Kwamamaza

Ruswa iravuza ubuhuha mu makipe ashaka itike yo kwitabira igikombe cy’Isi

Yanditswe kuya 6-09-2016 saa 21:18' na Manzi Rema Jules


Mu gihe ibihugu bikomeje kwesurana byishakamo ibizitabira imikino ya nyuma y’igikombe cy’Isi cya 2018 kizabera mu Burusiya, ibitiyizeye mu kibuga bikoresha izindi mbaraga zirimo no gutanga ruswa ku bakeba ngo bitsindishe.

Nubwo bikunze kuvugwa ariko bikagorana kubonerwa ibimenyetso simusiga ko hari amakipe agurisha imikino akitsindisha, kuri uyu wa Kabiri mbere yo gukina na Canada mu gushaka itike y’igikombe cy’Isi cya 2018, ikipe y’igihugu ya El Salvador yemeje ko bemerewe ruswa mu gihe batsinda uyu mukino ndetse bashyira ahagaragara amajwi nk’ikimenyetso cy’iki cyorezo gikomeje kumunga ruhago.

Iki gihugu kidafite amahirwe yo kubona itike n’iyo cyatsinda, cyagombaga gukora ibishoboka byose kuri uyu wa Kabiri mu mukino bakina na Canada bakayitsinda byanze bikunze kugira ngo byongerere amahirwe Honduras ya kabiri mu itsinda n’amanota 7 inyuma ya Mexique ya mbere n’amanota 15.

Nk’uko ikinyamakuru Mirror.Co.Uk cyabitangaje, mu ijwi ry’iminota 10 ryafashwe n’umucuruzi ukomeye wo muri El Salvador witwa Ricardo Padilla wavuganaga n’undi mucuruzi wo muri Honduras ari na we washakaga gufasha igihugu cye kubona itike, ngo iyo batsinda uyu mukino buri mukinnyi yari yemerewe amadolari 30 y’Amerika ku munota, banganya agahabwa amadolari 25 ku munota na ho batsindwa ku gitego 1-0 agahabwa amadolari 15 byarenga 2-0 ntihagire ikintu bahabwa.

Uyu muherwe yashakaga ko Canada itakaza ikagabanya igitutu iri gushyira ku gihugu cye.

Aya makipe ari mu itsinda A mu gushaka itike y’igikombe cy’Isi abarizwa mu Mpuzamashyirahamwe y’Umupira w’Amaguru muri Amerika ya ruguru no hagati, Concacaf.

Mexique yamaze kubona itike yo kwitabira igikombe cy’Isi mu gihe indi imwe igomba kuva hagati ya Honduras ya kabiri na Canada ya gatatu.

Nyuma y’uko ibi bitangajwe, FIFA yahise itangaza ko igiye gukora iperereza kuri ibi byaha ndetse igihe byagira abo bihama bakaba bakurikiranwa n’amategeko.

Concacaf ibarizwamo ibihugu 41 by’ibinyamuryango izahagararirwa n’ibihugu bitatu mu gikombe cy’Isi cya 2018, mu gihe ikipe ya kane igomba kongera kunyura mu mikino y’amajonjora aho izisobanura n’izava mu Mpuzamashyirahamwe yo ku mugabane wa Aziya.

Uko ibihugu bikurikirana mu itsinda A
El Salvador yateye utwatsi abagerageje kuyiha ruswa ku mukino wayihuje na Canada

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved