Kwamamaza

Icyizere ni cyose kuri Jimmy Mulisa uri gushakirwaho undi mutoza

Yanditswe kuya 15-10-2016 saa 07:05' na Manzi Rema Jules


Umutoza mukuru w’agateganyo mu ikipe y’igihugu Amavubi, Jimmy Mulisa, asanga ku myaka ibiri amaze mu butoza, imyaka 12 nk’umukinnyi wabigize umwuga, amashuri n’amahugurwa atandukanye amaze kubona n’ibyo akomeje kwiga umunsi ku munsi, ari ifatizo ryatuma atatinya gufata inshingano nk’umutoza mukuru w’Amavubi igihe yaba agiriwe icyizere.

Mulisa wajyanye Amavubi muri Ghana nk’umutoza mukuru w’agateganyo nyuma yo kwirukana Jonathan Mckinstry akayafasha kungaya igitego 1-1, kugeza ubu aracyakora aka kazi nk’umutoza wungirije ndetse Ferwafa ikomeje gushaka undi ushobora kuza kuba umutoza mukuru mu minsi ya vuba.

Mu kiganiro yagiranye na IGIHE, Mulisa Jimmy yavuze ko kuva yava muri Ghana nta muyobozi bigeze baganira kugira ngo abe yakomeza gutoza Amavubi nk’umutoza mukuru, ariko ngo igihe cyose yagirirwa icyizere nta bwoba bwo gufata ibyemezo no guhangana ashobora kugira.

Ati “Umupira imyaka nawukinnye sinjya ntinya kugerageza n’iyo byaba bikomeye. Inshingano zose nabona mu mupira numva ko nshobora kuzikora. Uko twitwaye muri Ghana byaranshimishije cyane kandi nashimiye na Minispoc na Ferwafa kungirira icyizere. Hari abatoza benshi ariko aba ari jye bahitamo, n’uyu munsi ndacyarimo kwiga kuko nkeneye kumenya byinshi kuruta ibyo nzi uyu munsi.”

Yakomeje agira ati“Ntabwo waba ushaka gutera imbere uramutse uri umutoza ariko ukitinya ku ikipe runaka, si Amavubi gusa n’indi kipe yose njye nayitoza kuko gushaka ni ugushobora. Ufite abantu mukorana neza, abayobozi bagushyigikiye byose birashoboka.”

Mulisa usanzwe ari n’umuyobozi wa tekinike wungirije mu Mavubi, yavuze ko amahugurwa y’ibyumweru bitatu akubutsemo mu Budage uretse kuba yarayakuyemo impamyabushobozi y’icyiciro B (UEFA B Level) mu gutoza, ngo yabaye n’umuyoboro wo kumenyana n’abatoza bakomeye nka Julian Nagelsmann wa Hoffenheim n’abandi yigiyeho byinshi.

Umuyobozi wa Ferwafa, Nzamwita Vincent de Gaulle aherutse gutangaza ko mu bufatanye basanzwe bafitanye n’Ishyirahamwe ry’umupira w’amaguru mu Budage, barisabye gufasha u Rwanda kubona undi mutoza uzasimbura Jonathan Mckinstry, nubwo abandi babonaga ari igihe ko iyi kipe yahabwa umutoza w’Umunyarwanda cyane ko n’abakinnyi bayigize abenshi ari abakina imbere mu gihugu.

Mu myaka 12 yamaze akina umupira w’amaguru, Mulisa yanyuze mu makipe atandukanye arimo APR FC yatangiriyemo muri 2002-2005, akina ku mugabane w’u Burayi na Aziya, asezera kuri rugaho muri 2014 ari muri T-Team yo muri Malaysia.

Mulisa yakiniye Amavubi imikino 37, ayitsindira ibitego 21 by’umwihariko yari mu Mavubi ya 2004 yakoze amateka yo kwitabira igikombe cya Afurika cyabereye muri Tunisia, ari na cyo rukumbi u Rwanda ruheruka kwitabira.

Jimmy Mulisa afite icyizere ko hari ibyo yageza ku Mavubi igihe yahabwa umwanya
Mulisa wari wungirije Mckinstry yabashije kunganyiriza muri Ghana
Mulisa avuga ko imyaka ibiri amaze mu butoza nta nshingano yatinya gufata

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved