Ibyo wamenya ku ivugururwa rya Stade Amahoro ishobora kuzajya yakira abantu ibihumbi 40

Yanditswe na Eric Tony Ukurikiyimfura
Kuya 13 Mutarama 2020 saa 09:25
Yasuwe :
0 0

Muri uyu mwaka wa 2020 nibwo biteganyijwe ko imirimo yo kuvugurura Stade Amahoro itangira, aho niyuzura izaba ifite ubushobozi bwo kwakira abantu ibihumbi 40 bicaye neza.

Mu 2018 Ikigo cy’Igihugu cy’imiturire (RHA) cyatangaje ko Stade Amahoro izavugururwa, ibice byayo byose bigasakarwa.

Stade Amahoro ikunze kwakira ibikorwa bitandukanye birimo imikino n’ibirori bitandukanye birimo iby’igihugu. Ifite igice gito gitwikiriye ndetse Impuzamashyirahamwe y’Umupira w’Amaguru muri Afurika (CAF) yavuze ko itacyemerewe kwakira imikino mpuzamahanga.

Ibi byaturutse ku kuba ibangamira itangazamakuru bitewe n’inkingi ziyirimo, camera zifata amashusho y’umukino ntizibashe gufata ibibera mu kibuga byose.

Stade Amahoro yatangiye kubakwa mu 1983, yakiye umukino wa mbere ubwo yatahagwa tariki ya 5 Nyakanga 1987 ku mukino wahuje Mukura Victory Sports na Panthères Noirs zakiniraga igikombe cyitwaga Trophée Habyarimana.

Kuva umwaka w’imikino wa 2019/2020 utangiye, tariki ya 4 Ukwakira 2019, iyi Stade yakiriye imikino ibiri ya Shampiyona gusa, harimo uwo ku munsi wa mbere wahuje Gasogi United na Rayon Sports ndetse n’uwo ku munsi wa 15 wahuje APR FC na Rayon Sports.

Ubwo APR FC yakinaga na Rayon Sports muri uyu mukino wabaye tariki ya 21 Ukuboza 2019, Stade Amahoro yaruzuye abantu bajya guhagarara hasi hegeranye n’ikibuga.

Kugeza ubu hari igishushanyo mbonera cy’agateganyo cyamaze gukorwa na Sosiyete y’Abanya-Turikiya ya Summa Rwanda, yubatse Kigali Arena ariko IGIHE yamenye ko kitaremezwa.

Icyo gishushanyo mbonera kikiri kuganirwaho kigaragaza ko Stade Amahoro niyuzura izaba ifite ubushobozi bwo kwakira abantu ibihumbi 40 bicaye neza, bavuye ku bihumbi 25 yakira kugeza uyu munsi.

Amakuru IGIHE ifite ni uko muri gahunda za leta ari uko imirimo yo kuvugurura iyi stade yaba yarangiye mu gihe cy’imyaka ibiri nubwo kugeza ubu hataremezwa sosiyete izayubaka bishoboka ko yaba Summa cyangwa se indi yatoranywa.

Muri Nzeri, ni bwo iyari Minisiteri y’Umuco na Siporo (MINISPOC) yandikiye amashyirahamwe yose akorera muri Stade Amahoro ayasaba kuba yamaze kwimura ibikorwa byayo, akayivamo bitarenze iminsi 30 bitewe n’imirimo yo kuyivugurura.

Hari amashyirahamwe y’imikino yari yagaragaje ko bitazayorohera kubona aho yimukira bitewe n’ubushobozi buke.

Ubwo hakorwaga ihererekanyabubasha, Nyirasafari Espérance wayoboraga Minisiteri ya Siporo n’Umuco yasabye Minisitiri mushya wa Siporo, Munyangaju Aurore Mimosa, kuzayafasha kubona aho gukorera dore ko n’iyi Minisiteri isanzwe ikorera muri Stade Amahoro izimuka.

Agace ka Remera karimo Stade Amahoro na Kigali Arena, kahariwe siporo gusa ndetse hazubakwa n’ibindi bikorwa remezo by’imikino itandukanye.

Igishushyanyo cy'agateganyo kigaragaza uko Stade Amahoro izaba imeze nyuma yo kuvugururwa
Agace ka Remera kahariwe Siporo kazubakwamo ibikorwaremezo by'imikino itandukanye
Ku mukino uheruka kubera kuri Stade Amahoro, abafana babuze aho bicara bajya guhagarara hasi hegereye ikibuga
Ishusho ya Stade Amahoro ku mukino wahuje Rayon Sports na APR FC tariki ya 21 Mata 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza