Ibitazava mu mutwe wa Ndoli Jean Claude wamaze kwemeza igihe azasezerera kuri ruhago

Yanditswe na Manzi Rema Jules
Kuya 19 Gicurasi 2017 saa 07:34
Yasuwe :
2 0

Nyuma y’imyaka hafi 17 Ndoli Jean Claude ari mu mupira w’amaguru nk’umuzamu muri Police FC, APR FC, AS Kigali n’Ikipe y’Igihugu, yatangaje ko igihe cye kirimo kugera ku musozo akaba yaratangiye gutegura uko umuhango we wo gusezera uzaba umeze n’ubuzima buzakurikira.

Ndoli azwi cyane muri APR FC yakiniye imyaka hafi 10 agatwarana nayo ibikombe bya shampiyona umunani, iby’Amahoro bitandatu na bibiri bya CECAFA y’amakipe n’ibindi bitandukanye mu marushanwa yategurwaga imbere mu gihugu.

Mu kiganiro kirambuye na IGIHE, Ndoli yatangaje ibihe byagiye bimushimisha kurusha ibindi nk’umukinnyi, igitego yatsinzwe cyamubabaje cyane, myugariro w’ibihe byose mu bo bakinanye, uko yifuza ko ko umuhango wo gusezera kwe wazaba umeze, ubuzima ateganya nyuma yo kuva mu kibuga n’ibindi.

Ikiganiro kirambuye Ndoli yagiranye na IGIHE

IGIHE: Ubwo wari ugikinira Police FC mu 2006 wumvise ko APR FC igushaka wabyakiriye ute?

Ndoli: Ni ibintu byanshimishije cyane. Ku bwanjye sinumvaga ko byakunda kuko nkiri muto nakundaga kubona abakinnyi ba APR FC baza gukorera umwiherero hafi yo mu rugo nanjye ngahora nibaza niba nshobora kuzaba umukinnyi wa APR FC cyangwa Rayon Sports.

Kubera ibitangaza by’Imana hari ubwo ushiduka wageze mu bintu nawe utazi uko wabigezemo, navuga ko nanjye ariko byagenze nza muri APR FC.

IGIHE: Ugiye kumara umwaka muri AS Kigali, iyi kipe wayibonye ute?

Ndoli: AS Kigali ni ikipe nziza, ibayeho neza nta kibazo. Nasanzemo bagenzi banjye twakinanye muri APR FC, umutoza twabanye kandi uzi gufata neza abakinnyi, nta kibazo.

IGIHE: Icyemezo cyo kuva muri APR FC wacyakiriye gute?

Ndoli: Nk’ahantu nakoreye amateka nkahakina imyaka irenga 10, byari bigoye kuhasohoka. Hari uko byampungabanyijeho nkeka ko ari nayo mpamvu ntagaragaye cyane uyu mwaka gusa urakora ariko uko imyaka izamuka birumvikana igihe kiragera ukavamo hakaza abakiri bato.

IGIHE: Muri APR FC bakurekuye kuko imbaraga zari zimaze kuba nke, wowe wumva ugishoboye guhangana ku rwego rwo hejuru?

Ndoli: Muri njyewe nihaye intego ko nzasezera mfite imyaka nka 35 kandi ntabwo ndayuzuza, ndumva ngifite nk’undi mwaka w’imikino umwe nibura.

IGIHE: Wifuza kuzajya gukora iki nusezera ruhago?

Ndoli: Inzozi zanjye ni uko nazagira icyo mfasha APR FC. Mbonye nk’amahirwe yo kuyitoreza abana cyangwa abazamu mbese icyo nakoramo cyose nkabitura kuko nabo bambereye ababyeyi. Ibyo bankorera wabonaga ko ari umubyeyi urera umwana ashaka ko ejo hari icyo yazagira icyo amarira barumuna be.

IGIHE: Waba waratangiye kwiga ibijyanye no gutoza?

Ndoli: Sindatangira kwiga ariko mu minsi ishize umutoza w’abazamu hano [AS Kigali] yagiye mu mahugurwa inshingano ze barazimpa. Iyo nakoreshaga imyitozo nabonaga bayishimiye ari nabyo byampaye imbaraga ko burya nabishobora. Umwaka wa nyuma nzakina nifuza ko nazawufatanya no kwiga gutoza.

IGIHE: Wakinnye imikino itandukanye yo ku rwego rwo hejuru, ni uwuhe wagusigaye mu mutwe wumva utazibagirwa?

Ndoli: Umukino twakinnye na Maroc kuri Stade ya Kigali tukayitsinda 3-1 mu 2008. Twarimo dushaka itike y’igikombe cy’Isi noneho bagiye kudutera penaliti numva Nyakubahwa Perezida Kagame ageze ku kibuga numva imbaraga ziriyongereye ndavuga nti reka nitange muheshe icyubahiro ku mahirwe nyikuramo.

[Ku batabyibuka uwo mukino wabaye tariki 14 Kamena 2008 u Rwanda rwatsindiwe na Saidi Abedi Makasi ku munota wa 15, Bokota Labama ku munota wa 68 na Olivier Karekezi ku munota wa 90 naho Maroc itsindirwa na Safri ku munota wa 78]

IGIHE: Ni uwuhe mukino wakubabaje kurusha iyindi yose?

Ndoli: Gutsindwa kose biraryana, ndi umuntu utarigeze na rimwe nifuza gutsindwa. Gusa umukino wambabaje nkumva umutima wanjye urenda guturika ni mu 2012 dukina n’Abagande ku mukino wa nyuma wa CECAFA.

Ubwo twarimo dutera Penaliti njye nkuramo ebyiri urumva ko twari dufite amahirwe ariko abacu baraje bahusha eshatu numva ndababaye mfata umwanzuro ko ubutaha nzajya nziterera.

IGIHE: Muri ba myugariro bose mwakinanye ni uwuhe wabaga aguhagaze imbere ukumva mu izamu uratuje?

Ndoli: Nakinanye na ba myugariro beza ariko navuga ko uwo nabaga mfitiye icyizere kurusha abandi ari “Rwatubyaye Abdoul”. Ni umukinnyi twumvikanaga cyane ku buryo n’iyo nakoraga ikosa yabaga ari aho hafi akangoboka vuba. Mbese yamfashaga gutekereza.

IGIHE: Ni uwuhe rutahizamu wakugoye kurusha abandi mu bo mwahanganye?

Ndoli: Ni benshi sinabarondora bose ariko navuga ko bariya bahungu ba Rayon Sports b’umwaka ushize, Kasirye na Diarra nibo nari nararahiye ko batansinda barangije badutera bine, byarambabaje cyane.

Kasirye(wambaye nimero icumi) na Ismaila Diarra ni bamwe mu bakinnyi batsinze Ndoli bikamubabaza

IGIHE: Ni uwuhe muntu ushimira ku bwawe ubona waragize uruhare runini kugira ngo ube uri Ndoli tuzi ubu?

Ndoli: Ibi byose navuga ko mbikesha Afande Ceaser Kayizari. Ni umuntu wangiraga inama cyane, niwe nkesha ikinyabupfura n’imyitwarire myiza nagize mu myaka yose maze nkina.

IGIHE: Ni uwuhe mutoza wakunze mu bagutoje bose?

Ndoli: Umutoza nishimiye cyane ni Stephen Constantine. Ni umuntu wari uzi kubana n’abakinnyi yaba mu kibuga no hanze, gufata neza abanikinnyi, agira imyitwarire myiza kandi azi no gutoza.

IGIHE: Ni uwuhe mukinnyi muri rusange mwakinanye ubona yari afite impano idasanzwe?

Ndoli: Ni Bokota. Yari umukinnyi ufite byose wakwifuza.

IGIHE: Mu bo mwakinanye bose, ni uwuhe mukinnyi wari inshuti yawe y’akadasohoka hanze y’ikibuga?

Ndoli: Ni Bakame [Ndayishimiye Eric kapiteni wa Rayon Sports]

IGIHE: Nubwo wakiniye APR FC ukanayikoreramo amateka birashoboka ko hari ikipe wakundaga kuva kera ukiri umwana, ni iyihe?

Ndoli: [Aseka cyane…] ikipe nakundaga kuva ndi umwana? Hahaha ni ibanga, sinabivuga kubera impamvu z’aka kazi kacu.

IGIHE: Ubundi iyo utari mu kazi cyangwa mu bijyanye n’umupira, ukunda gukora iki?

Ndoli: Hanze y’ikibuga nkunda kuba ndi kumwe n’umuryango wanjye nduhuka. Mfite umugore n’abana batatu ariko umwe aba hanze, nibo tuba turi kumwe kenshi.

IGIHE: Wifuza ko umuhango wo gusezera kwawe ku mupira w’amaguru wazaba umeze ute?

Ndoli: Mfite igitekerezo ko nazafata ba bakinnyi twakinanye bari inshuti zanjye, abo nanjye nafanaga mu makipe nanyuzemo bari abahanga noneho tugakora ikipe narangiza ngatumira nka APR FC nk’ikipe nakiniye tugakina umukino wa gishuti ari nawo wanyuma nzaba nkinnye.

Ndoli na Bakame ni inshuti z'akadasohoka
Ndoli (wambaye umutuku) yizeraga cyane Rwatubyaye (umuhagaze ibumoso) mu gihe cyose yamaze muri APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244