Kwamamaza

“Ikintu cyose kizatuma dutwara igikombe tuzagikora” Masudi Djuma

Yanditswe kuya 17-10-2016 saa 22:15' na Manzi Rema Jules


Nyuma yo gutsinda Police FC ku mukino wa mbere wa shampiyona y’icyiciro cya mbere mu Rwanda, umutoza wa Rayon Sports, Masudi Djuma yahamije ko ikipe ye itangiranye intego imwe yo “kwegukana igikombe cya shampiyona” ndetse ko yiteguye gutanga igishoboka cyose kugira ngo ashimishe aba- Rayon abaha igikombe baheruka mu myaka itatu ishize.

Mu mwaka wa mbere atangiye shampiyona ari umutoza mukuru wa Rayon Sports, Masudi Djuma nta guca ku ruhande yahamije ko yiteguye gukora igisabwa cyose ariko akabona iyi kipe yegukana igikombe cya shampiyona nyuma yo kuyihesha icy’Amahoro umwaka ushize ari umutoza w’agateganyo.

Ati “Tuje muri shampiyona, ni igikombe kituzanye. Navuye i Burundi nje gutwara shampiyona, iby’Amahoro bizazamo nyuma, shampiyona niyo iri imbere. Ikintu cyose kizatuma tuyitwara tuzagikora.”

Masudi wahesheje Rayon Sports igikombe cya shampiyona muri 2004 ari umukinnyi, avuga ko ku isoko ry’abakinnyi ikipe ye yitwaye neza izana abo yari ikeneye kugira ngo bazibe icyuho cyari gisizwe n’abari bamaze kuva muri iyo kipe. Mu bakinnyi bashya iyi kipe yazanye, barimo Nahimana Shasiir waguzwe muri Vital’O, Moussa Camara wakiniraga AS Kasserine yamanutse mu cyiciro cya kabiri muri Tunisia n’abandi.

Ati “Mu ikipe yanjye uyu mwaka sinshaka umukinnyi uba wicaye hanze. Nuzicara nibura bizabe ari ukubera amahitamo y’umutoza, bitewe n’umukino cyangwa yavunitse. Buri mukinnnyi wese agomba gukina kandi agahora ari mu bihe byiza ku buryo ava no ku ntebe y’abasimbura agakora ibyo mushakaho.”

Ibyo umutoza Masudi avuga ntibitandukanye n’iby’umunyamabanga w’iyi kipe, Gakwaya Olivier, wemeje ko uyu mwaka batifuza ko uzamera nk’ushize aho igikombe cyabacitse mu mikino ya nyuma, bityo ngo biteguye kuba hafi ikipe kurushaho, abakinnyi bakitabwaho ku buryo bakina bishimye ari nako baha ibyishimo abafana.

Rayon Sports ifite ibikombe birindwi bya shampiyona, icya nyuma igiheruka mu 2013 ubwo yatozwaga n’umufaransa Didier Gomes da Rosa. Kuva icyo gihe ibindi bitatu byose byakurikiyeho byegukanywe na mukeba APR FC.

Iyi kipe yatangiye shampiyona y’uyu mwaka inyagira Police FC ibitego 3-0 bya Nahimana Shasiir na Kwizera Pierrot bose bakomoka i Burundi, byatumye ubu iri ku mwanya wa kabiri n’amanota atatu izigamye ibitego bitatu inganya na Bugesera FC ya mbere.

Ku mukino ukurikira, Rayon Spots izasura Espoir FC i Rusizi tariki 22 Ukwakira 2016 mbere yo gucakirana na AS Kigali kuri stade ya Kigali tariki 30 Ukwakira.

Masudi yemeza ko ikipe ye igomba gutwara igikombe cya shampiyona byanze bikunze

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved