Icyo Kiyovu Sports igiye gukora kizatuma itamanuka mu cyiciro cya kabiri

Yanditswe na Manzi Rema Jules
Kuya 20 Mata 2017 saa 03:33
Yasuwe :
0 0

Kiyovu Sports, imwe mu makipe y’ubukombe mu Rwanda ikomeje kwitwara nabi mu gice cya kabiri cya shampiyona, aho itarabasha kubona amanota atatu na rimwe, byatumye ubuyobozi bwayo butumiza inama y’igitaraganya yo kwiga ku hazaza hayo.

Mu gihe hasigaye imikino irindwi ngo shampiyona y’u Rwanda ya 2016/2017 irangire, Kiyovu Sports iri ku mwanya wa 13 mu makipe 16 n’amanota 22 irusha Gicumbi FC iri mu murongo utukura amanota ane gusa.

Igiteye ubwoba abafana b’iyi kipe ni uko mu gihe mu gice cya mbere yari yayiye igerageza kwitwara neza itsinda amakipe atandukanye arimo nka Police FC, AS Kigali n’izindi, kuva igice cya kabiri cyatangira ntirabasha kubona amanota atatu kandi mu mikino irindwi isigaje gukina harimo amakipe nka APR FC, Sunrise FC, Police FC, Espoir FC, AS Kigali, Marines FC na Rayon Sports.

Ibi byatumye ubuyobozi butegura inama y’abakinnyi n’umutoza Kanamugire Aloys kugira ngo basase inzobe bige ku mpamvu ziri inyuma y’umusaruro mubi banzura ko bashaka amanota arindwi cyangwa icyenda azatuma bizera kutamanuka nk’uko umuvugizi wayo Omar Munyengabe yabitangarije IGIHE.

Yagize ati “Nibyo ntabwo ikipe irimo kwitwara neza; navuga ko byatewe n’intego twari twihaye tugitangira shampiyona zitaduhiriye. Ku rundi ruhande ikipe itsindwa kenshi ntibura n’ibindi bibazo ugasanga umwuka atari mwiza mu banyamuryango, abafana ….”

“Kugeza ubu iko bihagaze natwe biduteye impungenge ariko icyo tugomba gukora ni ugufata ingamba zihuse, ngira ngo dusigaje imikino igera kuri irindwi kandi ikomeye. Turamutse tubonye amanota icyenda cyangwa arindwi ntabwo twamanuka. Ni cyo tugiye kurwana nacyo kugira ngo aboneke.”

Munyengabe yavuze ko muri iyi nama kandi bahaye umwanya abakinnyi kugira ngo bagaragaze niba haba hari ikibazo cy’umwuka mubi waba ari wo ntandaro yo kutitwara neza basanga nta wurimo.

Umutoza Kanamugire we yasabye ubuyobozi kumufasha gukora umwiherero nibura w’iminsi ibiri igihe bategura imikino ukazatangira kuri uyu wa Gatanu bategura umukino wa APR FC wo ku Cyumweru.

Mu gihe bisa n’aho Pepiniere FC yamaze kumanuka kuko mu mikino 23 ya shampiyona imaze kubona amanota 12 gusa, ibyago byinshi ku ikipe izayikurikira mu cyiciro cya kabiri bifitwe na Gicumbi FC ya 15 n’amanota 18, Marines FC ya 14 n’amanota 19 ndetse na Kiyovu Sports ya 13 n’amanota 22.

Kiyovu Sports igiye kureba uko yabona amanota azatuma itamanuka mu cyiciro cya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza