00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku mukino wa nyuma wa Europa League birimo amafaranga ahabwa ikipe yegukana igikombe

Yanditswe na Bukuru JC
Kuya 26 Gicurasi 2021 saa 11:46
Yasuwe :
0 0

Kuri uyu wa Gatatu guhera saa Tatu z’ijoro, hateganyijwe umukino wa nyuma wa Europa League mu mwaka w’imikino wa 2020/21, uhuza Villarreal na Manchester United kuri Stade ya Gdańsk muri Pologne.

Villarreal irajya muri uyu mukino ishaka kuba ikipe ya 10 yo muri Espagne, itsindiye ku mukino wa nyuma iyo mu Bwongereza mu irushanwa ry’u Burayi. Muri izo nshuro harimo ebyiri Manchester United yatsinzwemo na FC Barcelone.

Umutoza w’iyi kipe yo muri Espagne, Unai Emery, arashaka gutwarana na yo igikombe cya mbere i Burayi, ni mu gihe yananiwe kugitwara mu 2019 ubwo yatozaga Arsenal, aho yatsinzwe na Chelsea ibitego 4-1 ku mukino wa nyuma wa Europa League.

Gusa, asanzwe amenyereye kwegukana iri rushanwa, kuko yaryegukanye inshuro eshatu ari muri Seville ndetse aramutse abigezeho kuri uyu mugoroba, yaba ari we mutoza wa mbere uryegukanye inshuro enye.

Ku ruhande rwa Manchester United, yo iheruka kwegukana Europa League mu 2017, ariko umutoza Ole Gunnar Solskjaer araba ashaka kwegukana igikombe cya mbere kuva ageze mu Ikipe yitirirwa Amashitani Atukura.

Imikino ine imaze guhuza amakipe yombi, yose yarangiye anganyije ubusa ku busa. Villarreal ni yo kipe imaze guhura na Manchester United kenshi, ariko ntiyinjizwe igitego.

Manchester United itegerejweho gushyira akadomo ku bihe bibi amakipe yo mu Bwongereza amazemo iminsi imbere y’ayo muri Espagne. Liverpool ni yo kipe iheruka kwegukana igikombe itsinze ikipe yo muri Espagne, aho yabigezeho ubwo yatwaraga UEFA Cup (yabaye Europa League) itsinze Alavés ibitego 5-4 mu mwaka w’imikino wa 2000/01.

Bruno Fernandes ukinira Manchester United, yavuze ko we na bagenzi be barajwe ishinga no kwegukana ibikombe.

Ati “Twaje muri iyi kipe kuko dushaka gutwara ibikombe. Ndatekereza ko buri mukinnyi abizi, gusa igitutu ni cyiza kuri njye.”

Unai Emery wigeze gutoza mu Bwongereza, ari muri Arsenal, yavuze ko nubwo Manchester United ari ikipe itinyitse, ariko biteguye gukoresha amahirwe babona muri uyu mukino.

Manchester United yahawe miliyoni 4,5€ (asaga miliyari 5,5) muri ½ ubwo yasezereraga AS Roma mu gihe gukina umukino wa nyuma wo kuri uyu Gatatu biyihesha andi miliyoni 4€ (hafi miliyari 5 Frw).

Bitewe n’uko yitwaye mu matsinda ya UEFA Champions League, Manchester United yabonye kandi miliyoni €23.35 (asaga miliyari 28), arimo miliyoni 15 € z’uko yari mu itsinda H ryarimo PSG, RB Leipzig na Basaksehir.

Villarreal yo yinjije miliyoni €20 (asaga miliyari 24 Frw) mu mikino yose yakinnye muri Europa League muri uyu mwaka w’imikino. Aya, ariyongera andi miliyoni €4 yo gukina umukino wa nyuma.

Ikipe itsinda umukino wa nyuma kuri uyu wa Gatatu irahabwa andi miliyoni €8,5 (asaga miliyari 10 Frw).

Itwara igikombe cy’uyu mwaka, izahabwa kandi andi miliyoni €3,5 (agera kuri miliyari 4 Frw) yo gukina umukino wa UEFA Super Cup uzaba tariki ya 11 Kanama hagati y’ikipe izatwara Champions League n’itwara Europa League.

Manchester United yaherukaga kwegukana Europa League mu 2017
Ku nshuro ya mbere ikina umukino wa nyuma w'irushanwa ry'u Burayi, Villarreal yitezweho gutungurana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .