00:00:00 IGIHE NETWORK KN KINYARWANDA EN ENGLISH FR FRANCAIS

Ingengabihe ya Shampiyona y’Abagore 2021/22 yashyizwe ahagaragara

Yanditswe na Bukuru JC
Kuya 26 Ukwakira 2021 saa 09:52
Yasuwe :
0 0

Ishyirahamwe ry’Umupira w’Amaguru mu Rwanda (FERWAFA), ryashyize ahagaragara uko amakipe azahura muri Shampiyona y’Icyiciro cya Mbere mu bagore y’umwaka w’imikino wa 2021/22, izatangira tariki ya 1 Ugushyingo 2021.

Hari hashize imyaka hafi ibiri iyi Shampiyona idakinwa kubera icyorezo cya COVID-19. Iya 2019/20 yasheshwe mu Ukuboza mu gihe iya 2020/21 itabaye nubwo byari byateganyijwe ko yakinwa muri Nyakanga uyu mwaka.

Ingengabihe y’umwaka w’imikino wa 2021/22 igaragaraza ko imikino ibanza y’iyi Shampiyona y’Abagore izakinwa mu gihe cy‘iminsi 56, kugeza tariki ya 26 Ukuboza 2021.

Iyi Shampiyona izakinwa n’amakipe icyenda arimo AS Kigali WFC, Inyemera WFC, Fatima WFC, Rambura WFC, APAER WFC, Bugesera WFC, ES Mutunda WFC, Kamonyi WFC na Freedom WFC.

Scandinavia WFC y’i Rubavu, yatwaye igikombe cya Shampiyona iheruka gukinwa mu mwaka w’imikino wa 2018/19, ntiri mu makipe azakina uyu mwaka w’imikino nyuma yo gutangaza ko ititeguye kubera amikoro make.

AS Kigali WFC yatwaye ibikombe 10 yikurikiranya hagati ya 2008 na 2018, izatangira Shampiyona yakirwa na APAER WFC mu mukino uzabera i Kabuga ku wa 1 Ugushyingo 2021.

Fatima WFC y’i Musanze yaguze Umwariwase Dudja na Ibangarye Anne Marie, bakinaga mu busatirizi bwa AS Kigali, izatangira yakira Kamonyi WFC kuri Stade Ubwororane.

Kuri uwo munsi wa mbere, Rambura izakirwa na ES Mutunda kuri Stade Kamena mu gihe Bugesera WFC izakirira Inyemera WFC i Kamabuye.

Tariki 27 Ugushyingo 2021 ni bwo AS Kigali WFC izakira Fatima WFC kuri Stade ya Kigali i Nyamirambo mu mukino witezwe cyane muri iyi Shampiyona y’Abagore.

Shampiyona y'Abagore ya 2021/22 izatangira ku wa 1 Ugushyingo, ikinwe n'amakipe icyenda
AS Kigali WFC yatwaye ibikombe 10 mu myaka 10 kugeza mu 2018, iri mu zihabwa amahirwe kuri iyi nshuro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .