Ihere ijisho ubwiza bwa Stade ya Bugesera yatangiye kuganurwa n’abatuye aka karere (Amafoto)

Yanditswe na Eric Tony Ukurikiyimfura
Kuya 16 Nyakanga 2019 saa 01:48
Yasuwe :
0 0

Imirimo yo kubaka ikibuga cya Stade ya Bugesera igeze kure ndetse ubu hari kunozwa aho abazajya bareba imikino bazajya bicara. Abatuye Akarere ka Bugesera batangiye kuganuzwa kuri ibi byiza bagejwejweho na Perezida Kagame dore ko iyi Stade ari imwe muri eshatu yemereye Intara y’Iburasirazuba.

Mu 2017 ubwo Perezida Kagame yiyamamarizaga mu Ntara y’Iburasirazuba, yasezeranyije abaturage ko naramuka atorewe manda ya 2017-2024 azabubakira stade eshatu, kuri ubu ziri kubakwa mu turere twa Nyagatare, Bugesera na Ngoma.

Stade ya Bugesera iri kubakwa na sosiyete y’abashinwa ya China Road and Bridge Cooperation (CRBC) ndetse imirimo igeze kure kuko ikibuga cyatangiye gukoreshwa n’abatuye aka karere guhera tariki ya 4 Nyakanga mu rwego rwo kwishimira ibyo u Rwanda rumaze kugeraho mu myaka 25 rumaze rwibihoye.

Iyi stade iherereye mu murenge wa Nyamata, yatangiye kubakwa muri Kanama umwaka ushize, yashyizwemo ubwatsi bw’ubukorano (tapis synthétique) mu kwezi gushize mu gihe kuri ubu ishobora kwakira imikino itandukanye.

Stade ya Bugesera ifite ubushobozi bwo kwakira abantu 3400, izajya yakira imikino itandukanye by’umwihariko umupira w’amaguru ndetse yamaze no gushyirwamo inzira y’abakinnyi basiganwa ku maguru (running track).

Harateganywa kandi gutunganya ahazajya hakinirwa indi mikino irimo Tennis, Basketball na Volleyball.

Iyi stade izaba igizwe n’ibibuga, aho abafana bicara, urwambariro rw’abakinnyi, ibyumba by’abaganga, icyumba cy’abanyamakuru, parikingi y’ibinyabiziga by’abitabiriye imikino n’ibindi.

Guhera tariki ya 4 z’uku kwezi, Stade ya Bugesera yatangiye kwifashishwa mu mikino itandukanye ihuza abaturage ndetse IGIHE yumvise ko ikipe ya Bugesera FC na yo iri hafi gutangira kwifashisha iki kibuga mu myitozo.

Bugesera FC yasoje umwaka ushize w’imikino yakirira ku bibuga yahitiwemo n’ishyirahamwe ry’umupira w’Amaguru mu Rwanda, FERWAFA kubera ko aho yakiniraga (ku kibuga cya APEBU Nyamata) hari harahagaritswe kuko imvura yagwaga ikibuga kikaba nk’intabire.

Ukinjira ahubatse Stade ya Bugesera, ubanza kunyura muri parikingi y'ibinyabiziga
Uri muri parikingi y'ibinyabiziga uba ureba Stade no mu kibuga
Inzira abanyamaguru bazajya bacamo bajya kwicara muri Stade hejuru
Hari n'inzira yo hasi izajya ikoreshwa
Imirimo irarimbanyije kugira ngo umwaka utaha w'imikino uzatangire iyi Stade yararangiye
Muri Stade imbere hari ibyumba bitandukanye bizaba birimo urwambariro rw'abakinnyi, icyumba cy'abanyamakuru, icy'ubuvuzi n'ibindi
Aho abakinnyi bazajya baca bagiye mu kibuga
Imirimo yo gutunganya ahatararangira irakomeje
Stade ya Bugesera uyirebeye inyuma
Inzira abari muri Stade bazajya bakoresha basohoka
Stade ya Bugesera ifite imiryango itandukanye
Abicaye mu myanya y'icyubahiro bazajya baba bitegeye ikibuga
Igisenge cya Stade ya Bugesera
Abo abantu bazajya bicara hari gusigwa amarangi ajyanye n'ibendera ry'u Rwanda
Stade ya Bugesera izaba igezweho, aho yamaze gushyirwa inzira ikoreshwa mu mikino yo gusiganwa ku maguru
Iyi Stade izajya yakira abasaga 3400
Mu mpande z'ikibuga, ahatubatse, hari guterwa ubwatsi
Stade ya Bugesera yubatse mu murenge wa Nyamata
Ku ruhande rw'ikibuga cy'umupira w'amaguru hazubakwa n'ibindi bibuga by'imikino y'amaboko
Abatunganya ubwatsi buterwa mu nkengero z'ikibuga cya Stade ya Bugesera
Stade ya Bugesera ni kimwe mu bikorwa remezo byishimirwa cyane
Iyi stade izagira uruhare mu kuzamura impano za ruhago

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza