00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Munyangaju arifuza ko ubunyangamugayo buba ikirango cy’ubuyobozi bushya bwa komite olempike

Yanditswe na Habimana Sadi
Kuya 4 Kamena 2021 saa 11:29
Yasuwe :
0 0

Nyuma y’iminsi 24 habonetse abayobozi bashya ba Komite Nyobozi nshya ya Komite Olempike y’u Rwanda, basuwe na Minisitiri wa Siporo, Munyangaju Aurore Mimosa, abemerera ko imiryango ifunguye muri iyi Minisiteri ku bufasha bazayifuzaho bwose.

Ku wa Kane tariki ya 03 Kamena 2021, nibwo Minisitiri wa Siporo, Munyangaju Aurore Mimosa yasuye abagize Komite Olempike y’u Rwanda bagirana ibiganiro ku mikorere izabaranga muri iyi myaka ine.

Muri ibi biganiro bagiranye, Minisitiri Munyangaju yijeje Komite Nyobozi nshya ko Minisiteri ya Siporo ifatanyije na Komite Olempike y’u Rwanda izaharanira guteza imbere Siporo no kwimakaza Indangagaciro Olempike (Olympic Values).

Minisitiri Munyangaju kandi, yabijeje ko muri Minisiteri ayobora imiryango ifunguye igihe cyose bazabifuzaho inama mu iterambere rya Siporo mu Rwanda.

Ati “Imiryango yacu irafunguye kandi mufite inkunga yacu yose. Tubifurije amahirwe masa.”

Yasabye komite nshya kurangwa n’imiyoborere myiza, ubunyangamugayo, no guharanira inyungu z’abakinnyi kurusha uko baharanira inyungu zabo bwite.

Iyi Komite Nyobozi nshya ya Komite Olempike y’u Rwanda, yatowe ku wa 8 Gicurasi, ikaba yaratorewe kuyobora mu gihe cy’imyaka ine.

Uwayo Thèogene niwe Perezida wa Komite Olempike y’u Rwanda, umwanya yagiyeho asimbuye Ambasaderi Munyabagisha Valens wari umaze imyaka ine kuri uyu mwanya.

Minisitiri wa Siporo, Munyangaju Aurore Mimosa, yabwiye Komite Olempike y'u Rwanda ko imiryango ifunguye igihe cyose izabifuzaho ubufasha
Perezida wa Komite Olempike y'u Rwanda, Uwayo Thèogene yatorewe manda y'imyaka ine
Komite Nyobozi ya Komite Olempike y'u Rwanda ubwo yari isoje inama yakoranye na Minisitiri, Munyangaju Aurore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .