Indege y’umuherwe wa Leicester City yasandaye ivuye kuri stade, hari ubwoba ko yapfiriyemo

Yanditswe na IGIHE
Kuya 28 Ukwakira 2018 saa 09:37
Yasuwe :
0 0

Indege y’umuherwe wa Leicester City, Vichai Srivaddhanaprabha, yafashwe n’inkongi nyuma yo gukorera impanuka hafi ya stade y’iyi kipe, hari hashize isaha imwe umukino wahuzaga Leicester na West Ham usojwe.

Iyi kipe yo mu Bwongereza ntiratangaza niba umuherwe Vichai Srivaddhanaprabha ukomoka muri Thailand yaba yari muri iyo ndege yo mu bwoko bwa kajugujugu.

Ni mu gihe bimenyerewe ko uyu mugabo buri gihe ataha muri iyi ndege iyo avuye kureba imikino y’ikipe ye. Ayigendamo agiye ku kibuga, akanayitahamo we n’abandi bayobozi. Ihagurukira muri stade rwa gati mu kibuga.

Leicester City yegukanye igikombe cya shampiyona mu 2015, yatangaje ko habaye impanuka ikomeye hafi ya stade yayo ndetse ko iri gukorana na Polisi yo mu Mujyi wa Leicestershire. Yijeje ko iza gutangaza amakuru arambuye kuri iyi mpanuka.

Polisi yo mu Mujyi wa Leicestershire yatangaje ko iperereza ryatangiye.

Ni mu gihe amashusho agaragaza iyi ndege iri gukongoka yakwirakwiriye ku mbuga nkoranyambaga.

Ababonye iyi mpanuka, bavuze ko iyi ndege yabanje gusa n’izengerera mu kirere mbere yo kugwa.

Mu 2010 nibwo Srivaddhanaprabha yaguze iyi kipe kuri miliyoni 57 z’amadolari ya Amerika, icyo gihe yari mu cyiciro cya kabiri nyuma y’imyaka ine izamuka mu cya mbere.

Mu 2016 iyi kipe yakoze amateka ataratekerezwaga, yegukana igikombe cya shampiyona ihigitse ibigugu byose.

Uyu muherwe akunzwe cyane n’abafana b’iyi kipe aho mu bihe bitandukanye yagiye abaha ibyo kunywa by’ubuntu birimo inzoga, amazi ndetse n’ibyo kurya mu myanya baba bicayemo muri stade.

Indege ye yari ikimenyabose muri stade ya King Power kuko yagwaga mu kibuga rwagati imutwaye.

Srivaddhanaprabha ni umuherwe wa 388 ku rutonde rw’abafite ifaranga rukorwa na Forbes Magazine. Umutungo we ubarirwa muri miliyari 4.9 z’amadolari ya Amerika.

Abafana, abakinnyi n’abandi bafite aho bahuriye n’umupira, bafashe mu mugongo iyi kipe muri ibi bihe bikomeye.

Iyi ndege yakoze impanuka ifatwa n'inkongi ikomeye y'umuriro
Iyi ndege yahagurukiraga mu kibuga hagati nyuma y'umukino itwaye uyu muherwe
Vichai Srivaddhanaprabha yanditse amateka akomeye mu ikipe ya ya Leicester City

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza