00:00:00 IGIHE NETWORK KN KINYARWANDA EN ENGLISH FR FRANCAIS

Inkweto zafashije Messi gukuraho agahigo ka Pelé zaguzwe akayabo muri cyamunara

Yanditswe na Eric Tony Ukurikiyimfura
Kuya 1 Gicurasi 2021 saa 09:15
Yasuwe :
0 0

Inkweto rutahizamu wa FC Barcelone, Lionel Messi, yakinishije ku mukino wa Real Valladolid mu Ukuboza 2020 ubwo yakuragaho agahigo ka Pelé ko gutsindira ikipe imwe ibitego byinshi, zaguzwe asaga miliyoni 170 Frw muri cyamunara yabaye ku wa Gatanu tariki ya 30 Mata mu nzu ya Christie’s mu Bwongereza.

Inzu ya cyamunara ya Christie’s yatangaje ko izo nkweto zagurishijwe kugira ngo hakusanywe inkunga yo gutanga mu bitaro bikuru bya Kaminuza ya Vall d’Hebron yigisha ibijyanye n’ubugeni n’ubuvuzi i Catalunya.

Ibihumbi 173$ (agera kuri miliyoni 170,4 Frw) zaguzwe, ni yo mafaranga menshi inkweto z’umupira w’amaguru zambawe zaguzwe muri cyamunara. Izi zikaba zari zarabanje gushyirwa mu nzu ndangamateka y’i Catalunya.

Lionel Messi yazambaye ubwo yatsindaga igitego cye cya 644 akinira FC Barcelone ku wa 22 Ukuboza 2020, agakuraho agahigo ka Pelé ko gutsindira ikipe imwe ibitego byinshi.

Umunya-Brésil, Edson Arantes do Nascimento [Pelé], ufatwa nk’umwe mu bakinny b’ibihangange babayeho mu mateka y’umupira w’amaguru ku Isi, yatsinze ibitego 643 akinira Santos y’iwabo hagati ya 1956 na 1974.

Kugira ngo Lionel Messi ageze ibyo bitego akinira FC Barcelone, byamusabye imyaka 17. Uyu mugabo kuri ubu ufite imyaka 33, kuva mu 2004, yatwaranye n’iyi kipe ibikombe 10 bya La Liga na bine bya Champions League.

Umudage Gerd Müller na we yashoboraga kugera kuri aka gahigo ubwo yakiniraga Bayern Munich hagati ya 1964 na 1979, ariko we yatsinze ibitego 565.

Abandi baza hafi kuri urwo rutonde ni Fernando Peyroteo watsinze ibitego 544 akinira Sporting CP hagati ya 1937 na 1949 na Josef Bican watsinze ibitego 534 akinira Slavia Prague.

Lionel Messi yujuje ibitego 644 ubwo FC Barcelone yatsindaga Real Valladolid ibitego 3-0 mu Ukuboza 2020
Inkweto Lionel Messi yari yambaye kuri uwo mukino, zaguzwe asaga miliyoni 170 Frw muri cyamunara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .