Igitambaro Cristiano Ronaldo yataye mu kibuga cyatanzweho asaga miliyoni 70 Frw muri cyamunara

Yanditswe na Eric Tony Ukurikiyimfura
Kuya 2 Mata 2021 saa 05:54
Yasuwe :
0 0

Igitambaro cya kapiteni Cristiano Ronaldo yataye mu kibuga mu mukino Portugal yanganyijemo na Serbia ibitego 2-2 ku wa Gatandatu w’icyumweru gishize, cyaguzwe ibihumbi 54£ (agera kuri miliyoni 73 Frw) muri cyamunara.

Cristiano Ronaldo yataye igitambaro cya kapiteni mu kibuga ubwo yari amaze kwangirwa igitego ku munota wa nyuma, abasifuzi bemeza ko umupira utarenze umurongo nubwo amashusho yagaragarazaga ko wari wageze mu izamu.

Nyuma y’uwo mukino, Djordje Vukicević ukora muri stade ya Belgrade nk’ushinzwe kuzimya umuriro, yatoraguye icyo gitambaro nk’uko yabitangarije Ibiro Ntaramakuru by’Abongereza, Reuters.

Ati “Ronaldo yari yarakaye cyane kandi bigaragara ko yababaye, ahita ata igitambaro cye cya kapiteni. Cyaguye hafi yanjye.”

Vukicević ngo yagitoye ubwo umukino wari urangiye maze yiyemeza kugishyira muri cyamunara kugira ngo hakusanywe inkunga yo kuvuza umwana ufite amezi atandatu, Gavrilo Djurdjević, ufite uburwayi bw’imikaya yo mu mugongo ikorana n’ubwonko yabaye mito ku rwego rukabije, buzwi nka spinal muscular atrophy.

Yavuze ko abo bakorana mu kuzimya umuriro ku kibuga, bose bemeranyijwe kuri icyo gitekerezo kugira ngo bafashe ababyeyi ba Gavrilo gukusanya miliyoni 2,1£ akenewe ngo avurwe.

Muri cyamunara yakozwe, igitambaro cya kapiteni Cristiano Ronaldo yataye, cyagurishijwe ibihumbi 64€ (agera kuri miliyoni 73 Frw).

Nyina wa Gavrilo, Nevena Djuridjević, yavuze ko batunguwe n’igikorwa cyakozwe ngo hashakwe amafaranga yo kuvuza umuhungu we.

Ati “Ntitwiyumvishaga uburyo abantu batatuzi bashobora gufata igitambaro bakagishyira muri cyamunara bagamije gufasha umwana wacu.”

Nevena yavuze ko mu gace batuyemo ka Čumić hafi n’umujyi wa Kragujevac, bamaze kuhakusanya ibihumbi 500€ (asaga miliyoni 575 Frw).

Cristiano Ronaldo yataye igitambaro cya kapiteni ubwo yangirwaga igitego umupira warenze umurongo
Djordje Vukicević yatoraguye igitambaro cya Cristiano Ronaldo akijyana muri cyamunara
Ababyeyi ba Gavrilo; Aleksandar na Nevena Djuridjevic bakomeje gukusanya amafaranga yo kumuvuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .