Ikarita itukura yahawe Kwizera Olivier mu mboni za Gasingwa Michel

Yanditswe na Ntabareshya Jean de Dieu
Kuya 1 Gashyantare 2021 saa 01:13
Yasuwe :
0 0

Gasingwa Michel wabaye umusifuzi mpuzamahanga akanayobora Komisiyo y’Abasifuzi mu Ishyirahamwe ry’Umupira w’Amaguru mu Rwanda (FERWAFA) yemeje ko ikarita itukura yahawe umunyezamu w’Amavubi, Kwizera Olivier, yari yo kuko yabujije umukinnyi wa Guinea gutsinda.

U Rwanda rwaraye rutsinzwe na Guinea igitego 1-0 mu mukino wa ¼ cya Shampiyona Nyafurika ihuza abakina imbere mu bihugu byabo (CHAN 2020) iri kubera muri Cameroun.

Ikipe y’Igihugu yasoje umukino ari abakinnyi 10 mu kibuga, ni nyuma y’uko umunyezamu Kwizera Olivier yahawe ikarita itukura itavuzweho rumwe, ku ikosa yakoreye kuri rutahizamu Yakhouba Barry wari hafi kwinjira mu rubuga rw’amahina.

Umunya-Maroc wasifuye uyu mukino, Samir Guezzaz, yabanje guha umunyezamu w’Amavubi ikarita y’umuhondo mu gihe yahamagawe n’itsinda ry’abandi basifuzi batatu (Umunya-Maroc Adil Zourak n’Abanya-Tunisia Haythem Guirate na Khalil Hassani) bakoreshaga ikoranabuhanga ry’amashusho ryifashishwa mu misifurire (VAR) kugira ngo asuzume neza ikosa ryabaye.

Guezzaz yagiye aritegereza, asaba ko bamuhindurira amashusho akareba mu nguni zose ikosa ryabayemo. Ubwo yasubiraga mu kibuga, yakuyeho ikarita y’umuhondo yari yahaye Kwizera Olivier, amwereka iy’umutuku nk’uko yari yabigenje mu gice cya mbere ku yahawe Mory Kante wakiniye nabi Tuyisenge Jacques.

Iyi karita itukura iri mu byashingiweho n’abatari bake bavuze ko uyu musifuzi atabaniye Amavubi ndetse yagize uruhare mu gusezererwa kwayo muri CHAN.

Mu kiganiro yagiranye na Radiyo Rwanda kuri uyu wa Mbere, Gasingwa Michel wabaye umusifuzi mpuzamahanga, yavuze ko wari umukino wuzuyemo ishyaka ryinshi, byatumye ugaragaramo amakosa menshi.

Kuri we, yavuze ko hari n’aho umusifuzi yirengagije amakosa amwe yashoboraga kuvamo amakarita ya kabiri y’umuhondo ku bakinnyi batandukanye b’Amavubi.

Ku ikosa ryateje impagarara ryavuyemo ikarita y’umutuku kuri Kwizera Olivier, rikaba n’intandaro y’igitego, Gasingwa yavuze ko bidasobanutse neza kumenya niba koko habaye ho gukora ku mukinnyi wa Guinea, ariko yemeza ko byari ikarita itukura kuko yabujije Yakhouba Barry gutsinda kandi ari we wari umukinnyi wa nyuma.

Ati “Ubusanzwe iyo habayeho kubuza umukinnyi uburyo bwose bwo gutsinda igitego ukamukoreraho ikosa, ahanini bigendana n’ikarita y’umutuku cyangwa umuhondo bitewe naho ikosa rikorewe.”

“Birashoboka ko Kwizera Olivier yakoze ku mukinnyi kuko umusifuzi yari yabibonye ariko ntiyamuha ikarita y’umutuku, mwabonye ko yahamagawe n’abari mu cyumba bagenzuriramo [control room] cya VAR.”

“Abari kuri VAR baba bafite camera nyinshi zireba uko buri gikorwa kiri kugenda, bitandukanye n’ibyo twe tureba kuri televiziyo, birashoboka ko amashusho yeretswe umusifuzi yagaragaje ko habayeho gukora kuri uyu mukinnyi kandi nta kindi umusifuzi yari gukora uretse gutanga ikarita y’umutuku kuko uyu mukinnyi yari yasize ba myugariro b’Amavubi.”

Gutsindwa uyu mukino byatumye Amavubi asezererwa mu gihe Guinea yakomeje muri ½, izahura na Mali ku wa Gatatu.

Kwizera Olivier yahawe ikarita itukura itavuzweho rumwe
Gasingwa Michel wabaye umusifuzi mpuzamahanga yavuze ko nubwo bitagaragara neza ko Kwizera yakoze kuri Yakhouba Barry, ariko yamubujije gutsinda bityo yagombaga guhabwa ikarita itukura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .