Inama y’igitaraganya yiga ku bugambanyi n’amacenga ashobora kurindimura Rayon Sports

Yanditswe na Manzi Rema Jules
Kuya 10 Gicurasi 2018 saa 11:45
Yasuwe :
1 0

Umwuka mubi wari umaze iminsi ututumba muri Rayon Sports uhemberwa n’abayobozi badashaka ko itsinda ngo umutoza yirukanwe, wongeye kwigaragaza kuri uyu wa Gatatu nyuma y’umukino yanganyijemo na Mukura VS ahabaye ubushyamirane bukomeye bamwe bagashaka gufatana mu mashati.

Nubwo yanditse amateka ikagera mu mikino y’amatsinda ya CAF Confederation Cup, ikaba ikipe ya mbere mu Rwanda ibikoze, Rayon Sports ntiri mu bihe byiza! Mu mikino irindwi iheruka gukina yatsinzemo umwe wa Bugesera FC, itsindwa rimwe na Costa do Sol, indi yose irayinganya.

Iyo yatsinze, umutoza aba ari umwami ariko iyo byanze havugwa byinshi kuva mu bafana kugera mu bayobozi. Umwuka mubi watangiye gututumba ku mukino iyi kipe yanganyijemo na Kirehe FC igitego 1-1 bivugwa ko myugariro Manzi Thierry (wakoze ikosa ryavuyemo igitego cya Kirehe FC) yabikoze ku bushake.

Byatumye uyu mukinnyi usanzwe uri mu beza Rayon Sports igenderaho mu b’inyuma, atongera kugirirwa icyizere ku mukino wa mbere w’amatsinda ya CAF Confederation Cup wa Gor Mahia ashyirwa hanze.

Amakuru agera kuri IGIHE ni uko hari igice cy’abahoze ari abayobozi muri Rayon Sports kiyobowe na Muhirwa Prosper (usanzwe ari Visi Perezida w’iyi kipe ariko wahagaritswe na CAF mu bikorwa by’umupira kubera gushaka gutanga ruswa ku mukino wa Lydia Ludic), kitishimiye Umutoza Ivan Minnaert ndetse gishaka ko atsindwa akirukanwa.

Umwe mu bakinnyi utashatse ko amazina ye atangazwa, yemereye IGIHE ko no mu bakinnyi hacitsemo ibice ndetse hari abasigaye bajya mu kibuga batabyitayeho.

Yagize ati “N’ejo dutaha tumaze kunganya na Mukura mu buryo bubabaje, twabivuzeho. Ku bwanjye sinkinira Rayon Sports kubera umuyobozi runaka mbikorera abafana. Ishyaka ryabo, uko batuba inyuma mu bihe byose mbiha agaciro. Gusa birababaje kubona abakinnyi bamwe bitwa ko banamazemo igihe kinini aribo bazana umwuka mubi.”

Kuri uyu wa Gatatu nyuma y’umukino wa Mukura VS ngo Muhirwa yasabye Kapiteni Ndayishimiye Eric Bakame ko nibagera i Nyanza imodoka y’abakinnyi iza guhagarara akabavugisha.

Mu byo Muhirwa yashakaga kuvugana n’abakinnyi harimo ko bagomba kwishyira hamwe bakandika ibaruwa isaba ko Ivan Minnaert asezererwa kuko batakimwiyumvamo ndetse n’Umunyamabanga wa Rayon Sports, Itangishaka King Bernard agahindurwa.

Mu kiganiro yagiranye na IGIHE, Kapiteni Bakame yavuze ko Muhirwa ari umuntu abakinnyi bakunda kuko ababa hafi ariko nta mwuka mubi abashyiramo ahubwo ikibazo akibona mu buyobozi muri rusange butakegera ikipe uko bikwiye.

Yagize ati “Ejo tukiva mu kibuga twahise twurira imodoka nta n’akantu tubashije gushyira mu nda kuko nta hantu runaka twahuriye. Tugeze kwa Hadji abakinnyi basabye Muhirwa ko yabagurira amata kuko n’ubundi bamwisanzuraho; asanzwe abikora iyo twagiye mu ntara, arayagura.”

Mu gihe amata yari amaze kugurwa, imodoka yari itwaye Umutoza Minnaert, Umubitsi wa Rayon Sports, Muhire Jean Paul n’Umunyamabanga King Bernard yahise ihagera biteza umwuka mubi, bavuga ko ari imwe mu nzira Muhirwa akoresha kugira ngo yigarurire abakinnyi, anabashyiremo imyumvire ye mibi yo kwigomeka.

Bakame yagize ati “Muhirwa nta n’ubwo twari duherukanye pe. Ntabwo akunda kwitabira inama, aza gake wenda anyuze mu Nzove turi mu myitozo akadusuhuza, nta kindi. Njye navuga ko nta mwuka mubi uri mu bakinnyi. N’ukina nabi muri iyi minsi bishobora guterwa n’umunaniro ariko nta bugambanyi buhari. Ikindi n’ubuyobozi ntibukitwegera, ibintu byose byahariwe King, nta nama zikiba.”

Uyu mukinnyi umaze igihe mu mupira w’u Rwanda yagarutse ku buryo ngo hari ubwo basigaye babwirwa kuva mu rugo mu gitondo bagiye mu myitozo bitwaje ibikoresho kuko bahita bajya mu mwiherero, bagera aho bawukorera bagasanga ngo ubuyobozi ntibwateguje kare, nta biryo bihari, bakagurirwa jus n’amandazi akaba aribyo biririrwa.

Mu kiganiro Perezida Paul Muvunyi yagiranye na IGIHE, yavuze ko ku mugoroba wo kuri uyu wa kane hateganyijwe inama yihutirwa yo kwiga ku bibazo byose biri muri iyi kipe kuko atumva impamvu hacikamo ibice mu gihe abantu bose bifuza kubaka.

Yagize ati “Simvuga byinshi ubu, wenda uze kumbaza nimugoroba nyuma y’inama dufite. Kugura amata ni ikibazo? Kereka niba yaguzwe hari ikindi kibyihishe inyuma. Ngo hari abashaka kugambanira umutoza? Nonese ko yasinye amasezerano ejo bundi (y’umwaka n’igice), nibategereze turebe umusaruro we kuko nicyo twamusabye.”

Rayon Sports iravugwamo ibibazo mu gihe yitegura kwerekeza muri Tanzania gukina umukino wa kabiri w’amatsinda muri CAF Confederation Cup izahuramo na Young Africans ku wa 16 Gicurasi 2018.

Muhirwa Prosper (hagati) bivugwa ko ariwe uyoboye itsinda ry'abatifuza Umutoza Ivan Minnaert
Umutoza Ivan Minnaert ntiyishimiye ibyakozwe na Muhirwa Prosper agurira amata abakinnyi
Kapiteni Ndayishimiye Eric Bakame yavuze ko ikibazo kiri mu buyobozi butakegera abakinnyi
Bamwe mu bakinnyi ba Rayon Sports barakekwaho gushyirwamo imyumvire bakigumura ku mutoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza