Igurwa rya Cristiano Ronaldo muri Juventus ryateje imyigaragambyo

Yanditswe na Manzi Rema Jules
Kuya 11 Nyakanga 2018 saa 07:29
Yasuwe :
0 0

Abakozi b’uruganda rukora imodoka rwa Fiat Chrysler Automobiles bahamagaje imyigaragambyo nyuma y’uko ikipe ya Juventus iguze Cristiano Ronaldo muri Real Madrid kuri 88 z’ama Pound, ku buryo habazwe ibizatangwa ku igurwa rye byose biri kubarirwa muri miliyoni $130.

Kuri uyu wa Kabiri nibwo byemejwe ku mugaragaro ko Cristiano Ronaldo agomba kuva muri Real Madrid yari amazemo imyaka icyenda akerekeza muri Juventus.

Iyi kipe ya Juventus, uruganda Fiat Chrysler Automobiles (FCA) n’ikigo CNH Industrial (CNHI), byose bibarizwa mu mutaka umwe w’ikigo cyitwa Exor, cy’umuryango w’abaherwe wa Agnelli.

Kugura Cristiano byakiriwe neza mu bafana ba Juventus ndetse n’abakunzi b’umupira w’amaguru mu Butaliyani, ariko mu ruganda rwa Fiat hatutumba urunturuntu kuko uyu musore w’imyaka 33 yatanzweho akayabo, bahamagaza imyigaragambyo iteganyijwe ahitwa Melfi mu Majyepfo y’u Butaliyani ku Cyumweru tariki 15 Nyakanga.

Nk’uko ikinyamakuru AS cyo muri Espagne cyabitangaje, imvano ni ukubera akayabo yatanzweho nyamara abandi bakozi bamaze igihe bariziritse umukanda kubera ibibazo by’ubukungu babwiwe ko ikigo cyabo kirimo.

Mu itangazo ryashyizwe ahagaragara n’ishyirahamwe ry’abakozi, (Unione Sindicale di Base, USB), ryavuze ko ayo mafaranga yashoboraga kongerwa mu ishoramari mu ruganda, mu bikorwa birimo nko gukora imodoka nziza kurushaho.

Rigira riti "Ntabwo bikwiye ko mu gihe abakozi ba Fiat na CNHI bakomeje kwitangira ubukungu butameze neza, ikigo gitakaza miliyoni amagana z’ama-euro mu kugura umukinnyi."

Abakozi bagaragaza ko hari abamaze imyaka n’imyaka bakorera Fiat, ubu bo n’imiryango yabo bakaba biziritse umukanda ariko ikigo cyarangiza kigashora amafaranga atabarika mu kwinjiza umukozi umwe gusa.

Itangazo rikomeza rigira riti “Ese ibyo birakwiye? Birasanzwe ko umuntu ahembwa za miliyoni mu gihe indi miryango itabasha no kugeza hagati mu kwezi? Twese dukorera umukoresha umwe ariko mu bihe nk’ibi by’imibereho itifashe neza, gufatwa mu buryo butandukanye ntabwo bikwiye kwemerwa.”

"Abakozi ba Fiat bakoreye umutungo w’iki kigo nibura mu binyacumi bitatu bishize…ariko inyiturano ni ubuzima bubi. Ikigo cyari gikwiye gushora imari mu bwoko bw’imodoka butanga icyizere cy’ejo hazaza ku bihumbi by’abantu aho gukiza umuntu umwe gusa.”

Gushyira imbere inyungu z’abakozi bose ngo ni yo ikwiye kuba intego y’uruganda, ariko ngo si uko biri kugenda kuko ikigo gishyize imbere imipira, imyidagaduro n’ibindi.

Imodoka zifite ikirango cya Jeep z’uruganda Fiat Chrysler zamamazwa ku myambaro ya Juventus, biteganywa ko zizamenyekana kurushaho nyuma y’igurwa rya Ronaldo.

Mu myaka ine Cristiano agomba gusinya muri Juventus, azahembwa agera kuri miliyoni 120 z’amadorali ya Amerika, bivuze ko azajya ashyira ku mufuka miliyoni 30 z’amadorali ku mwaka, miliyoni 2.5 z’amadorali ku kwezi naho buri cyumweru akazajya abona agera ku bihumbi 576,923 by’amadorali.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza