Imanishimwe Emmanuel ashobora gusubira muri Rayon Sports mbere yuko shampiyona itangira

Yanditswe na Jah d’eau Dukuze
Kuya 19 Nzeri 2016 saa 07:17
Yasuwe :
0 0

Ubuyobozi bw’Ikipe ya Rayon Sports butangaza ko Ferwafa yarangije kubaha icyizere ko ikibazo cy’uwari umukinnyi wabo Imanishimwe Emmanuel, kizaba cyabonewe umuti mbere y’intangiriro za shampiyona ya 2016-2017.

Rayon Sports yareze muri Ferwafa, ubwo byavugwaga ko Imanishimwe yasinyiye APR FC nyuma y’amasaha 24 ashyize umukono ku masezerano yo gukomeza gukinira iyi kipe ikomoka i Nyanza. Aya masezerano uyu mukinnyi adakozwa, APR FC yamuguze yo ivuga ko nta kuntu Rayon Sports yari kuyamusinyisha, kandi yari ari muri iyi kipe nk’intizanyo kuva muri ASPOR.

Aya makuru yo gutizwa kwa Imanishimwe, twaje kuyahamirizwa kandi n’Umuyobozi w’iyi kipe ya ASPOR, wadutangarije ko na bo batunguwe no kumva ko Rayon Sports yarenze ku masezerano bagiranye, ikajya gusinyisha umukinnyi ibizi ko atari uwayo.

Ibi ariko Rayon Sports ntiyabikozwaga, kuko yari yandikiye Ferwafa iyimenyesha ko umukinnyi wayo Imanishimwe Emmanuel yasinyiye indi kipe ya APR FC kandi amasezerano ya mbere yari afite atari yarangira.

Rayon Sports iracyategereje igisubizo cy'ibaruwa yandikiye Ferwafa

Imanishimwe Emmanuel wagize uruhare mu mukino APR FC iheruka gutsindamo Rayon Sports 3-0, ngo ubuyobozi bw’ikipe yahozemo bwatunguwe n’uburyo Ferwafa itarimo gukemura ikibazo cye ngo kive mu nzira, maze birangira umuyobozi w’iyi kipe Gacinya Denis abajije iki kibazo mu nteko rusange kandi kitari ku murongo w’ibyigwa. Nyuma y’iyi nama, Gacinya yaje no kubiduhamiriza.

Ati "Nabajije Ferwafa niba yararangije guca urubanza kuko mu ikipe y’igihugu nabonye bamuhamagara bakavuga ko ava muri APR kandi Ferwafa ifite ikirego cyacu itari yafatira umwanzuro".

"Nabivugiye mu nteko rusange ntanga urugero kuko bitari no ku murongo w’ibyigwa, maze bambwira ko mbere y’uko shampiyona itangira bizaba byamenyekanye niba ari umukinnyi wa Rayon Sports cyangwa se niba azahanwa".

Gacinya Denis, yanaboneyeho gutangariza itangazamakuru ko nta kibazo bigeze bageza muri Ferwafa kijyanye na Rwatubyaye Abdoul, kuko we ari umukinnyi wabo kandi nta kipe nimwe bamurwanira, gusa kuri ubu bakaba bamufata nk’umukozi wataye akazi.

Uretse iby’aba bakinnyi bombi n’ubu bitari byasobanuka, Rayon Sports ni imwe mu makipe yungukiye mu nteko rusange idasanzwe yaberaga i Musanze, dore ko yemerewe kuzajya yamamaza umuterankunga wayo no mu mikino ya shampiyona, ikintu ubuyobozi bw’iyi kipe buvuga ko kizabafasha kureshya abandi bafatanyabikorwa.

Imanishimwe Emmanuel yari yazonze Rayon Sports mu mukino APR FC yayitereyemo mpaga kandi iri mu kibuga
Gacinya Denis (wicaye ibumoso yitangiriye itama) ngo yatunguwe no kubona Ferwafa ihamagara Imanishimwe imwita umukinnyi wa APR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza