022.

Uretse u Rwanda, ibindi bihugu byatoranyijwe muri iyi gahunda ku ikubitiro ni Botswana, Mauritanie, u Buhinde, Liban, Myanmar, Chile, Paraguay na Puerto Rico.

Muri iyi gahunda, FIFA iteganya gutanga imipira yo gukina miliyoni 11 ku Isi hose, aho u Rwanda ruzabona imipira isaga ibihumbi 49 ndetse buri shyirahamwe rikazahabwa ubufasha bwo gutegura amarushanwa y’amashuri.

U Rwanda na FIFA byasinyanye amasezerano yo kugira icyicaro i Kigali
Uhereye ibumoso ni Minisitiri w'Ububanyi n'Amahanga, Dr Vincent Biruta; uwa Siporo, Munyangaju Aurore Mimosa na Perezida wa FIFA, Gianni Infantino, hafungurwa icyicaro cya FIFA i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .