Ibyo wamenya ku mukino wa nyuma wa Supercoppa Italiana urerekanwa kuri StarTimes

Yanditswe na IGIHE
Kuya 20 Mutarama 2021 saa 01:39
Yasuwe :
0 0

Kuri uyu wa Gatatu hateganyijwe umukino wa nyuma w’igikombe kiruta ibindi mu Butaliyani, Supercoppa Italiana, uhuza Juventus na Napoli guhera saa yine z’ijoro.

Ni ku nshuro ya 33 hagiye gukinwa uyu mukino uhuza ikipe yatwaye Shampiyona ya Serie A n’iyatwaye Coppa Italia.

Juventus iri gushaka kwegukana igikombe cya Serie A ku nshuro ya 10 yikurikiranya, iri mu bihe itamenyereye nyuma y’uko iri ku mwanya wa gatanu, irushwa amanota arindwi na Milan AC na Inter Milan za mbere.

Iyi kipe y’umutoza Andrea Pirlo yatsinzwe ibitego 2-0 na Inter Milan ku Cyumweru mu gihe Napoli yanyagiye Fiorentina ibitego 6-0 kuri uwo munsi.

Juventus imaze kwegukana Supercoppa Italiana inshuro umunani, mu gihe yatsinzwe umukino wa nyuma inshuro zirindwi.

Ku ruhande rwa Napoli, imikino itatu ya nyuma iheruka gukina yayihuje na Juventus, uheruka ukaba uwo mu 2014 ubwo yatsindaga kuri penaliti 6-5. Pirlo yakiniye Juventus muri uwo mukino mu gihe abakinnyi bakinira Napoli ubu barimo Umubiligi Dries Mertens n’Umufaransa Kalidou Koulibaly nabo bawugaragayemo.

Perezida wa Napoli, Aurelio De Laurentis, yasabye ko uyu mukino wasubikwa ugashyirwa mu gihe abafana bazaba bemewe, amafaranga yinjiye akazajya mu gushyigikira inzego z’ubuzima mu kurwanya COVID-19, ariko yatewe utwatsi.

Mu mpera z’icyumweru gishize, iyi kipe yatangaje ko yemeye icyemezo cy’Ishyirahamwe ry’Umupira w’Amaguru mu Butaliyani (FIGC) cyo gukina uyu mukino.

Umutoza wa Napoli, Gennaro Gattuso, wahawe iyi kipe mu Ukuboza 2019 nyuma yo gutsinda Fiorentina, yavuze ko Juventus bazahura ari ikipe ikomeye.

Ati “Bamaze imyaka icyenda bayoboye umupira w’u Butaliyani, barakomeye kandi nubwo baba bafite abakinnyi badahari, bafite abandi bakora ikinyuranyo.”

Ku mukino wa Fiorentina, Gattuso ntiyari afite Umunya-Nigeria Victor Osimhen wari mu kato nyuma yo kwandura COVID-19, kimwe na Fabian Ruiz utarakinnye kubera uburwayi, ariko yizeye ko hari abashobora kugaruka.

Ati “Ntabwo tuzaba duhabwa amahirwe, ariko twizera ko bamwe mu bakinnyi bacu basibye imikino iheruka bazaba baje. Twizeye gukina umupira mwiza. Hari amahirwe dufite, ariko hari icyubahiro tugomba Juventus ku mateka yayo n’imikinire yayo.”

Ikigo cya StarTimes kiyoboye ibindi mu ikoranabuhanga ryo gusakaza amashusho ya televiziyo muri Afurika, kirerekana uyu mukino wa Supercoppa Italiana uri bube guhera saa yine z’ijoro zo mu Rwanda.

Juventus na Napoli zirahangana kuri uyu wa Gatatu ku mukino wa nyuma wa Supercoppa Italiana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .